Onhumwafo kOvafilippi 2:1-30
2 Ngeenge ope na etwomukumo lasha muKristus, ngeenge ope na ehekeleko lopahole lasha, ngeenge ope na omhepo youkumwe* yasha, ngeenge ope na ohole ya xwama nolukeno lasha,
2 hapupalifeni ehafo lange mokukala hamu diladila monghedi ya faafana nomu na ohole ya faafana, mwa hangana filufilu,* mu na ediladilo limwe.+
3 Inamu ninga sha omolweenhamanana,+ ile molwounhwa,+ ndele omolwelininipiko,* kaleni hamu tale ko vakweni ve mu dule.+
4 Inamu lalakanena ashike ouwa weni vene,+ ndele lalakaneneni yo ouwa wavakweni.+
5 Kaleni hamu diladila nokulihumbata ngaashi Kristus Jesus,+
6 oo nonande okwa li a fa Kalunga,+ ka li nokuli a diladila a kendabale a kale e fike puKalunga.+
7 Mepingafano naasho, okwa efa po aishe oyo a li e na nokwa ninga omunhu*+ e li ngaashi omupika.+
8 Kakele kaasho, eshi e uya e li omunhu,* okwe lininipika ye mwene nokwa kala ha dulika fiyo omefyo,+ heeno, efyo komuti womahepeko.*+
9 Onghee hano Kalunga okwe mu lenga, eshi e mu pa ondodo yopombada elela,+ nokwe mu luka edina li dule omadina aeshe,+
10 opo keshe shimwe kutya nee omeulu, ile okombada yedu, ile okoshi yedu shi twe eengolo okupitila medina laJesus,+
11 opo omunhu keshe* a hepaulule moipafi kutya Jesus Kristus oye Omwene,+ nopo Kalunga Xe a fimanekwe.
12 Ovamwatate ovaholike, ngaashi hamu dulika alushe ngeenge ndi li mokati keni naunene tuu ngeenge ndihe po, twikileni okulonga noudiinini, tamu shi ningi nokutila nokukakama, opo mu ka xupifwe.
13 Osheshi Kalunga oye te mu pameke, te mu pe eenghono noku mu kwafela mu kale mwa hala okulonga ehalo laye.
14 Kaleni hamu ningi oinima aishe nopehe na okungongota+ nokutanguna,+
15 opo mu kale mwa koshoka nomuhe na edilo lasha, ngaashi ovana vaKalunga+ ovo vehe na edilo lasha mokati kepupi eli la nyonauka nola pilalala,+ omo mu li tamu vilima ngaashi eenyofi mounyuni.+
16 Kaleni mwa diinina eendjovo odo tadi mu pefa omwenyo,+ opo ndi kale nda hafa mefiku laKristus, molwaashi ondi shi shii kutya inandi tondoka epwanga noinandi longa noudiinini oshimha.
17 Nonande ohandi tilwashi ngaashi oshikunwayambo+ keyambo+ naashi handi yambidida oshilonga shiyapuki,* onda hafa unene pamwe nanye amushe, molwaashi eitavelo leni ole mu linyengifa mu kufe ombinga musho.
18 Sha faafana, nanye hafeni nokunyakukwa pamwe naame.
19 Ndele molwaashi onde lineekela Omwene Jesus, ohandi mu tumine diva Timoteus,+ opo ndi uye ndi tuwe omukumo ngeenge okwa lombwele nge kombinga yeni.
20 Nghi wete pe na vali umwe e na omaukwatya a fa aye ou ta dulu oku mu fila oshisho.
21 Osheshi aveshe ohava lalakanene ouwa wavo vene, ndele hauwa waJesus Kristus.
22 Ndele ngaashi mu shi shii, Timoteus okwa ulika kutya hasho e li ngaho, molwaashi otwa longa pamwe naye ngaashi omona+ e li naxe mokutandavelifa onghundana iwa.
23 Onghee hano oye nde lineekela nohandi mu tumu diva ngeenge nda mono kutya oshike handi ka ningilwa.
24 Ondi na elineekelo mOmwene kutya naame yo ohandi ke uya kunye diva.+
25 Ndele paife ondi wete sha yuka oku mu tumina omumwatate Epafroditus, oo e li omulongi pamwe naame, omukwaita mukwetu noku li omutumwa oo hamu tumu e uye a yakule nge,+
26 molwaashi okwe mu djuulukwa amushe nokwa polimana, eshi mwa uda kutya okwa li ta vele.
27 Okwa li ta vele unene, hanga a fya nokuli, ndele Kalunga okwe mu fila onghenda. Ashike haye aeke a fila onghenda, ndele naame yo, opo oluhodi lange liha wedelwe.
28 Onghee hano ohandi mu tumu meendelelo kunye, opo ngeenge mwa monafana mu hafe natango, naame opo ndiha kale noshisho.
29 Mu tambulei ko nomutima aushe ngaashi hamu shi ningile ovashikuli vOmwene. Kaleni yo mwa fimaneka ovalumenhu ngaashi ye,+
30 molwaashi hanga a fye omolwokuyakula Kristus,* a tula omwenyo waye moshiponga, opo a yakule nge ponhele yeni, shaashi katu lyeni pamwe.+
Omashangelo opedu
^ Eln., “mu na omhepo imwe.”
^ Ile “mwa tulwa kumwe momwenyo.”
^ Ile “omolwelixupipiko.”
^ Eln., “nokwe uyile molupe lopanhu.”
^ Eln., “eshi a li molupe lopanhu.”
^ Tala Omafatululo oitya.
^ Eln., “elaka keshe.”
^ Ile “oshilonga shokuyakula.”
^ Ile tashi dulika, “omolwoilonga yOmwene.”
