Evaengeli paMateus 16:1-28
16 Ofimbo Jesus a li oko, Ovafarisai nOvasadukai ove uya kuye, nove mu pula e va ulikile edidiliko la dja meulu, opo ve mu yeleke.+
2 Okwe va nyamukula ta ti: “Onguloshi ohamu ti, ‘Itaku lokwa, molwaashi eulu ola tilyana,’
3 nongula ohamu ti, ‘Molwaashi eulu ola tilyana, noku na oilemo, odula otai ka loka nena, notaku ka kala kwa talala.’ Omu shii okunongonona onghalo yomhepo mokutala keulu, ndele kamu shii okunongonona omadidiliko omafimbo.
4 Epupi likolokoshi nohali nyono ohombo* otali twikile okukonga edidiliko, ndele itali pewa edidiliko lasha,+ kakele kedidiliko laJona.”+ Opo nee okwa dja po puvo.
5 Ndele ovahongwa ova taulukila kombinga ikwao yefuta, nova dimbwa okuya nomingome.+
6 Jesus okwa tya kuvo: “Kaleni mwa pashuka nokulungamena efulika lOvafarisai nolOvasadukai.”+
7 Opo nee ova hovela okukundafana tava ti: “Kashiimba ota popi ngaho, molwaashi inatu etelela omingome.”
8 Eshi Jesus e shi didilika, okwa ti: “Omolwashike tamu kundafana kutya kamu na omingome, ovanaitavelo linini nye?
9 Mboli kamu udite ko natango eshi nda hala okutya? Itamu dimbuluka nghee nda li nda kutifa ovalumenhu 5 000 nomingome nhano nosho yo kutya oimbale ingapi ya kula mwa toolele?+
10 Ile itamu dimbuluka nghee nda li nda kutifa ovanhu 4 000 nomingome heyali nosho yo kutya oimbale* ingapi ya kula youndjaumukile mwa toolele po?+
11 Omolwashike inamu shi didilika kutya itandi popi shi na sha nomingome, ndele oshi na sha nokulungamena efulika lOvafarisai nolOvasadukai?”+
12 Opo nee ova uda ko kutya okwa li ta popi shi na sha nokulungamena omahongo Ovafarisai noOvasadukai, ndele hafulika lomingome.
13 Eshi Jesus e uya moshitukulwa shaKesarea Filippi, okwa pula ovahongwa vaye ta ti: “Ovanhu ohava ti Omona womunhu oye lyelye?”+
14 Ova tya: “Vamwe ohava ti oJohannes Omuninginifi,+ vamwe ohava ti oElia,+ navakwao vali ohava ti oJeremia, ile umwe womovaprofeti.”
15 Okwa tya kuvo: “Ndele nye ohamu ti aame lyelye?”
16 Simon Petrus okwa nyamukula ta ti: “Oove Kristus,+ Omona waKalunga omunamwenyo.”+
17 Jesus okwe mu nyamukula ta ti: “Simon, omona waJona, kala wa hafa, molwaashi hambelela nohonde* ye shi ku hololela, ndele oTate womeulu.+
18 Ohandi ku lombwele yo Petrus:+ Oivelo yOmbila* itai ka finda eongalo lange, molwaashi ohandi ke li tungila kemanya.+
19 Ohandi ke ku pa eeshapi dOuhamba womeulu, nakeshe osho to mange kombada yedu, otashi kala sha mangwa nale meulu, nakeshe osho to mangulula kombada yedu otashi kala sha mangululwa nale meulu.”
20 Opo nee okwa kunghilila ovahongwa vaha lombwele nande oumwe kutya oye Kristus.+
21 Okudja pefimbo opo, Jesus okwa hovela okuyelifila ovahongwa vaye kutya oku na okuya kuJerusalem nokuhepekwa nonyanya kovakulunhu nokovapristeri ovakulunhu nokovanongo vomishangwa nokudipawa, nomefiku etitatu ota ka nyumunwa.+
22 Opo nee Petrus okwe mu ifana po, ndele ta hovele oku mu hanyena ta ti: “Omwene, ino popya oinima ya tya ngaho; ito ka ningilwa nandenande oinima oyo.”+
23 Ndele eshi a punguluka, okwa tya kuPetrus: “Inda konima yange, Satana! Ove endangalati mondjila yange, molwaashi ito diladila ngaashi Kalunga, ndele oto diladila panhu.”+
24 Opo nee Jesus okwa lombwela ovahongwa vaye ta ti: “Ngeenge oku na ou a hala okushikula nge, ne lixupule ye mwene nokuhumbata omuti waye womahepeko,* ndele ta kala nokushikula nge.+
25 Keshe ou a hala okuxupifa omwenyo waye ote u kanifa, ndele keshe ou ta kanifa omwenyo waye omolwange ote ke u mona.+
26 Otashi kwafa shike ngeenge omunhu okwe lilikolele ounyuni aushe, ndele ta kanifa omwenyo waye?+ Ile oshike osho omunhu ta dulu okuyandjela omwenyo waye?+
27 Osheshi Omona womunhu ote uya moshinge shaXe pamwe novaengeli vaye, nota ka futa keshe umwe she likolelela koilonga yaye.+
28 Oshili, ohandi mu lombwele kutya ope na vamwe vomwaava ve li ofika apa itava ka makela nandenande efyo, fiyo osheshi tava mono tete Omona womunhu te uya mOuhamba waye.”+
Omashangelo opedu
^ Ile “nolihe fi lidiinini.”
^ Ile “oimbale yomafiloshisho.”
^ Ile “molwaashi hamunhu.”
^ Ile “yo-Hades,” sha hala okutya, koufi. Tala Omafatululo oitya.
^ Tala Omafatululo oitya.
