Inda koshikalimo

Oolyelye tava i meulu?

Oolyelye tava i meulu?

Enyamukulo lopaMbiibeli

Kalunga okwa hoolola omuvalu munini wOvakriste ovadiinini, ovo shimha va fi ohava nyumuninwa omwenyo womeulu. (1 Petrus 1:3, 4) Ngeenge ova hoololwa, ove na okutwikila okukala pamufika wopaKriste weitavelo nowelihumbato, opo vaha kale inava wana vali oku ka mona efyuululo lavo lomeulu. — Ovaefeso 5:5; Ovafilippi 3:12-14.

Ovo tava i meulu otava ka ninga mo shike?

Otava ka longa pamwe naJesus ve li eehamba novapristeri oule womido 1 000. (Ehololo 5:9, 10; 20:6) Otava ka tunga po “eulu lipe,” ile epangelo lomeulu, olo tali ka pangela ‘edu lipe,’ ile ovanhu, ovo tava ka kala kombada yedu. Ovapangeli ovo vomeulu otava ka kwafela ovanhu va shune vali keenghalo di li nawa, odo Kalunga a li a lalakanena okudja pehovelo. — Jesaja 65:17; 2 Petrus 3:13.

Ovanhu vangapi tava ka nyumuninwa meulu?

Ombiibeli oya ulika kutya ovanhu 144 000 otava ka nyumuninwa omwenyo womeulu. (Ehololo 7:4) Memoniko olo la shangwa mEhololo 14:1-3, omuyapostoli Johannes okwa li a mona “Odjona i li ofika komhunda yaSion, pamwe novanhu 144 000.” Memoniko olo, “Odjona” otai ulike kuJesus omunyumunwa. (Johannes 1:29; 1 Petrus 1:19) “Omhunda yaSion” otai ulike kondodo yopombada yaJesus noyo 144 000, ovo tava ka pangela pamwe naye meulu. — Epsalme 2:6; Ovaheberi 12:22.

Ovo va “ifanwa novahoololwa” va ka pangele pamwe naKristus mOuhamba okwa tiwa ove li “okangudu kanini.” (Ehololo 17:14; Lukas 12:32) Osho otashi ulike kutya otava ka kala vanini okuyelekanifa nomuvalu aushe weedi daJesus. — Johannes 10:16.

Omitotolombo di na sha naavo tava i meulu

Omutotolombo: Ovanhu aveshe, ovo hava longo ouwa, otava i meulu.

Oshili: Kalunga okwa udaneka kutya ovanhu vahapu, ovo vawa, otava ka kala nomwenyo fiyo alushe kombada yedu. — Epsalme 37:11, 29, 34.

  • Jesus okwa ti: “Kape na omunhu a londa a ya meulu.” (Johannes 3:13) Kungaho, okwa ulika kutya ovanhu vahapu vawa, ovo va fya fimbo ine uya kombada yedu, ngaashi Abraham, Moses, Job naDavid, inava ya meulu. (Oilonga 2:29, 34) Ponhele yaasho, ova kala ve na eteelelo loku ka nyumuninwa kombada yedu. — Job 14:13-15.

  • Ovo tava nyumuninwa omwenyo womeulu okwa tiwa ove li mongudu yaavo tava “nyumunwa tete.” (Ehololo 20:6) Osho otashi ulike kutya otapa ka kala vali enyumuko limwe. Nenyumuko olo olokunyumukila kombada yedu.

  • Ombiibeli otai hongo kutya koshi yepangelo lOuhamba waKalunga, ‘efyo itali ka kala po vali.’ (Ehololo 21:3, 4) Eudaneko olo oli na okukala tali ka wanifilwa kombada yedu, shaashi meulu efyo shidalelwe li kale mo.

Omutotolombo: Keshe umwe oku na okuhoolola kutya ota ka kala nomwenyo meulu, ile okombada yedu.

Oshili: Kalunga oye ha tokola kutya Ovakriste ovadiinini velipi tava ka pewa ‘ondjabi yaavo va ifanenwa meulu,’ sha hala okutya, eteelelo loku ka kala meulu. (Ovafilippi 3:14) Ehalo lomunhu halo tali ke mu hoololifa. — Mateus 20:20-23.

Omutotolombo: Eteelelo loku ka kala nomwenyo kombada yedu oli dulike kwaalo lomeulu, molwaashi otali pewa ashike ovo inava wana okuya meulu.

Oshili: Kalunga okwa ifana ovo tava ka mona omwenyo waalushe kombada yedu, “ovanhu vange,” “ovahoololwa vange” nosho yo ovo “va nangekwa noupuna kOmwene.” (Jesaja 65:21-23) Otava ka kala ve na oufembanghenda wokuwanifa po elalakano laKalunga lopehovelo li na sha novanhu, okukala nomwenyo waalushe moparadisa kombada yedu. — Genesis 1:28; Epsalme 115:16; Jesaja 45:18.

Omutotolombo: Omuvalu wo 144 000, oo wa tumbulwa mEhololo, owopafaneko, ndele kau fi wolela.

Oshili: Nonande embo lEhololo oli na omivalu dimwe dopafaneko, oli na yo dimwe dokondadalunde dihe fi dopafaneko. Pashihopaenenwa, ola popya “omadina 12 ovayapostoli 12 vOdjona.” (Ehololo 21:14) Tala kouyelele oo tau ku kwafele u fike pexulifodiladilo kutya omuvalu wo 144 000 owokondadalunde.

MEhololo 7:4 omwa popiwa “omuvalu waavo va didilikwa 144 000,” ile va hoololelwa omwenyo womeulu. Okudja eshi ovelishe oyo ya popya shi na sha naavo, eevelishe da ka shikula ko oda ka popya ongudu onhivali kutya: “ongudu inene ya nyengana okuvalwa.” Ovo ‘vongudu inene’ navo otava ka mona exupifo okudja kuKalunga. (Ehololo 7:9, 10) Ngeno omuvalu wo 144 000 owa li wopafaneko, ngeno omuvalu winya wa nyengana okuvalwa itau dulu vali okupopilwa pamwe naukwao. *

Shikwao vali, omuvalu wo 144 000 owa popiwa kutya owa “kulilwa movanhu ve li ngaashi oilikolomwa yotete.” (Ehololo 14:4) Outumbulilo “oilikolomwa yotete” otau ulike koinima inini ya hoololwa. Otau hokolola lela ovo tava ka pangela meulu pamwe naKristus, eshi tava ka pangela ovapangelwa va nyengana okuvalwa. — Ehololo 5:10.

^ okat. 16 Sha faafana, Omunawino Robert L. Thomas okwa shanga shi na sha nomuvalu wo 144 000 oo wa popiwa mEhololo 7:4 a ti: “Omuvalu oo owokondadalunde moku u yelekanifa naawinya itau dulu okuvalwa oo u li mEhololo 7:9. Ngeenge omuvalu oo owa talika ko wopafaneko, kape na vali onomola membo tai dulu okutalika ko yokondadalunde.” — Ehololo 1-7: An Exegetical Commentary, epandja 474.