Evaengeli paLukas 1:1-80
1 Ovanhu vahapu ova ninga eenghendabala va shange oinima aishe oyo ya ningwa, oyo nafye yo twa itavela.+
2 Vamwe ovo ve i mona nomesho+ nova udifa etumwalaka laKalunga ove i tu lombwela.+
3 Onghee omufimanekwa Teofilus, onda konakona oinima aishe ei, nonda tokola yo ndi ku shangele kombinga yayo palandulafano layo.+
4 Onde ku shangela ngaho, opo u shiive kutya oinima oyo wa hongwa nale oi li paushili.+
5 Ndele pefimbo laHerodes,*+ ohamba yaJudea, opa li omupristeri wedina Sakaria, oshilyo shongudu yovapristeri hai ifanwa Abia.+ Sakaria okwa li a hombola omukainhu womepata laAron, wedina Elisabet.
6 Aveshe ova li ovayuki koshipala shaJehova,* hava ende vehe noshipo metwokumwe noipango neemhango daye adishe.
7 Ndele kava li ve na okaana, molwaashi Elisabet okwa li ongadji, naaveshe ova li ovanamido.
8 Sakaria okwa li ta longo e li omupristeri koshipala shaKalunga, molwaashi osha li olufo longudu yavo okulonga motembeli.+
9 Onghee okwa ya motembeli yaJehova,* ndele ta xwike oitwimifo ngaashi sha li onghedindjikilile* yovapristeri.+
10 Ndele ongudu yovanhu aishe oya li pondje tai ilikana pefimbo lomatwiminoyambo.
11 Opo nee omweengeli waJehova* okwe mu holokela, e li ofika kolulyo loaltari yokutwimina omayambo.
12 Eshi Sakaria e mu mona okwa haluka, nokwa li a tila unene.
13 Ndele omweengeli okwa tya kuye: “Sakaria, ino kala wa tila, molwaashi omailikano oye okwa udika kuKalunga. Omukulukadi woye Elisabet ote ke ku dalela omonamati, noto ke mu luka Johannes.+
14 Ndele ove oto ka hafa nokunyakukwa neenghono, navahapu otava ka hafela okudalwa kwaye,+
15 osheshi ota ka ninga munene koshipala shaJehova.*+ Ashike ke na okunwa omaviinyu, ile oshikolwifa keshe,+ nota ka yadifwa omhepo iyapuki nokuli fimbo ina dalwa.*+
16 Ota ka kwafela Ovaisrael vahapu va alukile kuJehova,* Kalunga kavo.+
17 Ota ka tetekela yo Kalunga e na omhepo neenghono ngaashi Elia,+ nota ka lundulula omitima dooxe di kale ngaashi dounona.+ Ovo ihava dulika ote ke va kwafela va longe osho sha yuka, opo a longekidile Jehova* oshiwana.”+
18 Opo nee Sakaria okwa tya komweengeli: “Osho otashi shiiva ngahelipi? Osheshi fye nomukulukadi wange ovanamido.”
19 Omweengeli okwa tya kuye: “Aame Gabriel,+ ou handi kala alushe koshipala shaKalunga,+ nonda tumwa ndi popye naave noku ku lombwela onghundana ei iwa.
20 Ndele tala! oto ka kala wa mwena noito ka dula okupopya fiyo osheshi oinima oyo ya ningwa, molwaashi ino itavela eendjovo dange, odo tadi ka wanifwa peufwafimbo lado.”
21 Onghee ovanhu ova kala va teelela Sakaria, nova li va kumwa, eshi a kala motembeli efimbo lile.
22 Eshi a dja mo, ka li ta dulu okupopya navo, nova li va didilika kutya okwa mona emoniko motembeli. Okwa kala ta ningi omaudi, ndele ka li ta popi.
23 Eshi omafiku oshilonga shaye shiyapuki* a pwa ko, okwa shuna keumbo laye.
24 Konima yomafiku onhumba, omukulukadi waye Elisabet okwa ninga oufimba, nokwa kala iha di mo meumbo oule weemwedi nhano ta ti:
25 “Eshi osho Jehova* a ningila nge. Okwa fila nge onghenda, opo ndiha kale vali nda dinika kovanhu.”+
26 Eshi eteelelo laElisabet la wanifa eemwedi hamano, Kalunga okwa li a tuma omweengeli Gabriel+ koshilando shedina Nasaret shomuGalilea
27 kokakadona elela+ oko ka li ka udanekelwa ohombo* komulumenhu wedina Josef womepata laDavid, nedina lokakadona elela oko oMaria.+
28 Naashi omweengeli a fika, okwa tya kuye: “Ombili nai kale naave, ove ou wa hokiwa neenghono, Jehova* oku li pamwe naave.”
29 Ndele Maria okwa haluka unene keendjovo odo nokwa li ta kendabala okuuda ko kutya oda hala okutya ngahelipi.
30 Opo nee omweengeli okwa tya kuMaria: “Ino kala wa tila, Kalunga okwe ku fila onghenda.
31 Ndele tala! oto ka ninga oufimba,* ndele to ka dala okaana kokamati,+ nou na oku ka luka Jesus.+
32 Ndele ota ka kala a tumbala+ nota ka ifanwa Omona wOmukombadambada,+ na Jehova* Kalunga ote ke mu pa olukalwapangelo laxe David.+
33 Ota ka pangela e li Ohamba mepata laJakob fiyo alushe, nOuhamba waye itau ka xula po.”+
34 Maria okwa tya komweengeli: “Osho otashi shiiva ngahelipi, osheshi inandi nangala nande onale nomulumenhu?”+
35 Opo nee omweengeli okwa tya kuye: “Omhepo iyapuki otai ke uya kombada yoye,+ neenghono dOmukombadambada otadi ke ku tuvikila. Onghee hano oo ta ka dalwa ota ka ifanwa omuyapuki,+ Omona waKalunga.+
36 Ndele tala! omupambele woye Elisabet, oo a li ongadji nomunamido, naye oku na eteelelo lokaana kokamati leemwedi hamano;
37 osheshi kape na ondjovo* tai nyenge Kalunga.”+
38 Maria okwa ti: “Tala! ame omupiya waJehova* okakadona. Nandi ningilwe ngaashi wa popya.” Opo nee omweengeli okwa dja po puye.
39 Konima yaasho, Maria okwa ya diva koshitukulwa shokeemhunda, koshilando shomuJuda.
40 Opo nee okwe uya meumbo laSakaria, ndele ta popifa Elisabet.
41 Eshi Elisabet a uda epopifo laMaria, okaana oko ka li medimo laye oka nhuka, na Elisabet okwa li a yadifwa omhepo iyapuki,
42 ndele ta popi mokule ta ti: “Owa nangekwa noupuna mokati kovakainhu, nokaana aka to ka dala oka nangekwa noupuna!
43 Oshi li oufembanghenda kwaame, eshi ina yOmwene wange e uya okutalela nge po.
44 Osheshi tala! eshi nda uda epopifo loye, okaana aka ke li medimo lange oka nhuka kehafo.
45 Omukainhu oo a itavela oinima ei ota ka kala yo a hafa, osheshi Jehova* ota ka wanifa po oinima aishe oyo e mu udanekela.”
46 Opo nee Maria okwa ti: “Omwenyo wange* otau hambelele Jehova,*+
47 nomutima wange otau kala alushe wa hafela Kalunga Omuxupifi wange.+
48 Osheshi okwa dimbuluka omupiya waye okakadona, nonande oke li omunhu wongaho.+ Osheshi tala! okudja paife omapupi aeshe otaa ka tala nge ko nda nangekwa noupuna,+
49 osheshi Omunaenghono okwa longela nge oilonga inene, nedina laye oliyapuki.+
50 Ota file onghenda ovo have mu tila, okudja kepupi fiyo okepupi.+
51 Okwa longa aishe nokwooko kwaye ku na eenghono, nokwa halakanifa ovo ve linenepeka momitima davo.+
52 Okwa kufa ovalumenhu ovanaenghono komalukalwapangelo,+ nokwa nenepeka ovalininipiki.+
53 Ovo va fya ondjala okwe va kutifa noinima iwa,+ noipuna okwe i lekela eenyala dongaho.
54 Okwa dimbuluka omupiya waye Israel, a file onghenda+
55 Abraham noludalo laye* fiyo alushe ngaashi ashike a li a lombwela ootatekulululwa.”+
56 Maria okwa kala naElisabet oule weemwedi nhatu lwaapo, nolwanima okwa ka shuna keumbo lavo.
57 Efimbo laElisabet lokudala osho la fiki, nokwa dala okaana okamati.
58 Eshi ovashiinda novapambele vaye va uda kutya Jehova* okwe mu fila onghenda inene, ova li va hafa pamwe naye.+
59 Mefiku etihetatu, ove uya okupitifa okaana etanda,+ nova li va hala oku ka lukila xe, Sakaria.
60 Ndele ina yako okwa nyamukula a ti: “Ahawe, edina lako oJohannes.”
61 Ova tya kuye: “Kape na nande oumwe womovapambele voye e na edina olo.”
62 Opo nee ova udikila xe yokaana tave mu pula kutya okwa hala ka lukwe lyelye.
63 Onghee okwa pula okapelende, ndele ta shange ko: “Edina lako oJohannes.”+ Ndele aveshe ova li ve shi kuminwa.
64 Diva okanya kaye oka makuka, nelaka laye ola li la manguluka, ndele ta hovele okupopya,+ ta tange Kalunga.
65 Ovashiinda shavo aveshe ova li va tila, novanhu aveshe muJudea, moshitukulwa shokeemhunda, ova li tava popi kombinga yoinima aishe oyo.
66 Aveshe ovo ve shi uda ove lipula momitima davo tava ti: “Okaana aka otaka ka kala omunhu a tya ngahelipi?” Osheshi eke laJehova* ola kala kombada yako.
67 Opo nee xe yako Sakaria okwa yadifwa omhepo iyapuki, ndele ta xunganeke ta ti:
68 “Jehova* na hambelelwe, Kalunga kaIsrael,+ molwaashi okwa kenukila oshiwana shaye nokwe shi etela exupifo.+
69 Okwe tu pa oluvinga lexupifo*+ la dja mepata laDavid, omupiya waye.+
70 Osho osho a li a udaneka, ngaashi sha popiwa kovaprofeti vaye ovayapuki vonale.+
71 Okwe tu udanekela e tu xupife kovatondi vetu aveshe.+
72 Ote ke tu fila onghenda ngaashi a udanekela ootatekulululwa, nota ka dimbuluka ehangano laye liyapuki.+
73 Eudaneko olo okwa li e li lombwela tatekulululwa Abraham.+
74 Eshi Kalunga e tu xupifa kovatondi vetu, okwe tu pitika tu mu longele tuhe na oumbada,
75 opo tu kale ovadiinini nokulonga osho sha yuka mokukalamwenyo kwetu akushe.
76 Ndele ove omumwange, oto ka ifanwa omuprofeti wOmukombadambada, osheshi oto ka tetekela Jehova* u mu longekidile ondjila yaye,+
77 noto ka udifila oshiwana shaye etumwalaka lexupifo, opo shi diminwe po omatimba asho+
78 omolwolukeno laKalunga ketu. Olukeno olo la dja pombada otali ke tu minikila ngaashi etango tali piti,
79 olo tali yandje ouyelele kwaavo ve li momilaulu nomomudidimbe wefyo,+ nokuyukifa eemhadi detu mondjila yombili.”
80 Nokaana oka kula noka pama pamhepo, nokwa kala e li mombuwa, fiyo osheshi e ke lihololela Israel moipafi.
Omashangelo opedu
^ Tala Omafatululo oitya.
^ Ile “hashi ningwa shito.”
^ Ile “fimbo e li moshidalelo shaina.”
^ Ile “oshilonga shaye shokuyakula.”
^ Ile “ka valekwa.”
^ Ile “ka fimbapala.”
^ Ile “kape na sha.”
^ Ile “Okukalamwenyo kwange akushe.” Tala Omafatululo oitya.
^ Eln., “nombuto yaye.”
^ Ile “omuxupifi omunaenghono.” Tala Omafatululo oitya, “Oluvinga.”
