Evaengeli paLukas 20:1-47
20 Efiku limwe fimbo Jesus a li ta hongo ovanhu motembeli nokuudifa onghundana iwa, ovapristeri ovakulunhu, ovanongo vomishangwa novakulunhu ove uya,
2 ndele tava ti kuye: “Tu lombwela, okeenghonopangelo dalyelye ho longo oinima ei? Ile olyelye e ku pa eenghonopangelo odo?”+
3 Okwe va nyamukula ta ti: “Ohandi ke mu pula yo epulo, nomu na okulombwela nge:
4 Eninginifo laJohannes ola dja meulu, ile omovanhu?”*
5 Opo nee ova fika pexulifodiladilo tava ti: “Ngeenge otwa ti, ‘Omeulu,’ ota ka tya, ‘Omolwashike hano inamu mu itavela?’
6 Ndele ngeenge otwa ti, ‘Omovanhu,’ ovanhu otave ke tu dipaa nomamanya, molwaashi aveshe ova li va itavela kutya Johannes okwa li omuprofeti.”+
7 Onghee ova nyamukula kutya kave shi shii kutya ola dja peni.
8 Jesus okwa tya kuvo: “Naame itandi mu lombwele kutya okeenghonopangelo dalyelye handi longo oinima ei.”
9 Opo nee okwa hovela okulombwela ovanhu aveshe efaneko ta ti: “Omulumenhu umwe okwa twika oshikunino shomandjebele+ nokwa kongela mo ovanailonga, ndele ta i kondje yoshilongo oule wefimbo lonhumba.+
10 Eshi omandjebele a pya, okwa tuma omupiya waye umwe kovanailonga, opo e ke mu talele ko oiimati. Ndele ovanailonga ove mu shunifa eenyala dongaho, konima eshi ve mu denga.+
11 Ashike natango okwa tuma ko vali omupiya mukwao. Ndele naye ove mu denga, ve mu fifa ohoni* nove mu shunifa eenyala dongaho.
12 Natango okwa tuma ko vali omutitatu, ndele naye ove mu denga a ninga oipute noku mu kokololelashi.
13 Opo nee mwene woshikunino okwa ti: ‘Ohandi ningi ngahelipi? Ohandi tumu ko omonamati wange omuholike.+ Otashi dulika ve ke mu fimaneke.’
14 Eshi ovanailonga ve mu mona, ova kundafana tava ti, ‘Ou oye omufyuululi. Natu mu dipaeni, opo efyuululo li ninge letu.’
15 Onghee ove mu kokolola mo moshikunino shomandjebele noku mu dipaa.+ Mbela mwene woshikunino ote ke va ningila shike?
16 Ote ke uya noku va dipaa, ndele moshikunino shomandjebele ta kongele mo ovanailonga vamwe.”
Eshi ve shi uda, ova ti: “Osho kashi na efiku shi ningwe!”
17 Opo nee okwe va tala, ndele ta ti: “Hano omushangwa ou owa hala kutya shike, ou tau ti: ‘Emanya olo ovatungi va ekelashi ola ninga emanya la fimanenena’?*+
18 Keshe ou ta wile kemanya eli ota ka teyauka.+ Nakeshe oo tali wile, otali mu nyanyaula.”
19 Ovanongo vomishangwa novapristeri ovakulunhu ova li va hala oku mu kwata po pefimbo olo tuu olo, ashike ova li va tila ovanhu, osheshi ova li va didilika kutya ota popi kombinga yavo mefaneko olo.+
20 Konima eshi ve mu konenena, ova futa ovalumenhu vonhumba meholeko ve liningife va fa ovayuki, opo va dule oku mu yula meendjovo daye,+ opo ve mu yandje kepangelo nokovapangeli.
21 Opo nee ove mu pula tava ti: “Omuhongi, otu shi shii kutya oho popi noho hongo paushili, noiho tale eholokepo lokombada lovanhu, ndele oho hongo oshili kombinga yaKalunga.
22 Oshi li ngoo pamhango* kufye okufuta oifendela kOmukesari, ile hasho?”
23 Eshi Jesus a didilika oihelele yavo okwa tya kuvo:
24 “Ulikilei nge odenari.* Efano neshangelo eli olalyelye?” Ova ti: “OlOmukesari.”
25 Opo nee okwa tya kuvo: “Hano eshi shOmukesari shi peni Omukesari,+ naasho shaKalunga shi peni Kalunga.”+
26 Kava li va dula oku mu yula meendjovo moipafi yovanhu, ndele molwaashi ova li va kuminwa enyamukulo laye, ova kala va mwena.
27 Opo nee vamwe vomOvasadukai, ovo hava ti kutya kaku na enyumuko,+ ove uya, ndele tave mu pula tava ti:+
28 “Omuhongi, Moses okwe tu shangela a ti, ‘Ngeenge omulumenhu okwa filwa omumwaina omulumenhu a fiya po omukulukadi, ndele ina fiya po oludalo, omumwaina na kufe po omukulukadi oo, ndele ta dalele omumwaina ounona.’+
29 Ndele opa li ovamwainamati vaheyali. Wotete okwa li a hombola, ndele ta fi ehe na oludalo.
30 Oshinima sha faafana osha ningilwa yo omutivali
31 nomutitatu okwe mu hombola yo. Ndele aveshe vaheyali ova ningilwa oshinima sha faafana; aveshe ova fya vehe na oludalo.
32 Xuuninwa, omukainhu naye okwa ka fya.
33 Ngeenge ova nyumunwa, omukulukadi oo ota ka ninga walyelye? Osheshi okwa li omukulukadi wavo aveshe vaheyali.”
34 Jesus okwa tya kuvo: “Ovana vomonghalelo ei yoinima* ohava hombola nohava hombolwa,
35 ndele ovo va talika ko va wana okuya monghalelo yoinima oyo nokunyumunwa koufi itava ka hombola noitava ka hombolwa.+
36 Oshoshili, itava fi vali, osheshi otava kala ngaashi ovaengeli, nove li ovana vaKalunga, shaashi ove li ovana venyumuko.
37 Ashike shi na sha novafi kutya otava ka nyumunwa, nokuli naMoses okwa holola mehokololo li na sha noshixwa sheno, eshi a popya kutya Jehova* ‘oKalunga kaAbraham naKalunga kaIsak naKalunga kaJakob.’+
38 Oye Kalunga kovanamwenyo, ndele ke fi kovafi, molwaashi okwe va tala ko* ve na omwenyo.”+
39 Opo nee vamwe vomovanongo vomishangwa ova tya kuye: “Omuhongi, owa popya mondjila.”
40 Osheshi kava li vali tava dulu oku mu pula sha.
41 Opo nee okwe va pula ta ti: “Omolwashike hano ovanhu tava ti kutya Kristus omona waDavid?+
42 Osheshi David okwa popya membo lOmapsalme a ti, ‘Jehova* okwa lombwela Omwene wange a ti: “Kala omutumba kolulyo lange,
43 fiyo ohandi ningi ovatondi voye onga oshilyatelo sheemhadi doye.”’+
44 Hano ngeenge David okwe mu ifana Omwene, ongahelipi e li omona waye?”
45 Fimbo ovanhu aveshe va li tava pwilikine, Jesus okwa tya kovahongwa vaye:
46 “Lungameni ovanongo vomishangwa ovo ve hole okweendaenda va djala oikutu ile, nove hole okupopifwa monghedi ye likalekelwa peenhele domalandifilo, nokukala omutumba koipundi yokomesho* meeshinagoga nopeenhele odo da nuninwa ovaenda, ovo va fimana poivilo,+
47 naavo hava xwake po omaumbo* ovafiyekadi, nokwiilikana omaindilo malemale, opo ve liulike.* Ovanhu va tya ngaho otava ka mona ehandukilo la kwata moiti.”*
Omashangelo opedu
^ Ile “ola totwa po kovanhu?”
^ Ile “inave mu fimaneka.”
^ Emanya olo ohali tulwa mohuke, opo ekuma li kale la kola.
^ Ile “mondjila.”
^ Tala Oshiw. B14.
^ Ile “vomeedula edi.” Tala Omafatululo oitya.
^ Ile “pataleko laye.”
^ Ile “iwa.”
^ Ile “oinima.”
^ Ile “limonikife.”
^ Ile “lidjuu.”
