Evaengeli paMateus 24:1-51
24 Eshi Jesus a li ta di motembeli, ovahongwa vaye ove uya kuye, ndele tave mu ulikile omatungo otembeli.
2 Okwe va nyamukula a ti: “Oinima aishe omu i wete oyo? Oshili ohandi mu lombwele, kape na nande emanya tali ka fiwa apa la londa kulikwao inali ngumaunwa po.”+
3 Ofimbo a li omutumba kOmhunda yEemono, ovahongwa ove uya kuye ovo aveke tava ti: “Tu lombwela, oinima oyo otai ka ningwa naini, noshike tashi ka kala edidiliko lokukala po* kwoye+ nolexulilo longhalelo yoinima?”*+
4 Opo nee Jesus okwe va nyamukula a ti: “Taleni, inamu pukifwa nande okomunhu,+
5 osheshi vahapu otave ke uya medina lange tava ti, ‘Aame Kristus,’ notava ka pukifa vahapu.+
6 Otamu ka uda oita neenghundana di na sha noita. Ashike inamu mbadapala, osheshi oinima oyo oi na okuningwa, ndele exulilo inali fika natango.+
7 “Osheshi oiwana otai ka lwifafana, nomauhamba otaa ka kondjifafana,+ notaku ka kala ondjala+ nomakakamo edu keembinga neembinga.+
8 Oinima aishe oyo oi li ehovelo loshifeta shokudala.
9 “Opo nee ovanhu otave ke mu yandja mu hepekwe+ notave ke mu dipaa,+ notamu ka tondwa koiwana aishe omolwedina lange.+
10 Ndele vahapu otava ka efa po eitavelo lavo, tava ka kengelelafana notava ka tondafana.
11 Otaku ka holoka ovaprofeti ovanaipupulu vahapu, ndele tava pukifa vahapu.+
12 Ndele oukolokoshi otau hapupala, nohole yavahapu otai ka talala.
13 Ashike ou e lididimika* fiyo okexulilo ota xupifwa.+
14 Ndele onghundana ei iwa yOuhamba otai ka udifilwa ounyuni aushe, opo i kale ondombwedi koiwana aishe,+ opo nee exulilo tali uya.
15 “Onghee hano ngeenge omwa mono oshinima shitondifa osho tashi etifa ehanauno shi li ofika ponhele iyapuki, ngaashi sha popiwa komuprofeti Daniel,+ (omuleshi na longife eendunge dokuyoolola),
16 opo nee ovo ve li muJudea nava hovele okuya onhapo keemhunda.+
17 Omunhu oo ta hangika kombada yeumbo ina londoloka ko a ka pitule oinima yaye meumbo,
18 naau ta hangika mepya ina shuna meumbo a ka pitule mo oshikutu shaye shokombada.
19 Woo ovo tava ka hangika ovafimba novamwali pefimbo olo!
20 Kaleni tamu ilikana, opo efimbo olo lokuya onhapo lihe uye pokufu,* ile mefiku lEshabata,
21 molwaashi otaku ke uya oudjuu munene+ oo inau kala ko nale okudja pehovelo lounyuni fiyo opaife, noitau ka kala ko vali.+
22 Oshoshili, ngeno omafiku oo kaa li a xupipikwa, ngeno kape na ombelela tai ka xupifwa; ndele omolwovahoololwa, omafiku oo otaa ka xupipikwa.+
23 “Opo nee ngeenge umwe okwa ti kunye, ‘Tala! Kristus oye ou,’+ ile, ‘Oye winya!’ inamu shi itavela.+
24 Osheshi otaku ka holoka ooKristus nosho yo ovaprofeti ovanaipupulu+ notava ka longa omadidiliko manene noikumwifilonga, opo va pukife,+ ngeenge otashi dulika, nokuli novahoololwa.
25 Taleni! Onde mu londwela.
26 Hano ngeenge ovanhu ova ti kunye, ‘Tala! Oku li mombuwa,’ inamu ya ko; ‘Tala! Oku li monduda,’ inamu shi itavela.+
27 Osheshi ngaashi ashike oluvadi hali shela koushilo, ndele tali minikile fiyo okouninginino, okukala po* kwOmona womunhu nako osho taku ka kala ngaho.+
28 Keshe oko ku na oshimhu, oko taku ongala eenhwa.+
29 “Diva konima youdjuu womomafiku oo, etango otali ka laulikwa,+ nomwedi itau ka minikila vali, neenyofi otadi ka wa ko keulu, neenghono dokeulu otadi ka kakamifwa.+
30 Opo nee edidiliko lOmona womunhu otali ka holoka keulu, noiwana aishe* kombada yedu otai ka lila neenghono+ notai ka mona Omona womunhu+ te uya moilemo yokeulu e na eenghono noshinge shinene.+
31 Nota ka tuma ovaengeli vaye ve na omanghuma e na omawi a ya pombada, notava ka ongela ovahoololwa vaye okudja keemhepo nhee, okudja komunghulo umwe weulu fiyo okomunghulo mukwao.+
32 “Lihongeni kefaneko eli li na sha nomukwiyu: Diva shimha oitai yao ya tende, ndele tai twiyuka omafo, omu shii kutya okwenye oku li popepi.+
33 Sha faafana, nanye ngeenge omwa mono oinima aishe oyo, shiiveni kutya oku li popepi, poshivelo.+
34 Oshili, ohandi mu lombwele kutya epupi eli itali ka xula po nandenande, fiyo oinima aishe oyo ya ningwa.
35 Eulu nedu otali ka xula po, ashike eendjovo dange kadi na nande efiku di xule po.+
36 “Shi na sha nefiku olo novili, kape na nande oumwe e i shii,+ kutya nee ovaengeli vomeulu, ile Omona, ndele oTate aeke.+
37 Osheshi ngaashi ashike sha li pefimbo laNoa,+ osho tashi ka kala yo pokukala po* kwOmona womunhu.+
38 Osheshi pefimbo olo la tetekela Eyelu, ovanhu ova li hava li nokunwa, ovalumenhu tava hombola, novakainhu tava hombolwa, fiyo efiku olo Noa a ya monguluwato,+
39 ndele inave shi didilika fiyo osheshi Eyelu le uya nole va hanauna po aveshe.+ Hano osho tashi ka kala ngaho pokukala po kwOmona womunhu.
40 Opo nee otapa ka kala ovalumenhu vavali ve li mepya; umwe ota kufwa po, namukwao ota fiwa po.
41 Otapa ka kala ovakainhu vavali tava tu poshini shokukweyela; umwe ota kufwa po, namukwao ota fiwa po.+
42 Onghee hano kaleni oupafi, osheshi kamu shii efiku olo Omwene weni te uya.+
43 “Ndele shiiveni oshinima eshi: Ngeno mwene weumbo okwa li e shii kutya ombudi otai uya penangelo lilipi,+ ngeno ota kala oupafi noita efa eumbo laye li teywe.+
44 Onghee hano nanye kaleni mwe lilongekida,+ osheshi Omona womunhu ote uya povili oyo inamu diladila.
45 “Olyelye hano omupiya omudiinini nomunaendunge, oo omwene waye e mu nangeka po a pashukile ovapiya vaye moku va pa eendja pefimbo la wapala?+
46 Omupiya oo ita ka kala tuu a hafa, ngeenge omwene waye okwe mu hange ta ningi ngaho!+
47 Oshili, ohandi mu lombwele, ote ke mu nangeka po a pashukile oinima yaye aishe.
48 “Ashike ngeenge omupiya oo omukolokoshi okwe lipopile momutima waye ta ti, ‘Omwene wange okwa kala ko,’+
49 nokuhovela okudenga ovapiya vakwao, ndele ta li nokunwa pamwe neengholwe,
50 omwene waye ote ke uya mefiku olo ine mu teelela nopovili oyo ehe shii.+
51 Ndele ote ke mu handukila nehandu linene, note ke mu ekela monhele imwe novanaihelele. Omo omo ta ka kala ta lilaana nokulikwesha komayoo.+
Omashangelo opedu
^ Tala Omafatululo oitya.
^ Ile “lodula.” Tala Omafatululo oitya.
^ Ile “ou te lididimike.”
^ MuIsrael, pefimbo lokufu odula oya li hai loko nohaku kala olumi (o-snow), osho hashi ningifa olweendo li kale lidjuu.
^ Tala Omafatululo oitya.
^ Eln., “nomihoko adishe.”
^ Tala Omafatululo oitya.
