Evaengeli paLukas 9:1-62

  • Omulongo navavali tava pewa omalombwelo e na sha noilonga yokuudifa (1-6)

  • Herodes a limbililwa Jesus (7-9)

  • Jesus ta palula ovalumenhu 5 000 (10-17)

  • Petrus a didilika mo Kristus (18-20)

  • Efyo laJesus la xunganekwa (21, 22)

  • Omuhongwa washili (23-27)

  • Jesus ta lunduluka (28-36)

  • Omumati e na ondemoni ta velulwa (37-43a)

  • Efyo laJesus la xunganekwa vali (43b-45)

  • Ovahongwa tava tu eemhata kutya olyelye munene (46-48)

  • Ou ehe li omhinge nafye oku li kombinga yetu (49, 50)

  • Jesus ina tambulwa ko momukunda wOvasamaria (51-56)

  • Nghee ve na okushikula Jesus (57-62)

9  Jesus okwa ifana ovayapostoli vaye omulongo navavali, ndele te va pe eenghono nosho yo eenghonopangelo dokuta mo eendemoni+ nokuvelula omikifi.+ 2  Opo nee okwe va tuma va ka udife kombinga yOuhamba waKalunga nokuvelula ovanaudu. 3  Ndele okwa tya kuvo: “Inamu ya nasha mondjila, kutya nee onodibo, ile onondjato yoikulya, ile onomungome, ile onoimaliwa,* ile onoikutu ivali.*+ 4  Shimha mwa tambulwa meumbo lonhumba, kaleni mo fiyo osheshi mwa dja mo moshilando osho.+ 5  Ndele ngeenge ovanhu inave mu tambula, eshi tamu di mo moshilando osho, pupuleni ondwi keemhadi deni shi kale oumbangi kuvo.”+ 6  Opo nee ova ya momikunda tava udifa onghundana iwa keshe pamwe nokuvelula ovanaudu.+ 7  Ndele Herodes,* omupangeli woshitukulwalongo,* okwa uda ashishe osho sha ningwa po, nokwa li a limbililwa unene, molwaashi vamwe ova li tava ti kutya Johannes oye a nyumuka koufi,+ 8  vamwe ova li tava ti kutya oElia a aluka, ofimbo vamwe va li tava ti kutya oumwe womovaprofeti vonale a nyumuka.+ 9  Herodes okwa ti: “Johannes onde mu tetifa omutwe.+ Hano olyelye ndi udite ta popiwa ta ningi oinima ya tya ngaha?” Onghee okwa li a hala oku mu mona.+ 10  Eshi ovayapostoli va aluka, ova hokololela Jesus ashishe osho va longa.+ Opo nee okwa dja po navo, ndele tava i ve ke likalele koshilando shedina Betsaida.+ 11  Ashike eengudu dovanhu, eshi de shi uda, ode mu shikula. Opo nee okwe di tambula ko nohamu, ndele ta hovele oku di lombwela kombinga yOuhamba waKalunga, nokuvelula ovo va li tava vele.+ 12  Eshi taku toko, ovayapostoli omulongo navavali ove uya kuJesus, ndele tava ti kuye: “Lekela ongudu yovanhu, opo i ye momikunda odo di li popepi i ke likongele oikulya naapa tai ka nangala, molwaashi otu li ponhele ye likalela.”+ 13  Okwa tya kuvo: “Va peni sha shokulya.”+ Opo nee ova tya: “Otu na po ashike omingome nhano neeshi mbali, okuninga shapo hatu i tu ka landele ovanhu aveshe ovo oikulya.” 14  Ndele opa li ovalumenhu 5 000 lwaapo. Opo nee okwa tya kovahongwa vaye: “Va lombweleni va kale omutumba paengudu; keshe ongudu ovanhu 50 lwaapo.” 15  Ova ninga ngaashi va lombwelwa, novanhu aveshe ova kala omutumba. 16  Jesus okwa kufa omingome nhano neeshi mbali, nokwa tala keulu, ndele ta ilikana. Opo nee okwe di pambula, ndele te di pe ovahongwa ve di yandje kongudu yovanhu. 17  Onghee aveshe ova lya nova kuta, nova toola po oundjaumukile vomingome, oimbale 12.+ 18  Lwanima, fimbo Jesus a li oye aeke ta ilikana, ovahongwa ove uya kuye, ndele te va pula ta ti: “Eengudu dovanhu ohadi ti aame lyelye?”+ 19  Ova nyamukula tava ti: “OJohannes Omuninginifi, ashike vamwe ohava ti oElia, navakwao vali ohava ti oumwe womovaprofeti vonale a nyumuka.”+ 20  Opo nee okwa tya kuvo: “Ndele nye ohamu ti aame lyelye?” Petrus okwa nyamukula ta ti: “Oove Kristus waKalunga.”+ 21  Ndele Jesus okwe va kunghilila vehe shi lombwele nande omunhu.+ 22  Okwe va lombwela ta ti: “Omona womunhu ota ka hepekwa nonyanya noita ka tambulwa ko kovakulunhu, kovapristeri ovakulunhu nokovanongo vomishangwa nokudipawa,+ nomefiku etitatu ota ka nyumunwa.”+ 23  Ndele okwa tya kwaaveshe: “Ngeenge oku na ou a hala okushikula nge, ne lixupule ye mwene+ nokuhumbata omuti waye womahepeko* efiku keshe, ndele ta kala nokushikula nge.+ 24  Keshe ou a hala okuxupifa omwenyo waye ote u kanifa, ndele keshe ou ta kanifa omwenyo waye omolwange ote u xupifa.+ 25  Otashi kwafa shike ngeenge omunhu okwe lilikolele ounyuni aushe, ndele ta kanifa omwenyo waye, ile a nyone po onghalamwenyo yaye?+ 26  Keshe ou ta fi nge ohoni nosho yo eendjovo dange, Omona womunhu ote ke mu fya ohoni, eshi te uya moshinge shaye, shaXe noshovaengeli vayapuki.+ 27  Ashike oshili, ohandi mu lombwele, ope na vamwe vomwaava ve li ofika apa itava ka makela nandenande efyo, fiyo osheshi tava mono tete Ouhamba waKalunga.”+ 28  Konima yomafiku ahetatu okudja eshi a popya eendjovo odo, okwa ya pamwe naPetrus, Johannes naJakob, ndele tava londo komhunda va ka ilikane.+ 29  Fimbo a li ta ilikana, oshipala shaye osha shituluka noikutu yaye oya li tai vilima. 30  Ndele tala! ovalumenhu vavali ova li tava kundafana naJesus; ova li Moses naElia. 31  Ovalumenhu ovo ova li va holoka moshinge nova li va hovela okupopya kombinga yokuya kwaJesus, osho sha li tashi ka ningilwa kuJerusalem.+ 32  Ndele Petrus naavo va li pamwe naye ova li va kwatwa keemhofi didjuu, eshi va penduka ova mona oshinge shaJesus+ novalumenhu vavali ve li ofika naye. 33  Eshi ovalumenhu ovo va li pokudja po puye, Petrus okwa tya kuJesus: “Omuhongi, osha wapala kufye okukala apa. Onghee natu dikeni omatwali atatu apa, limwe oloye, limwe olaMoses nalikwao olaElia.” Petrus ka li e shii kutya ota popi shike. 34  Ofimbo Petrus a li ta popi eendjovo odo, opa holoka oshilemo nosha hovela oku va tuvikila. Eshi tava tuvikilwa koshilemo, ova li va tila. 35  Opo nee ondaka+ oya dja moshilemo tai ti: “Ou Omona wange, oo a hoololwa.+ Pwilikineni kuye.”+ 36  Eshi va uda ondaka oyo, ova ka mona ashike Jesus e li po oye aeke. Ndele ova kala ve shi mwenena noinava lombwela nande oumwe kombinga yaasho va mona pefimbo olo.+ 37  Mefiku la landula ko, fimbo va li tava di komhunda, ova shakenekwa kongudu inene yovanhu.+ 38  Ndele tala! omulumenhu umwe womongudu oyo okwa ingida ta ti: “Muhongi, ohandi ku indile u kwafele* omonamati wange, molwaashi oye aeke ndi na.+ 39  Ndele tala! omhepo ya nyata ohai mu kame, noha hovele okukwena; ohai mu denge pedu, ndele ta tutumike onhutu kokanya, noihai mu efa diva fimbo inai mu ehameka. 40  Onda indila ovahongwa voye ve i te mo, ashike kava li tava dulu.” 41  Jesus okwa nyamukula a ti: “Akutu! epupi eli lihe na eitavelo nola nyonauka,+ fiyo onaini ndi na okukala nanye noku mu lididimikila fiyo onaini? Eta omonamati woye oku.”+ 42  Fimbo omumati oo e li pokufika, ondemoni oye mu denga pedu noku mu kama neenghono. Opo nee Jesus okwa hanyena omhepo oyo ya nyata, ndele ta velula omumati noku mu shunifa kuxe. 43  Ndele aveshe ova li va kuminwa eenghono dinene daKalunga. Fimbo aveshe va li va kuminwa oinima aishe oyo a li ta longo, Jesus okwa tya kovahongwa vaye: 44  “Pwilikineni nawa nokudiinina eendjovo edi, osheshi Omona womunhu ota ka yandjwa momake ovanhu.”*+ 45  Ashike kava li ve udite ko osho a li ta ti. Oshoshili, osha li she va holekwa, opo vaha dule oku shi uda ko, nova li va tila oku mu pula kombinga yaasho a popya. 46  Ndele mokati kavo omwa tukuluka eemhata kutya olyelye munene e dule vakwao.+ 47  Eshi Jesus a shiiva osho va li tava diladila momitima davo, okwa kufa okaana, e ka kaleka ofika puye, 48  ndele ta ti kuvo: “Keshe ou ta tambula okaana aka medina lange, okwa tambula nge yo; nakeshe ou ta tambula nge, okwa tambula yo Ou a tuma nge.+ Osheshi keshe ou munini mokati keni oye munene e mu dule.”+ 49  Johannes okwa tya kuye: “Omuhongi, otwa mona umwe ta te mo eendemoni ta longifa edina loye, ndele otwa kendabala oku mu kelela, molwaashi iha ende pamwe nafye.”+ 50  Ndele Jesus okwa tya kuye: “Inamu kendabala oku mu kelela, osheshi keshe ou ehe li omhinge nanye oku li kombinga yeni.” 51  Eshi omafiku a li taa ehene popepi* Jesus a ye meulu,+ okwa li a tokola okuya kuJerusalem. 52  Ndele okwa tuma ovahongwa vaye ve mu tetekele komesho, opo nee ova ya momukunda wOvasamaria ve ke mu longekidile onhele. 53  Ashike Ovasamaria kava li ve mu tambula,+ molwaashi okwa li a tokola okuya* kuJerusalem. 54  Eshi ovahongwa vaye Jakob naJohannes+ ve shi mona, ova tya kuye: “Omwene, owa hala tu ifane omundilo meulu u va lungwinife po?”+ 55  Jesus okwa punguluka, ndele te va hanyene. 56  Opo nee ova ya komukunda umwe u lili. 57  Fimbo ve li mondjila, umwe okwa tya kuye: “Ohandi ke ku shikula keshe apa to i.” 58  Ashike Jesus okwa tya kuye: “Ookavandje ove na omikwena, needila dokeulu odi na oihadi, ndele Omona womunhu ke na apa ta tenheke omutwe waye.”+ 59  Ndele Jesus okwa lombwela vali umwe: “Ninga omushikuli wange.” Omulumenhu oo okwa tya: “Omwene, pitike nge manga ndi ye ndi ka pake tate.”+ 60  Opo nee Jesus okwa tya kuye: “Efa ovafi+ va pake ovafi vavo, ndele ove inda u ka udife Ouhamba waKalunga keshe pamwe.”+ 61  Ndele mukwao vali okwa tya: “Omwene, ohandi ku shikula, ashike pitike nge tete ndi ye ndi ka lekele vambuletu.” 62  Jesus okwa tya kuye: “Kape na omunhu ha kwata oshipululo, ndele ta tale konima+ ta wapalele Ouhamba waKalunga.”+

Omashangelo opedu

^ Eln., “onoisilveri.”
^ Ile “onoshikutu sha wedwa po.”
^ Sha hala okutya, Herodes Antipas. Tala Omafatululo oitya.
^ Eln., “omupangeli woshitine shoshilongo.”
^ Eln., “u tale.”
^ Ile “ota ka kengelelwa.”
^ Ile “a li pokufika.”
^ Eln., “oshipala shaye oshali sha taalela.”

Oufemba u na sha noumwene woshishangomwa eshi