Evaengeli paLukas 12:1-59

  • Efulika lOvafarisai (1-3)

  • Tila Kalunga, ndele havanhu (4-7)

  • Okuhepaulula Kristus (8-12)

  • Efaneko lomulumenhu oshipuna ehe na eendunge (13-21)

  • Inamu kala noshisho (22-34)

    • Okangudu kanini (32)

  • Okukala oupafi (35-40)

  • Omukeleli omudiinini nomukeleli ehe fi omudiinini (41-48)

  • Hambili, ndele etukauko (49-53)

  • Otwa pumbwa okunongonona omafimbo (54-56)

  • Okupongolola po okuhaudafana (57-59)

12  Pefimbo opo tuu opo, eshi ongudu yovanhu omayovi mahapu ya li ya ongala notai lifininike mumwe, Jesus okwa hovela okulombwela tete ovahongwa vaye ta ti: “Lungameni efulika lOvafarisai, sha hala okutya oihelele.+ 2  Ndele kaku na osho sha tuvikwa nawa itashi ka hololwa, nokaku na oshiholekwa itashi ka shiivika.+ 3  Onghee hano keshe osho tamu popi momilaulu otashi ka udika mouyelele, naasho tamu nongofola momaumbo eni otashi ka udifwa moipafi yaaveshe. 4  Ohandi mu lombwele ookaume kange,+ inamu tila ovo tava dipaa olutu, ndele kave na vali eshi tava dulu okuninga po.+ 5  Ndele ohandi mu lombwele ou mu na okutila: Tileni Ou e na eenghono dokudipaa nokuumbila muGehenna.*+ Ohandi mu lombwele, Ou oye mu na okutila.+ 6  Mbela oiyandja itano ihai landwa noupeni vavali* vongushu inini? Ashike kape na nande oshimwe hashi dimbiwa* kuKalunga.+ 7  Ndele nokuli neexwiki adishe dokomitwe deni oku shii omuvalu wado.+ Hano inamu tila; nye omwa fimana unene mu dule oiyandja ihapu.+ 8  “Ohandi mu lombwele, keshe ou ta hepaulula nge moipafi yovanhu,+ nOmona womunhu ote ke mu hepaulula yo moipafi yovaengeli vaKalunga.+ 9  Ashike ou te lidimbike nge moipafi yovanhu, naame ohandi ke mu lidimbika moipafi yovaengeli vaKalunga.+ 10  Keshe ou ta popile mowii Omona womunhu, ota diminwa po, ndele keshe ou ta sheke omhepo iyapuki ita diminwa po.+ 11  Ngeenge tave mu twala moyoongalele* nokovapangeli, inamu kala mu na oshisho kutya otamu ka tya ngahelipi, ile otamu ka popya shike, opo mu lipopile,+ 12  osheshi omhepo iyapuki otai ke mu pa pefimbo opo osho mu na okupopya.”+ 13  Ndele umwe womongudu oyo okwa tya kuye: “Muhongi, lombwela omumwamememati tu tukule naye efyuululo.” 14  Jesus okwa tya kuye: “Mulumenhu ove, olyelye a tula nge po ndi ninge omutokoli, ile omutukuli wefyuululo leni nye vavali?” 15  Opo nee okwa tya kongudu yovanhu: “Kaleni oupafi nokulungamena olwisho* keshe,+ osheshi nonande omunhu oku kale e na eliko lihapu, halo tali mu kaleke nomwenyo.”+ 16  Okwe va lombwela efaneko limwe a ti: “Opa li omulumenhu umwe oshipuna oo a li e na epya la dala nawa. 17  Opo nee okwa hovela okulipopila ta ti: ‘Ondi na okuninga po shike shi na sha noilikolomwa yange, osheshi kandi na apa handi i tula?’ 18  Okwa ti, ‘Ohandi ningi ngaha:+ Ohandi hanauna po omaanda ange, handi tungu amwe manene, ndele handi tuvikile mo oilya noinima yange aishe. 19  Opo nee onde lipopila* nda ti: “Owa* tuvikililwa oinima ihapu notai kwata omido dihapu; onghee ino lipula nasha, lya, nwa nokuhafela onghalamwenyo.”’ 20  Ndele Kalunga okwa tya kuye, ‘Elai ove, omwenyo woye oto u kufwa oufiku wonena. Mbela oinima oyo wa tuvikila otai ningi yalyelye?’+ 21  Osho osho tashi ningilwa omunhu oo te lituvikilile emona, ashike ke na emona kuKalunga.”+ 22  Ndele Jesus okwa tya kovahongwa vaye: “Onghee ohandi mu lombwele, efeni po okukala mu na oshisho shi na sha nokukalamwenyo kweni* kutya otamu li shike, ile kutya otamu djala shike.+ 23  Osheshi omwenyo owa fimana u dule oikulya, nolutu ola fimana li dule oikutu. 24  Taleni komakola: Ihaa kunu noihaa teya; kae na omaanda, ashike Kalunga ohe a palula.+ Mbela inamu fimana unene mu dule oudila?+ 25  Olyelye womunye ta dulu okuweda ko nande oludimbo* limwe kokukalamwenyo kwaye mokukala e na oshisho? 26  Hano ngeenge otamu nyengwa kokanima oko kanini, omolwashike mu na okukala noshisho naikwao?+ 27  Taleni nghee eengala hadi kulu: Ihadi hodile noihadi hondjo, ndele ohandi mu lombwele, nokuli naSalomo moshinge shaye ashishe ka djalele ngaashi imwe yomudo.+ 28  Ngeenge Kalunga oha dike oimeno yomoixwa oyo i li po ashike nena, ndele mongula oya ekelwa mediko, mbela ite ke mu dika shi dulife po nye ovo mu na eitavelo linini? 29  Onghee hano efeni po okulipula naasho tamu li nosho yo osho tamu nu, nokweefa po okukala mu na oshisho sha pitilila,+ 30  osheshi ovanhu vomoiwana imwe i lili ohava lalakanene neenghono oinima aishe oyo. Ndele Xo yeni oku shi shii kutya omwa pumbwa oinima oyo.+ 31  Ponhele yaasho, twikileni okukonga Ouhamba waye, noinima aishe ei otamu ke i wedelwa ko.+ 32  “Ino tila okangudu ove kanini,*+ osheshi Xo okwa halelela oku mu pa Ouhamba.+ 33  Landifeni po oinima yeni aishe, ndele tamu yandje eeshalinghenda.*+ Liningileni eendjato doimaliwa ihadi kulupa, sha hala okutya emona lomeulu olo itali xulu po,+ omo eembudi neenhwishi ihadi dulu okuya mo. 34  Osheshi oko ku na emona loye oko yo ku na omutima woye. 35  “Kaleni mwa djala nomwe lilongekida,*+ neelamba deni nadi kale da tema,+ 36  ngaashi ovanhu va teelela omwene wavo a aluke+ kehombolo,+ opo ngeenge te uya, ndele ta konghola, otave mu yeulula diva. 37  Ovo tava kala va hafa ovapiya ovo tava hangika ve li oupafi komwene wavo. Oshili, ohandi mu lombwele, ye ota djala oikutu* a yakule, ndele te va lombwele va kale omutumba poshitaafula, opo nee te uya puvo e va yakule. 38  Ngeenge okwe uya okudja penangelo etivali,* nokuli nonande openangelo etitatu,* ndele ta hange ve lilongekida, otava kala va hafa. 39  Ndele shiiveni eshi, ngeno mwene weumbo okwa li e shii kutya ombudi otai uya potundi onhingapi, ngeno ita efa eumbo laye li teywe.+ 40  Nanye yo kaleni mwe lilongekida, osheshi Omona womunhu ote uya povili oyo tashi dulika inamu diladila.”+ 41  Ndele Petrus okwa tya: “Omwene, ofye atuke to lombwele efaneko eli, ile oto li lombwele yo ovanhu aveshe?” 42  Opo nee Omwene okwa ti: “Olyelye hano omukeleli* omudiinini nomunaendunge, oo omwene waye e mu nangeka po a pashukile ovapiya* vaye noku va pa eendja da wana pefimbo la wapala?+ 43  Omupiya oo ita ka kala tuu a hafa, ngeenge omwene waye okwe mu hange ta ningi ngaho! 44  Ohandi mu lombwele oshili, ote ke mu nangeka po a pashukile oinima yaye aishe. 45  Ashike ngeenge omupiya oo okwe lipopile momutima waye ta ti, ‘Omwene wange okwa kala ko,’ nokuhovela okudenga ovapiya vakwao, ndele ta li nokunwa nokukolwa,+ 46  omwene waye ote ke uya mefiku olo ine mu teelela nopovili oyo ehe shii, note ke mu handukila nehandu linene, ndele te mu tula kongudu yaavo vehe fi ovadiinini. 47  Omupiya oo e shii ehalo lomwene waye, ndele ite lilongekidile okuuya kwaye, ile ita longo osho a teelelwa a longe,* ota ka dengwa omadengo mahapu.+ 48  Ndele omupiya ou ehe shii ehalo lomwene waye nokwa longa sha shoku mu dengifa, ota dengwa omadengo manini. Keshe ou a pewa shihapu ota ka pulwa shihapu, naau a tulwa po a pashukile shihapu ota ka pulwa shihapu unene.+ 49  “Onde uyile okuxwameka omundilo kombada yedu, ndele ngeenge omundilo owa tema nale, oshike vali ndi na okuninga? 50  Ondi na eninginifo olo handi ninginifwa nalo, ndele onda nyika oluhodi fiyo osheshi la pwa.+ 51  Mbela otamu diladila kutya onde uya okweeta ombili kombada yedu? Ahawe, ohandi mu lombwele, onde uya okweeta etukauko.+ 52  Okudja paife, momaumbo otamu ka kala etukauko. Ngeenge omu na ovanhu vatano, vatatu otava ka pataneka vavali, navavali otava ka pataneka vatatu. 53  Otava ka kala va tukauka; xe ota pataneke omonamati, nomonamati ota pataneke xe, ina ota pataneke omonakadona, nomonakadona ota pataneke ina, inamweno ota pataneke oshitenya shomukainhu, noshitenya shomukainhu otashi pataneke inamweno.”+ 54  Okwa tya vali keengudu dovanhu: “Ngeenge omwa mono omwaamba u li kouninginino, ohamu ti, ‘Otaku di oshikungulu shodula,’ naasho osho hashi ningwa. 55  Ndele ngeenge omwa mono omhepo tai pepe okudja kolukadi ohamu ti, ‘Otaku ka kala kwa pupyala unene,’ naasho osho hashi ningwa. 56  Ovanaihelele nye, omu shii okunongonona onghalo yomhepo yeulu noyedu, ndele omolwashike muhe shii okunongonona eityo laasho tashi ningwa pefimbo eli?+ 57  Omolwashike ihamu tokola nye vene osho sha yuka? 58  Pashihopaenenwa, ngeenge tamu i komupangeli nye nomutamaneki woye, pongololeni po okuhaudafana pokati keni fimbo mu li mondjila, opo ehe ku yandje momake omupanguli, nomupanguli ehe ku twale komupiya womomhangu, ndele omupiya womomhangu te ku tula modolongo.+ 59  Ohandi ku lombwele, ito ka dja mo nandenande fiyo osheshi wa futa oimaliwa aishe oyo u na.”*

Omashangelo opedu

^ Eln., “nee-assarion mbali.” Tala Oshiw. B14.
^ Ile “inashi fimana.”
^ Ile tashi dulika, “moinagoga.”
^ Ile “efukutu.”
^ Ile “onda lombwela omwenyo wange.”
^ Ile “Omwenyo ove, owa.”
^ Ile “shi na sha neemwenyo deni.”
^ Eln., “oufita ove munini weedi.”
^ Ile “eeshali keehepele.” Tala Omafatululo oitya.
^ Eln., “Oiya yeni nai kale ya mangwa.”
^ Ile “ote limange.”
^ Okudja 9:00 wokonguloshi lwaapo fiyo omokati koufiku.
^ Okudja mokati koufiku fiyo 3:00 yokeengulasha lwaapo.
^ Ile “omupashukili weumbo.”
^ Ile “ovapiya vomeumbo.”
^ Ile “metwokumwe nehalo lomwene waye.”
^ Eln., “okahaulapa kaxuuninwa.” Tala Oshiw. B14.

Oufemba u na sha noumwene woshishangomwa eshi