Inda koshikalimo

Eninginifo oshike?

Eninginifo oshike?

Enyamukulo lopaMbiibeli

Outumbulilo eninginifo otau ulike komunhu a ninginifwa koshi yomeva nokuyaulwa ko. * Naasho osha yelifa kutya omolwashike Jesus a li a ninginifwa momulonga. (Mateus 3:13, 16) Sha faafana, omulumenhu Omuetiopia okwa li a pula a ninginifwe eshi ve uya “ponhele i na omeva.” — Oilonga 8:36-40.

Eityo leninginifo

Ombiibeli oya yelekanifa eninginifo nokupakwa. (Ovaroma 6:4; Ovakolossi 2:12) Eninginifo otali ulike omunhu a fya konghedi yaye yokukalamwenyo yonale nokuhovela onghalamwenyo ipe e li Omukriste e liyapulila Kalunga. Eninginifo nosho yo eenghatu odo tadi twala meninginifo, oi li elongekido la dja kuKalunga, olo hali kwafele omunhu a kale e na eliudo la koshoka la kanghamena keitavelo laye li na sha nekuliloyambo laJesus Kristus. (1 Petrus 3:21) Nomolwaasho Jesus a li a popya kutya ovahongwa vaye ove na okuninginifwa. — Mateus 28:19, 20.

Mbela okuninginifwa momeva ohaku kosho po oulunde?

Ahowe. Ombiibeli otai hongo kutya ohatu dulu ashike okukosholwa omanyono omolwohonde yaJesus ya tika. (Ovaroma 5:8, 9; 1 Johannes 1:7) Ndele opo omunhu a mone ouwa mekuliloyambo laJesus, oku na okwiitavela muye, e na okulundulula onghedi yaye yokukalamwenyo i kale metwokumwe nomahongo aJesus nokuninginifwa. — Oilonga 2:38; 3:19.

Eshasho louhanana oshike?

Omautumbulilo “okushasha ouhanana,” ile “eshasho louhanana” kae mo mOmbiibeli. Omautumbulilo oo okwa yukifwa koivilo oyo hai ningwa keengeleka dimwe, odo hadi “shashe” ouhanana (hadi shamine, ile hadi tile ouhanana omeva pokati komutwe) noku va luka omadina.

Mbela Ombiibeli otai hongo kutya ounona nava shashwe?

Ahowe, itai hongo nandenande ngaho. Eninginifo lOvakriste olaavo va kula, ovo tava dulu okuuda ko nokwiitavela “onghundana iwa yOuhamba waKalunga.” (Oilonga 8:12) Ola kwatakanifwa nokuuda Eendjovo daKalunga, oku di tambula ko nokulivela ombedi, nounona vanini itava dulu okukatuka eenghatu da tya ngaho. — Oilonga 2:22, 38, 41.

Shikwao vali, Ombiibeli otai ulike kutya Kalunga okwa tala ko ounona ovo va dalwa kOvakriste ve li ovayapuki, ile va koshoka momesho aye, omolwoudiinini wovadali vavo. (1 Ovakorinto 7:14) Ngeno eninginifo louhanana ola li la pumbiwa, ngeno kave fi ovayapuki, ile va koshoka omolwomunhu wonhumba. *

Omitotolombo di na sha neninginifo lopaKriste

Omutotolombo: Okushamina, ile okutila omunhu omeva osha tambulwa ko nosha pingena po okuninginifa olutu alishe.

Oshili: Omaninginifo oo a tumbulwa mOmbiibeli aeshe okwa kwatela mo okuninginifwa momeva olutu alishe. Pashihopaenenwa, eshi omuhongwa Filippus a ninginifa omulumenhu Omuetiopia, ‘ova ya momeva.’ Konima yaasho, ova “dja mo momeva.” — Oilonga 8:36-39. *

Omutotolombo: Ombiibeli otai ulike kutya ounona navo ova li va kwatelwa mo eshi oilyo aishe youkwaneumbo ya li ya ninginifwa. Pashihopaenenwa, oya popya shi na sha omupashukili wodolongo umwe womuFilippi ya ti: “Okwa ninginifwa diva pamwe novaneumbo laye aveshe.” — Oilonga 16:31-34.

Oshili: Ehokololo li na sha neninginifo lomupashukili wodolongo ola ulika kutya ovo va ninginifwa ova li ve udite ko “eendjovo daJehova,” nova li va “hafa neenghono.” (Oilonga 16:32, 34) Oushili wa tya ngaho otau yandje oumbangi kutya ouhanana ovo va li meumbo lomupashukili wodolongo inava kwatelwa mo meninginifo, molwaashi itava dulu okuuda ko eendjovo daJehova.

Omutotolombo: Jesus okwa honga kombinga yeninginifo lounona, eshi a ti kutya Ouhamba owaava ve li ngaashi ounona. — Mateus 19:13-15; Markus 10:13-16.

Oshili: Jesus ka li ta kundafana shi na sha neninginifo eshi a popya eendjovo odo. Ponhele yaasho, okwa li ta ulike kutya ovo va wana okuya mOuhamba waKalunga ove na okukala va fa ounona, ovalininipiki nohava dulu okuhongwa noupu. — Mateus 18:4; Lukas 18:16, 17.

^ okat. 1 Oshitya shOshigreka osho sha tolokwa “eninginifo” osha dja koshitya osho tashi ti, “okuningina koshi yomeva.” Tala o-Theological Dictionary of the New Testament, embo 1, epandja 529.

^ okat. 6 O-The International Standard Bible Encyclopedia oya ti: “Etestamenti Lipe inali popya shi na sha neninginifo louhanana.” Oya ti yo kutya onghedindjikilile oyo oya totwa po “papuko noya divilika neenghono efimano leninginifo,” sha hala kutya, eninginifo lovene ohali kosho po omatimba. — Embo 1, epandja 416-417.

^ okat. 8 O-New Catholic Encyclopedia koshi yokapalanyole Eninginifo (mOmbiibeli) oya ti: “Osha yela kutya eengeleka donale oda li hadi ninginifa momeva.” — Embo 2, epandja 59.