Evaengeli paMateus 3:1-17
3 Pomafiku oo, Johannes+ Omuninginifi okwa hovela okuudifila+ mombuwa yaJudea
2 ta ti: “Lidilululeni, osheshi Ouhamba womeulu owa ehena popepi.”+
3 Oye tuu ou a popiwa komuprofeti Jesaja+ a ti: “Ondaka yaao ta ingida mombuwa tai ti: ‘Longekideni ondjila yaJehova!* Yukililifeni omalila aye.’”+
4 Johannes okwa li ha djala oshikutu sholududi longamelo nekwamo loshipa moshiya shaye.+ Oikulya yaye oya li oshipaxu nomaadi eenyiki.+
5 Opo nee ovanhu vomuJerusalem nomuJudea ashishe nosho yo moitukulwa aishe, oyo ya dingilila Jordan, ova li tava i kuye,+
6 nova li tava ninginifwa* kuye mOmulonga waJordan,+ tava hepaulula omatimba avo moipafi.
7 Eshi Johannes a mona Ovafarisai nOvasadukai vahapu+ tave uya keninginifo, okwa tya kuvo: “Oludalo lomayoka omauta nye,+ olyelye e mu londwela mu ye onhapo efiku lehandu laKalunga?+
8 Onghee hano imikeni oiimati oyo tai ulike elidilululo.
9 Inamu diladila momitima deni kutya, ‘Fye otu na tate yetu Abraham.’+ Osheshi ame ohandi mu lombwele kutya Kalunga ota dulu okushitila Abraham ovana okudja momamanya aa.
10 Ekuva ola tulwa nale pefina lomuti. Onghee hano omuti keshe oo ihau ima oiimati iwa otau kewa po, ndele tau ekelwa momundilo.+
11 Osheshi ame ohandi mu ninginifa momeva, molwaashi omwe lidilulula,+ ashike ou te uya konima yange oku na eenghono e dule nge, noinandi wana nokuli okudula ko eenghaku daye.+ Ye ote ke mu ninginifa nomhepo iyapuki+ nosho yo nomundilo.+
12 Oku na oshiyelifo* meke laye, nota ka komba nawanawa oshipale shaye, noilya yo-wheat ote ke i tuvikila momaanda, ashike olungu ote ke li xwika po momundilo+ oo ihau dimi.”
13 Opo nee Jesus okwa dja muGalilea, ndele ta i kuJordan, opo a ka ninginifwe kuJohannes.+
14 Ashike Johannes okwa li ta kendabala oku mu kelela ta ti: “Aame ngeno nda wana okuninginifwa kwoove, ndele oove to uya kwaame?”
15 Jesus okwe mu nyamukula ta ti: “Osho shi na okukala ngaho, molwaashi okuninga ngaho ohatu wanifa po ashishe osho sha yuka.” Opo nee Johannes okwa dimina.
16 Konima eshi Jesus a ninginifwa, okwa dja diva koshi yomeva, ndele tala! eulu ola yeuluka,+ opo nee okwa mona omhepo yaKalunga ya fa onghuti notai kulukile kuye.+
17 Tala! Ndele meulu omwa dja yo ondaka+ tai ti: “Ou Omona wange,+ omuholike, ou nde mu hokwa.”+
