Onhumwafo kOvafilippi 3:1-21
3 Ovamwatate, twikileni okukala mwa hafa, molwaashi omwa hangana nOmwene.+ Itandi loloka oku mu shangela oinima oyo nde mu shangela nale, molwaashi oshi li eameno leni.
2 Lungameni eembwa; lungameni ovo hava etifa oiponga; lungameni ovo hava ehameke ombelela.+
3 Osheshi fye otwa pita etanda lashili,+ ovo hatu longo oilonga iyapuki kekwafo lomhepo yaKalunga nohatu litangele Kristus Jesus+ noinatu tula elineekelo letu moinima yopambelela,
4 nonande ame, ile ope na umwe e na omatomheno okulitangela oinima yopambelela.
Ngeenge ope na umwe ta diladila kutya oku na omatomheno okulineekela moinima yopambelela, ame ondi na mahapu:
5 onda pita etanda mefiku etihetatu,+ nda dja moshiwana shOvaisrael, nda dja mepata laBenjamin, Omuheberi nda dalwa kOvaheberi;+ handi diinine omhango, Ndimufarisai;+
6 ndimuladi, handi hepeke eongalo;+ handi diinine ouyuki oo u li momhango, nda ulika kutya kandi na oshipo.
7 Ashike nande ongaho, oinima oyo nda li nda likola, paife onde i tala ko ya kana* omolwaKristus.+
8 Nandi tye vali shike, onda tala ko yo oinima aishe ya kana omolweshiivo la denga mbada li na sha naKristus Jesus, Omwene wange. Osheshi omolwaye onda kanifa oinima aishe nonde i tala ko ngaashi oimbodi* yongaho, opo ndi likole Kristus
9 nondi talike ko ndi li omushikuli waye. Itandi ti kutya ame omuyuki, molwaashi handi dulika kOmhango, ndele omolwaashi ndi na eitavelo+ muKristus.+ Ovo ve na eitavelo muKristus, Kalunga okwe va tala ko ovayuki.+
10 Onda hala okushiiva Kristus nokushiiva eenghono odo de mu nyumuna koufi,+ okumona oixuna+ nokufya ngaashi ye,+
11 opo ndi tale ngeenge ohandi mono omhito menyumuko lotete.+
12 Hakutya ngeno onde li mona nale, ile onda fikifwa nale mewaneneno, ndele ohandi kendabala nda mana mo,+ ndi tale ngeenge handi li kwata, osheshi olo Kristus Jesus a hoololela nge.*+
13 Ovamwatate, ame inandi litala ko nda fa nda mona ondjabi, ndele ope na oshinima shimwe handi longo: Ohandi lalakanene okuhanga oinima yokomesho+ nohandi dimbwa ei yokonima.+
14 Ohandi kendabala nda mana mo, opo ndi ka mone ondjabi+ oyo Kalunga ta ka yandja kwaavo a ifanena meulu+ okupitila muKristus Jesus.
15 Onghee hano atusheni ovo twa pyokoka pamhepo+ natu diladileni metwokumwe noinima oyo nde mu lombwela, ndele ngeenge hasho hamu diladila ngaho, Kalunga ote ke mu kwafela mu diladile metwokumwe noinima oyo.
16 Kakele kaasho, ngaashi twa kala nokuninga exumokomesho, natango natu twikileni okweenda mondjila imwe.
17 Ovamwatate, ningeni ovahopaeneni vange+ nokutala kwaavo hava ende metwokumwe noshihopaenenwa osho twe mu tulila po.
18 Ndele ngaashi nde mu lombwela nale, ohandi mu lombwele vali nda nyika oluhodi kutya ope na ovanhu vahapu ovo ve li ovatondi vomuti womahepeko* waKristus.
19 Exulilo lavo ehanauno, edimo lavo olo kalunga kavo, efimano lavo ohoni yavo; nohava diladila oinima yokombada yedu.+
20 Ashike oukwashiwana wetu+ ou li meulu,+ notwa teelela nodjuulufi omuxupifi tadi oko, Omwene Jesus Kristus,+
21 oo ta ka shitulula omalutu etu oo e na ounghundi a kale ngaashi* olutu laye loshinge+ keenghono daye dinene odo de mu ningifa a tule oinima aishe koshi yepangelo laye.+
