Ehololo kuJohannes 14:1-20
14 Opo nee onda mona, ndele tala! Odjona+ i li ofika kOmhunda yaSion+ pamwe novanhu 144 000,+ ovo va shangwa edina layo nedina laXe+ meembaba doipala yavo.
2 Opo nee onda uda omalinyengo taa di meulu a fa omeva mahapu nokwa fa engungumo linene; omalinyengo oo nda uda okwa li a fa omawi ovaimbi tava imbi notava shiki ouxumbafeta.
3 Ova li tava imbi eimbilo olo la fa lipe+ ve li komesho yolukalwapangelo, yoinamwenyo ine+ noyovakulunhu,+ nokapa li oo a dula okulihonga eimbilo olo kakele kaavo 144 000,+ ovo va kulilwa kedu.
4 Inave linyateka novakainhu, ndele ove li ngaashi oukadona elela.+ Ova kala yo va shikula Odjona keshe apa tai i.+ Ova kulilwa+ movanhu ve li ngaashi oilikolomwa yotete+ yaKalunga noyOdjona.
5 Ihava popi oipupulu, nova koshoka filufilu.+
6 Onda mona vali omweengeli umwe ta tuka pokati keulu nedu* e na onghundana iwa yaalushe oyo i na okuudifilwa aveshe ovo ve li kombada yedu, oiwana, omihoko, omalaka nomaludi aeshe.+
7 Okwa li ta ingida pombada ta ti: “Tileni nokufimaneka Kalunga, molwaashi efimbo letokolo laye ola fika.+ Onghee longeleni ou a shita eulu, edu, efuta+ neefifiya domeva.”
8 Okwa shikula vali omweengeli omutivali ta ti: “Sha teka po! Babilon Shinene+ sha teka po,+ osho sha kolwifa oiwana aishe nomaviinyu omahalo* asho oluhaelo.”*+
9 Okwa shikula vali omweengeli omutitatu ta ingida pombada ta ti: “Keshe ou te linyongamene oshilyani,+ oshihongwafano shasho nokwa didilikwa mombaba yoshipala shaye nopeke,+
10 ota ka nwa yo omaviinyu ehandu laKalunga, sha hala okutya omaviinyu inaa lumbakanifwa nasha, oo Kalunga ta ka tila meholo lehandu laye.+ Ota ka hepekwa yo nomundilo nosulfuri+ moipafi yovaengeli ovayapuki noyOdjona.
11 Nomwifi oo tau va hepeke* otau kala nokuyeluka alushe fiyo alushe.+ Ovo tave linyongamene oshilyani noshihongwafano shasho nakeshe oo e na edidiliko ledina lasho,+ otava ka hepekwa omutenya noufiku nopehe na olufuwo.
12 Osho osho sha ningifa ovayapuki, ovo hava diinine oipango yaKalunga nove na eitavelo+ la pama+ muJesus, va kale va pumbwa elididimiko.”
13 Nonda uda ondaka ya dja meulu tai ti, “Shanga: Ovo tava kala va hafa ovovo tava fi ve li moukumwe nOmwene+ okudja paife okuyuka komesho. Heeno, omhepo oya ti, nava tulumukwe koilonga yavo, osheshi Kalunga ota ka dimbuluka oilonga aishe oyo va longa.”
14 Opo nee onda mona, ndele tala! oshilemo shitoka, naau e li ko omutumba okwa fa omona womunhu,+ a djala oshikoroni shoshingoli komutwe noku na oshikashulifo shi na eememo meke laye.
15 Omweengeli vali umwe okwa dja motembeli iyapuki, ndele ta ingida pombada oo e li omutumba koshilemo ta ti: “Kufa oshikashulifo shoye u hovele okuteya, molwaashi eteyo ola fika, oilikolomwa yokombada yedu oya pya filufilu.”+
16 Opo nee oo e li omutumba koshilemo okwa hovela okulongifa oshikashulifo shaye kedu fiyo eteyo la pwa.
17 Opa holoka vali omweengeli umwe a dja motembeli iyapuki yomeulu e na oshikashulifo shi na eememo.
18 Natango opa holoka vali omweengeli mukwao a dja koaltari e na eenghono dokupangela omundilo. Okwa ingida pombada oo e na oshikashulifo shi na eememo ta ti: “Kufa oshikashulifo shoye, ndele to ongele omashila omandjebele kedu, osheshi okwa pya.”+
19 Omweengeli okwa longifa oshikashulifo shaye kedu nokwa ongela omandjebele kedu, opo nee okwe a tula moshikolelo shinene shomaviinyu ehandu laKalunga.+
20 Omandjebele oo okwa tyanghaulilwa kondje yoshilando, nohonde oyo ya dja moshikolelo osho oya li ya twa moitomo yeenghambe noya ya oule woshinano sheekilometa 296 lwaapo.*
Omashangelo opedu
^ Ile “ta tuka mewangadjo; pombada.”
^ MOshigreka, porneia. Tala Omafatululo oitya.
^ Ile “ehandu.”
^ Ile “idilile; tula modolongo.”
^ Eln., “shee-stadia 1 600.” O-stadium imwe oi fike peemeta 185. Tala Oshiw. B14.
