Ehololo kuJohannes 3:1-22
3 “Shangela omweengeli weongalo lokuSarde to ti: Ou e na eenyofi heyali+ neemhepo heyali daKalunga+ ota ti ngaha: ‘Oilonga yoye ondi i shii, eshi u na edina wa fa u na omwenyo, ndele owa fya.+
2 Kala oupafi,+ ove u pameke oinima oyo ya xupa po noi li pokufya, molwaashi ito wanifa po* filufilu oilonga aishe oyo Kalunga kange a teelela u longe.
3 Onghee hano twikila okukaleka momadiladilo* osho wa pewa nowa uda, shi diinina, ove u lidilulule.+ Ndele ngeenge ku li oupafi, ohandi ku holokele ngaashi ombudi,+ noito ka shiiva efimbo olo handi uya kwoove.+
4 “‘Ndele muSarde omu na oohandimwe* ovo inava nyateka oikutu yavo,+ onghee otava ka enda pamwe naame va djala oikutu itoka,+ molwaashi ova wana okufimanekwa.
5 Omufindani+ ota ka dikwa oikutu itoka,+ nedina laye itandi ke li dima* mo membo lomwenyo,+ ndele ohandi ke li shiivifila Tate novaengeli vaye.+
6 Ou e na omatwi na ude osho omhepo tai lombwele omaongalo.’
7 “Shangela omweengeli weongalo lokuFiladelfia to ti: Ou e li omuyapuki+ noku li omunashili,+ ou e na oshapi yaDavid,+ ou ta patulula, opo paha kale ou ta pate, nokupata, opo paha kale ou ta patulula, ota ti ngaha:
8 ‘Tala! Ondi shii oilonga yoye. Onde ku yeululila omuvelo,+ oo pehe na oo ta dulu oku u idila. Ondi shi shii kutya ku na lela eenghono, ndele owa kala omudiinini kwaame* nokeendjovo dange.
9 Tala! Ovo vomoshinagoga shaSatana, ovo hava ti kutya vo Ovajuda, ndele hasho,+ ashike otava popi oipupulu, tala! ohandi ke va ningifa ve uye kwoove, ndele tava tu eengolo* peemhadi doye, notava ka shiiva kutya onda kala ndi ku hole.
10 Ndele molwaashi owa diinina osho wa uda shi na sha nelididimiko lange,*+ naame ohandi ke ku amena pefimbo leyeleko+ olo tali ka hanga ovanhu aveshe kombada yedu, eshi tava ka yelekwa.
11 Ohandi uya mepakumo leisho.+ Twikila okudiinina osho u na, opo uha kufwe nande okomunhu oshikoroni shoye.+
12 “‘Omufindani ohandi mu ningi ongudi motembeli yaKalunga kange; ita ka dja mo vali nandenande, nohandi mu shange edina laKalunga kange+ noloshilando shaKalunga kange, Jerusalem Shipe,+ osho sha dja meulu kuKalunga kange, nosho yo edina lange lipe.+
13 Ou e na omatwi na ude osho omhepo tai lombwele omaongalo.’
14 “Shangela omweengeli weongalo lokuLaodikea+ to ti: Ei oyo oinima oyo Amen+ ta ti, ondombwedi+ idiinini noyoshili,+ ou e li ehovelo leshito laKalunga+ ota ti ngaha:
15 ‘Ondi shii oilonga yoye, kutya ino fa omeva mapyu, ile matalala. Onda li ndi shii oto kala ngaashi omeva mapyu, ile matalala.
16 Ndele molwaashi owa fa omeva a lomoka, oo ehe fi mapyu+ oo kaatalala,+ ohandi ku fiya mo mokanya kange.
17 Oho ti: “Kandi na eshi nda pumbwa, molwaashi ame oshipuna+ nonda likola oupuna,” ashike ove ino hafa, u mu etifa onghenda, ohepele, omupofi nou li hamunghele.
18 Ohandi ku ladipike u lande kwaame oshingoli sha yelifwa momundilo, opo u punapale, noikutu itoka u liuvike nayo, opo uha monike kuvamwe u li hamunghele nou fye ohoni,+ nosho yo omuti womesho,+ opo u kale ho mono ko nawa.+
19 “‘Aveshe ovo ndi hole ohandi va pukulula nohandi va pe outekuduliko.+ Onghee hano kala omuladi, ndele to lidilulula.+
20 Tala! Ondi li ofika pomuvelo handi konghola. Ou ta udu ondaka yange, ndele ta yeulula nge, ohandi i meumbo laye tu lye ouvalelo pamwe naye.
21 Omufindani+ ohandi mu pitike a kale omutumba pamwe naame kolukalwapangelo lange,+ ngaashi ashike ame nda findana, ndele handi kala omutumba+ pamwe naTate kolukalwapangelo laye.
22 Ou e na omatwi na ude osho omhepo tai lombwele omaongalo.’”
