Ehololo kuJohannes 12:1-17
12 Opo nee onda mona edidiliko linene meulu: Omukainhu+ a dingilwa* etango, nomwedi owa li koshi yeemhadi daye, nokomutwe waye okwa li ku na oshikoroni sheenyofi 12,
2 nokwa li omufimba. Ndele molwaashi okwa li e li pokumona okaana, okwa li ta lili omolwouyehame woshifeta.
3 Onda mona vali edidiliko meulu. Tala! Ongadu inene itilyana+ i na omitwe heyali, nokomitwe oku na oikoroni* iheyali neembinga omulongo.
4 Nongadu oyo oya kokolola nomushila wayo oshititatu sheenyofi+ dokeulu noye di ekela kombada yedu.+ Oya kala ya kalela omukainhu+ oo a li pokumona okaana, opo ngeenge ka dalwa i ka xwake po.
5 Omukainhu oo okwa dala okaana kokamati+ oko taka ka lifa oiwana aishe nodibo yoshivela.+ Okaana kaye oka li ka vakulwa po* nokutwalwa kuKalunga kolukalwapangelo laye.
6 Ndele omukainhu okwa faduka po a ya mombuwa omo a longekidilwa onhele kuKalunga, opo a palulwe oule womafiku 1 260.+
7 Ndele meulu omwa tukuluka oita: Mikael*+ novaengeli vaye ova lwifa ongadu, nongadu novaengeli vayo navo ova lwa,
8 ashike inava pondola,* nokudja opo, meulu inava kala vali ve na mo onhele.
9 Onghee ongadu inene,+ eyoka likulu+ olo hali ifanwa Ondiaboli+ nosho yo Satana,+ oyo tai hongaula ounyuni aushe,+ oya umbilwa kombada yedu+ pamwe novaengeli vayo.
10 Onda uda ondaka ya ingida okudja meulu tai ti:
“Paife Kalunga ketu okwa etela ovanhu exupifo,+ eenghono daye oda hololwa nOuhamba waye+ owa dikwa po, na Kristus waye okwa hovela okupangela, molwaashi omuhokololifi wovamwatate, oo a li he va hokololifa omutenya noufiku koshipala shaKalunga, okwa umbilwa pedu!+
11 Ndele ove mu finda+ omolwohonde yOdjona+ nomolwetumwalaka olo va li hava udifa+ nokava li va tila okukanifa eemwenyo* davo.+
12 Onghee hano eulu nyakukwa nosho yo ovo mu li mo. Ndele woo edu nefuta,+ molwaashi Ondiaboli oye uya kunye noya handuka neenghono osheshi oi shi shii kutya oi na ko efimbo lixupi.”+
13 Eshi ongadu ya mona kutya oya umbilwa kombada yedu,+ oya hepeka omukainhu+ oo a dala okaana kokamati.
14 Ndele omukainhu oo okwa pewa omavava avali onhwa inene,+ opo a tuke a ye mombuwa konhele yaye oko ta ka palulwa oule wefimbo nomafimbo netatafimbo*+ e li kokule neyoka.+
15 Eyoka ola pombela omukainhu oo omeva a dja mokanya kalo a fa omulonga, opo omukainhu a fye omeva.
16 Ndele edu ola kwafela omukainhu oo eshi la makula okanya kalo nola pona po omeva oo a dja mokanya kongadu.
17 Onghee hano ongadu oya li ya handukila neenghono omukainhu oo noya ya i ka lwife oludalo* laye olo la xupa po,+ olo hali diinine oipango yaKalunga nohali hepaulula kombinga yaJesus.+
