Ehololo kuJohannes 4:1-11
4 Tala! Konima yaasho, onda mona omuvelo wa yeuluka meulu nonda uda ondaka yotete ya ingida ya fa enghuma tai ti kwaame: “Ila oku, nohandi ke ku ulikila oinima oyo tai ka ningwa.”
2 Diva konima yaasho, onda nwefwa mo keenghono domhepo, ndele tala! onda mona olukalwapangelo meulu nosho yo umwe e li ko omutumba kolukalwapangelo.+
3 Naao e li omutumba okwa li e na eholokepo la fa lemanya lo-jasper+ nolemanya lo-sardius,* nolukalwapangelo ola dingililwa kouta wodula u na eholokepo la fa o-emerald.+
4 Olukalwapangelo ola li la dingililwa komalukalwapangelo 24, nokomalukalwapangelo oo onda mona ko ovakulunhu 24 ve li omutumba+ va djala oikutu itoka noikoroni yoingoli komitwe davo.
5 Onda mona oluvadi+ nonda uda eendaka nomingungumo tadi di kolukalwapangelo,+ nokomesho yolukalwapangelo okwa li ku na eelamba heyali da tema omundilo, odo tadi faneke eemhepo heyali daKalunga.+
6 Komesho yolukalwapangelo okwa li oshinima tashi monika sha fa efuta,+ ngaashi okristali.
Mokati kolukalwapangelo nosho yo momudingonoko wolukalwapangelo omwa li oinamwenyo ine+ i na omesho mahapu komesho nokonima.
7 Oshinamwenyo shotete otashi monika sha fa onghoshi,+ oshitivali osha fa ongobe yomhedi,+ noshinamwenyo oshititatu+ oshi na oshipala sha fa shomunhu noshitine+ osha fa onhwa.+
8 Keshe shimwe shomoinamwenyo oyo ine oshi na omavava ahamano; okwa li e yadi omesho meni nokombada.+ Ohai kala tai popi oufiku nomutenya tai ti: “Omuyapuki, omuyapuki, omuyapuki oJehova*+ Kalunga, Omunaenghono adishe, oo a li ko, noku li ko note uya.”+
9 Efimbo keshe oinamwenyo oyo tai fimaneke notai tumbaleke nokupandula oo e li omutumba kolukalwapangelo, oo ta kala ko alushe fiyo alushe,+
10 ovakulunhu 24+ ohava tu eengolo komesho yaau e li omutumba kolukalwapangelo, oo ta kala ko alushe fiyo alushe, noku mu fimaneka, nohava dula ko oikoroni yavo komesho yolukalwapangelo tava ti:
11 “Jehova* Kalunga ketu, oove wa wana okupewa efimano,+ etumbalo+ neenghono,+ molwaashi oove wa shita oinima aishe,+ nomolwehalo loye, oya shitwa noi li po.”
