Ehololo kuJohannes 1:1-20
1 Eli ehololo* olo Jesus Kristus a pewa kuKalunga,+ opo a ulikile ovapiya vaye+ oinima oyo tai ka ningwa diva. Okwa tuma omweengeli waye komupiya waye Johannes, opo e mu ulikile momadidiliko okupitila muye.+
2 Johannes okwa hepaulula kombinga yeendjovo daKalunga, yaasho a ulikilwa kuJesus Kristus nokombinga yoinima aishe oyo a mona.
3 Keshe ou ta lesha mokule eendjovo di na sha nexunganeko eli, nakeshe ou ta udu nokudiinina osho sha shangwa mo ota kala a hafa,+ molwaashi eufwafimbo oli li popepi.
4 Ame Johannes ohandi shangele omaongalo aheyali+ oo e li moshitukulwa shaAsia:
Kaleni mu na efilonghenda nombili oyo hai di “Kwaau e li ko, a kala ko note uya,”+ keemhepo heyali+ odo di li komesho yolukalwapangelo laye
5 nosho yo kuJesus Kristus, oo e li “Ondombwedi idiinini,”+ “oo a nyumunwa tete koufi,”+ noku li “Omupangeli weehamba dokombada yedu.”+
Jesus, oo e tu hole+ nokwe tu mangulula moulunde wetu okupitila mohonde yaye,+
6 okwe tu hoolola tu ninge eehamba+ novapristeri+ vaXe, Kalunga kaye, oo e na okupewa efimano neenghono fiyo alushe. Amen.
7 Taleni! Ote uya e li moilemo+ neisho keshe otali ke mu mona nosho yo ovo ve mu tyuula; nomapata aeshe okombada yedu otae ke lidenga meenhulo a nyika oluhodi omolwaye.+ Amen.
8 “Aame Alfa naOmega,”*+ Jehova* Kalunga osho ta ti, “Omunaenghono adishe, oo e li ko, a kala ko note uya.”+
9 Ame Johannes, omumwaxo nomufyuululi wouhamba+ pamwe nanye, oo handi lididimikile+ omaudjuu+ ngaashi nye, molwaashi ndi li omushikuli waJesus,+ onda twalwa konhunhu yaPatmos, molwaashi handi hepaulula kombinga yaKalunga noyaJesus.
10 Omhepo iyapuki oya ulikila nge oinima oyo tai ka ningwa mefiku lOmwene. Opo nee onda uda ondaka tai ingida mokule konima yange
11 tai ti: “Osho u wete shi shanga momushangwatonywa, ndele to u tumine komaongalo aa aheyali: laEfeso,+ laSmirna,+ laPergamo,+ laTiatira,+ laSarde,+ laFiladelfia+ nolaLaodikea.”+
12 Onda punguluka ndi tale kutya olyelye a li ta popi naame, naashi nda punguluka, onda mona oikwatelwalamba iheyali yoingoli,+
13 nomokati koikwatelwalamba onda mona mo umwe a fa omona womunhu+ a djala oshikutu sha twa keemhadi nosho yo elapi loshingoli ponhulo yaye.
14 Omutwe neexwiki daye oditoka da fa olududi leedi litoka tootoo, ngaashi olumi,* omesho aye okwa fa omalaka omundilo,+
15 eemhadi daye oda fa ongopolo+ ya tulwa momundilo, nondaka yaye oya fa epopomo lomeva mahapu.
16 Nokwa li e na eenyofi heyali meke laye lokolulyo,+ mokanya kaye omwa dja eongamukonda lile leememo keembinga mbali,+ noshipala shaye osha li tashi vilima* sha fa ouyelele wetango wa twa.+
17 Eshi nde mu mona, onda wila peemhadi daye nda fa nda fya.
Opo nee okwa kwata nge neke laye lokolulyo, ndele ta ti: “Ino kala wa tila. Aame Ndotete+ noNdaxuuninwa,+
18 nondi na omwenyo,+ nonda file,+ ndele tala! ohandi kala nomwenyo alushe fiyo alushe,+ nondi na eeshapi defyo nosho yo dOmbila.*+
19 Onghee hano shanga oinima oyo wa mona, oyo tai ningwa paife naayo tai ka ningwa monakwiiwa.
20 Oshiholekwa shiyapuki sheenyofi heyali odo wa mona meke lange lokolulyo noshoikwatelwalamba iheyali yoshingoli osheshi: Eenyofi heyali otadi faneke ovaengeli vomaongalo aheyali, noikwatelwalamba iheyali otai faneke omaongalo aheyali.+
