Evaengeli paLukas 16:1-31
16 Ndele Jesus okwa lombwela yo ovahongwa ta ti: “Opa li omulumenhu oshipuna e na omupiya* oo a li ta lundilwa kutya ota longifa nai oinima yaye.
2 Oshipuna osho oshe mu ifana, ndele tashi ti, ‘Oshike eshi ndi udite kombinga yoye? Eta omukanda u na sha nanghee wa longifa oimaliwa yange, osheshi ito kala vali omupashukili weumbo lange.’
3 Opo nee omupiya oo okwe lipopila ta ti, ‘Ondi na okuninga po shike, eshi omwene wange a kufa nge oshinakuwanifwa shokukala omupashukili? Itandi dulu oilonga yomepya nonda fya ohoni oku ka ehela.
4 Ai! Ondi shii kutya ohandi ningi po shike, opo ovanhu va ka tambule nge momaumbo avo, ngeenge onda kufwa oshinakuwanifwa shokukala omupashukili.’
5 Opo nee okwa ifana keshe oo e na oikolo yomwene waye, ndele ta ti kwaau wotete, ‘Ou na oikolo yomwene wange i fike peni?’
6 Okwa nyamukula a ti, ‘Oiyelekifo* efele yomaadi eemono.’ Omupiya okwa tya kuye, ‘Kufa omukanda woye weudafanotwokumwe, kala omutumba, ndele to shange po divadiva 50.’
7 Natango, okwa tya kumukwao, ‘Ove ou na oikolo i fike peni?’ Okwa ti, ‘Oiyelekifo ya kula efele* yoilya yo-wheat.’ Omupiya oo okwa tya kuye, ‘Kufa omukanda woye weudafanotwokumwe, ndele to shange po 80.’
8 Ndele molwaashi omupiya oo okwa li a katuka pandunge,* omwene waye okwa li e mu pandula, nonande ka li ha longo ouyuki. Osheshi ovana vonghalelo ei yoinima* ohava ungaunga pandunge nepupi lavo ve dule ovana vouyelele.+
9 “Ohandi mu lombwele yo kutya: Likongeleni ookaume nemona loulunde,+ opo ngeenge ola xulu po, ve mu tambule meenhele daalushe.+
10 Omunhu ou omudiinini moinima inini, omudiinini yo nomwaai ihapu, ndele ou ehe fi omudiinini moinima inini, ke fi yo omudiinini nomwaai ihapu.
11 Onghee hano ngeenge ihamu ulike oudiinini weni shi na sha nemona loulunde, olyelye te ke mu lineekelela eli lashili?
12 Ndele ngeenge ihamu ulike oudiinini mokuungaunga noinima yavamwe, olyelye te ke mu pa osho mwa tuvikililwa?+
13 Kape na omupiya ta dulu okulongela oovene vavali, osheshi ota tondo umwe, ndele ta kala e hole mukwao, ile ta kanyatele kuumwe, ndele ta dini mukwao. Itamu dulu okulongela Kalunga pamwe nemona.”+
14 Ndele Ovafarisai ovo va li ve hole oimaliwa ova li tava pwilikine koinima aishe oyo Jesus a li ta popi, nova li va hovela oku mu sheka.+
15 Opo nee okwa tya kuvo: “Nye ohamu limonikifa ovayuki moipafi yovanhu,+ ashike Kalunga oku shii osho shi li momitima deni.+ Osheshi osho ovanhu va tala ko sha fimana, kuKalunga oshongaho elela.+
16 “Omhango nOvaprofeti ova xulila muJohannes. Ndele okudja opo, onghundana iwa yOuhamba waKalunga otai udifwa, novanhu vomaludi aeshe otava ningi eenghendabala va ye mOuhamba oo.+
17 Eulu nedu otai dulu okuxula po, ndele mOmhango itamu di nande okapambu kamwe kondada inaka wanifwa.+
18 “Keshe ou ta teya ohombo nomukulukadi waye, ndele ta hombola umwe ota haele, naau ta hombola omukainhu oo a teya ohombo nomushamane waye, ota haele.+
19 “Opa li omulumenhu umwe oshipuna oo a li ha djala oikutu yoluvala lipeepela noyoliina nokwa kala ta hafele onghalamwenyo youdjeko.
20 Ndele omweeheli umwe wedina Lasarus okwa li ha tulwa poshivelo shoshipuna osho, nokwa li e na oipute olutu laye alishe.
21 Okwa li ha kala a hala okulya oundjaumukile ovo tava u koshitaafula shoshipuna osho. Nokuli neembwa oda li hadi uya di lafe oipute yaye.
22 Mokweendela ko kwefimbo, omweeheli okwa ka fya, ndele ta twalwa kovaengeli polwamba laAbraham.*
“Oshipuna nasho osha ka fya, ndele tashi pakwa.
23 Ndele eshi sha li mOmbila* tashi ehama, osha yelula omesho asho, nosha mona Abraham e li kokule, na Lasarus e li polwamba laye.*
24 Onghee oshipuna osha ingida sha ti, ‘Tate Abraham, file nge onghenda, nou tume Lasarus a yaveke omunwe waye momeva a talaleke nge kelaka, osheshi ohandi luluma unene momundilo ou wa hanya.’
25 Opo nee Abraham okwa ti, ‘Omumwange, dimbuluka kutya ove owa li u yadi oinima iwa monghalamwenyo yoye, ashike Lasarus okwa kala ta mono oixuna. Ndele paife oku li apa ta hekelekwa, ofimbo ove u li mouyehame.
26 Kakele kaasho, ope na elambo lile pokati ketu nanye, opo ovo ve li kufye va hala okuuya kunye vaha dule oku shi ninga, naavo ve li kunye vaha dule okuuya kufye.’
27 Oshipuna osha ti, ‘Ngeenge osho shi li ngaho, ohandi ku indile tate, u mu tume keumbo latate,
28 osheshi ondi na ovamwamememati vatano, e ke va londwele, opo vehe uye yo monhele ei youyehame.’
29 Ndele Abraham okwa ti, ‘Ove na omishangwa daMoses nodOvaprofeti; odo nava pwilikine kudo.’+
30 Opo nee oshipuna osha ti, ‘Ahawe tate Abraham, ngeenge okwa i umwe a nyumuka koufi, otave ke lidilulula.’
31 Abraham okwa tya kuye, ‘Ngeenge itava pwilikine komishangwa daMoses+ nodOvaprofeti, itava ka itavelifwa yo komunhu ou a nyumuka koufi.’”
Omashangelo opedu
^ Ile “omupashukili weumbo.”
^ Ile “Oiyelekifo yobata.” Obata imwe oi fike peelita 22. Tala Oshiw. B14.
^ Ile “Oiyelekifo yokori efele.” Okori imwe oi fike peelita 220. Tala Oshiw. B14.
^ Ile “a katuka nounongo; a katuka nelungi.”
^ Ile “veedula edi.” Tala Omafatululo oitya.
^ Eln., “mekolo laAbraham.”
^ Ile “mo-Hades,” sha hala okutya, koufi. Tala Omafatululo oitya.
^ Eln., “mekolo laye.”
