Evaengeli paLukas 6:1-49
-
Jesus, “Omwene wEshabata” (1-5)
-
Omulumenhu weke la fya a velulwa (6-11)
-
Ovayapostoli 12 (12-16)
-
Jesus ta hongo nokuvelula (17-19)
-
Ehafo nowoo (20-26)
-
Okuhola ovatondi (27-36)
-
Efeni po okutokola (37-42)
-
Ou shiivikile koiimati yao (43-45)
-
Eumbo la tungwa nawa; eumbo lihe na ekanghameno la kola (46-49)
6 Ofimbo Jesus va li tava tavakana momapya mefiku lEshabata, ovahongwa vaye ova li tava pweya oilya noku i fengela pomake avo,+ ndele tava li eemuma dayo.+
2 Opo nee Ovafarisai vamwe ova tya: “Omolwashike tamu ningi osho inashi pitikwa pamhango okuningwa mefiku lEshabata?”+
3 Ndele Jesus okwa tya kuvo: “Hamba inamu lesha osho David a li a ninga, eshi ye novalumenhu ovo va li pamwe naye va li va fya ondjala?+
4 Mbela inamu lesha, eshi a li a ya meumbo laKalunga, ndele ta pewa omingome dokuulikwa,* nokwa lya, ndele ta pe yo ovalumenhu ovo a li navo, odo inadi pitikilwa omunhu keshe okulya pamhango, ndele oda li ashike dovapristeri?”+
5 Opo nee okwa tya kuvo: “Omona womunhu oye Omwene wEshabata.”+
6 Ndele mefiku vali limwe leshabata,+ okwa ya moshinagoga nokwa li a hovela okuhonga. Moshinagoga omo omwa li omulumenhu e na eke lokolulyo la fya.*+
7 Ovanongo vomishangwa nOvafarisai ova li tava tale nokukonenena Jesus va tale ngeenge ota velula omulumenhu oo mefiku lEshabata, opo va dule oku mu hokololifa.
8 Eshi Jesus a didilika osho tava diladila,+ okwa tya komulumenhu oo e na eke la fya:* “Fikama, ndele to uya pokati apa.” Omulumenhu oo okwa fikama, ndele ta kala ofika opo a lombwelwa.
9 Opo nee Jesus okwa tya kuvo: “Oilonga ilipi i na okulongwa pamhango mefiku lEshabata: okulonga ouwa, ile okulonga owii, okuxupifa omwenyo, ile oku u hanauna po?”+
10 Konima eshi e va tala aveshe, okwa tya komulumenhu oo: “Yukililifa eke loye.” Osho a ninga, neke laye ola veluka.
11 Ndele ova li va handuka unene, nova hovela okukundafana kutya oshike ve na okuningila Jesus.
12 Mefiku limwe lomomafiku oo, Jesus okwa ya komhunda a ka ilikane,+ nokwa kala oufiku aushe ta ilikana kuKalunga.+
13 Eshi kwa sha, okwa ifana ovahongwa vaye, ndele ta hoolola mo mokati kavo 12, ovo yo a luka ovayapostoli.+
14 Omadina avo oyaa: Simon, oo e mu luka Petrus, nomumwaina Andreas; Jakob, Johannes, Filippus,+ Bartolomeus,
15 Mateus, Tomas,+ Jakob, omona waAlfeus, Simon oo ha ifanwa “omuladi,”
16 Judas, omona waJakob, naJudas Iskariot, oo lwanima a ka ninga omukengeleli.
17 Opo nee ova londoloka komhunda, nokwa ya poima pa lalakana, ndele opa li ongudu inene yovahongwa vaye nosho yo ovanhu vahapu neenghono ovo va li ve uya okupwilikina nokuvelulwa kuye, va dja muJudea nomuJerusalem ashishe, nomoshitukulwa shokomunghulo wefuta shaTirus naSidon.
18 Nokuli naavo va li tava hepekwa keemhepo da nyata ova li va velulwa.
19 Molwaashi muye omwa li tamu di eenghono+ dokuvelula keshe ou te mu kumu, ongudu yovanhu aishe oya li ya halelela oku mu kuma.
20 Opo nee okwa tala kovahongwa vaye, ndele ta ti:
“Ovo tamu kala mwa hafa onye ovo mwa hepa, osheshi Ouhamba waKalunga oweni.+
21 “Ovo tamu kala mwa hafa onye ovo mwa fya ondjala paife, osheshi otamu ka kutifwa.+
“Ovo tamu kala mwa hafa onye ovo tamu lili paife, osheshi otamu ka yola.+
22 “Ovo tamu kala mwa hafa onye ngeenge ovanhu tave mu tondo,+ tave mu taataa,+ tave mu sheke noku mu popila mowii omolwOmona womunhu.
23 Hafeni mefiku olo nokunhuka kenyaku, osheshi taleni! ondjabi yeni oinene meulu, osheshi oinima oyo oya faafana naayo ooxekulululwa va li hava ningile ovaprofeti.+
24 “Ndele woo nye ovo mwa punapala,+ osheshi omwa hekelekwa nale sha wana.+
25 “Woo nye ovo mwa kuta paife, osheshi otamu ka fya ondjala.
“Woo nye ovo tamu yolo paife, osheshi otamu ka nyika oluhodi nokulila.+
26 “Woo nye ngeenge tamu popilwa mouwa kovanhu aveshe,+ osheshi ooxekulululwa navo osho va li va ningila ovaprofeti ovanaipupulu.
27 “Ndele amushe ovo tamu pwilikine ohandi mu lombwele kutya: Kaleni mu hole ovatondi veni, ningileni ouwa ava ve mu tonde,+
28 nangekeni noupuna ovo tave mu halele owii nokwiilikanena ovo tave mu sheke.+
29 Ndele ou te ku denge kolupanda limwe, mu pa yo likwao, naau te ku kufa oshikutu shoye shokombada, mu pa yo shokoshi.+
30 Yandjeni kukeshe oo te mu ehela,+ naao ta kufa po oinima yeni, inamu mu pula e i alule.
31 “Ndele osho mwa hala ovanhu ve mu ningile, osho mu va ningila yo.+
32 “Ngeenge omu hole ashike ovo ve mu hole, otashi mu etele ouwa washike? Osheshi novalunde ove hole ashike ovo ve va hole.+
33 Nongeenge ohamu ningile ashike ouwa ovo have mu ningile ouwa, otashi mu etele ouwa washike? Ovalunde navo ohava ningi sha faafana.
34 Shimwe vali, ngeenge ohamu yandje ashike* kwaavo mu shii kutya otava ka alula osho va li ve mu indila, otashi mu etele ouwa washike?+ Ovalunde navo ohava yandje ashike kovalunde vakwao, opo va alulilwe shi fike pwaasho va yandjele.
35 Mepingafano naasho, kaleni mu hole ovatondi veni nokulonga ouwa. Kaleni yo hamu yandje nopehe na okuteelela mu alulilwe sha,+ opo mu ka mone ondjabi inene notamu ka ninga ovana vOmukombadambada, osheshi oha file onghenda ovakolokoshi naavo ihava pandula.+
36 Kaleni mu na onghenda ngaashi Xo omunanghenda.+
37 “Shikwao vali, efeni po okutokola, opo muha ka tokolwe;+ nokweefa po okuyandja oushima, opo muha ka pewe oushima. Kaleni hamu dimine po,* opo mu diminwe po* yo.+
38 Kaleni hamu yandje, opo ovanhu va kale have mu pe yo.+ Otave ke mu tulila meendjato doikutu yeni oshiyelekifo sha yeleka, sha fendwa notashi xunga. Osheshi oshiyelekifo osho tamu yelekifa, osho tamu ka yelekifwa nasho yo.”
39 Opo nee okwe va lombwela yo efaneko a ti: “Omupofi ota dulu ngoo okukwata omupofi mukwao komhango? Aveshe mbela itava ka wila melambo?+
40 Omuhongwa ke dule omuhongi waye, ndele keshe ou a hongekeka ota ka kala a fa omuhongi waye.
41 Ndele omolwashike u wete okambodi ke li meisho lomumwaxo, ndele ku wete endangalati olo li li meisho loye?+
42 Ongahelipi to dulu okulombwela omumwaxo kutya, ‘Omumwatate, handi uya ndi kufe mo okambodi meisho loye,’ ofimbo ove uhe wete endangalati meisho loye? Omunaihelele ove! Kufa mo tete endangalati olo li li meisho loye, opo u mone nawa nghee to dulu okukufa mo okambodi meisho lomumwaxo.
43 “Kape na omuti muwa hau ima oiimati ii, nokape na omuti mwii hau ima oiimati iwa.+
44 Osheshi omuti keshe ohau shiivikila koiimati yao.+ Pashihopaenenwa, ovanhu ihava likola eenghwiyu, ile omandjebele komano.
45 Omunhu muwa oha pitifa mo oinima iwa memona liwa lomomutima waye, ndele omunhu omukolokoshi oha pitifa mo oinima ii memona laye lii. Osheshi osho shi yadi momutima okanya osho taka popi.+
46 “Omolwashike hamu ifana nge ‘Omwene! Omwene!’ ndele ihamu longo osho handi mu lombwele?+
47 Keshe oo te uya kwaame, ndele ta udu eendjovo dange noku di wanifa, ohandi mu lombwele kutya ota faafanifwa nashike:+
48 Okwa fa omulumenhu a tungila eumbo laye kemanya nokwe li fela ekanghameno la ya moule. Eshi efundja le uya, omeva okwe lidenga meumbo olo, ndele inaa dula oku li teya po, molwaashi ola tungwa la kola.+
49 Mepingafano naasho, keshe ou ta udu eendjovo dange, ndele ite di wanifa,+ okwa fa omulumenhu a tunga eumbo lihe na ekanghameno. Omeva okwe lidenga meumbo olo, ndele ola teka po diva nokuhanauka po filufilu.”
