Evaengeli paLukas 10:1-42
10 Konima yoinima oyo, Jesus okwa hoolola ovahongwa vamwe 70, ndele te va tumu oovavali+ ve mu tetekele koshilando nokonhele keshe oko a li ta ka ya.
2 Opo nee okwa tya kuvo: “Heeno, oilonga yokuteya oihapu, ndele ovateyi ovanini. Onghee hano indileni Mwene weteyo a tume ovateyi keteyo laye.+
3 Indeni! Taleni! Ohandi mu tumu ngaashi eedi mokati komambungu.*+
4 Inamu ya nondjato yoimaliwa, ile yoikulya, ile neenghaku,+ noinamu kunda nande omunhu* mondjila.
5 Ngeenge omwa i meumbo lonhumba, tete tyeni: ‘Ombili nai kale meumbo eli.’+
6 Ngeenge ovanhu ove na ombili, ombili oyo mwe va halela nai kale navo. Ndele ngeenge kave i na, nai mu alukile.
7 Onghee hano kaleni hamu di meumbo olo,+ lyeni nokunwa osho tave mu pe,+ osheshi omunailonga okwa wana okupewa ondjabi yaye.+ Inamu kala tamu tembuka nomaumbo.
8 “Natango, ngeenge omwa i moshilando, ndele tamu tambulwa mo, lyeni osho tamu pewa,
9 ovanaudu ovo ve li mo va veluleni noku va lombwela tamu ti: ‘Ouhamba waKalunga owa ehena popepi nanye.’+
10 Ngeenge omwa i moshilando, ndele inave mu tambula, indeni momapandavanda asho, ndele tamu ti:
11 ‘Otwe lipupula ondwi oyo ya li ya kanyatela keemhadi detu ya dja moshilando sheni.+ Ndele kaleni mu shi shii kutya Ouhamba waKalunga owa ehena popepi.’
12 Ohandi mu lombwele kutya mefiku olo ehandukilo loshilando osho otali ka kala linene li dulife laSodom.+
13 Okwa ti: “Woo ove, Korasin! Woo ove, Betsaida! Molwaashi ngeno ovanhu vomoilando yaTirus naSidon ova monene oilonganghono oyo, ngeno ove lidilulula nale, va djala eeshako nove li omutumba momute.+
14 Onghee mEfiku lEtokolo, ehandukilo leni otali ka kala linene li dulife laTirus nolaSidon.
15 Ndele ove Kapernaum, mbela oto ka tumbalekwa u ye meulu? Oto ka kulukila mOmbila!*
16 “Ou ta pwilikine kunye, ota pwilikine kwaame.+ Naau ite mu tambula, naame ita tambula nge yo. Ashike ou ita tambula nge, ita tambula yo Ou a tuma nge.”+
17 Ndele ovahongwa 70 ova aluka nehafo tava ti: “Omwene, nokuli neendemoni oda dulika kufye, eshi twa longifa edina loye.”+
18 Opo nee okwa tya kuvo: “Ondi wete nale Satana a wa+ meulu a fa oluvadi.
19 Taleni! onde mu pa eenghono dokulyata omayoka neendje, nodokufinda eenghono adishe domutondi,+ nokape na osho tashi ke mu etela oshiponga.
20 Ashike inamu hafa, molwaashi eemhepo da nyata da dulika kunye, ndele hafeni eshi omadina eni a shangelwa meulu.”+
21 Pefimbo opo tuu opo Kalunga okwa pa Jesus omhepo iyapuki, ndele ta hafe unene nokwa ti: “Tate, Omwene weulu nedu, ohandi ku tange moipafi yaaveshe, molwaashi oinima ei owe i holeka ovanaendunge novahongwanhu,+ ndele owe i hololela ounona vanini. Heeno, Tate, molwaashi eshi oshe ku wapalela.+
22 Oinima aishe Tate okwe i pa nge, ndele kape na nande ou e shii Omona, kakele kaTate; kape na yo ou e shii Tate, kakele kOmona+ nakeshe oo Omona a hala oku mu hololela Xe.”+
23 Opo nee okwa pungulukila kovahongwa vaye, ndele te va lombwele ovo aveke ta ti: “Ava omesho avo e wete oinima ei mu wete otava kala va hafa.+
24 Osheshi ohandi mu lombwele, eehamba novaprofeti vahapu ova li va halelela okumona oinima oyo hamu mono, ndele inave i mona,+ nokuuda oinima oyo hamu udu, ashike inave i uda.”
25 Ndele tala! omulumenhu umwe omunongo wOmhango okwe uya kuJesus e mu yeleke ta ti: “Omuhongi, ondi na okuninga shike, opo ndi ka fyuulule omwenyo waalushe?”+
26 Opo nee Jesus okwa tya kuye: “MOmhango omwa shangwa shike? Ou i udite ko ngahelipi?”
27 Omulumenhu oo okwa nyamukula ta ti: “‘Hola Jehova,* Kalunga koye, nomutima woye aushe, nomwenyo* woye aushe, neenghono doye adishe, nomadiladilo oye aeshe’+ nosho yo ‘hola mukweni ngaashi u lihole mwene.’”+
28 Jesus okwa tya kuye: “Owa nyamukula mondjila; twikila okuninga ngaho, opo u ka mone omwenyo waalushe.”+
29 Ndele molwaashi omulumenhu oo okwa li a hala okulimonikifa kutya ye omuyuki,+ okwa tya kuJesus: “Olyelye naanaa omukwetu?”
30 Jesus okwa nyamukula a ti: “Omulumenhu wonhumba okwa li ta di muJerusalem a finda kuJeriko, ndele ta hangika kovanyeki, ovo ve mu dula oikutu aishe, ve mu denga, ndele tave mu fiye po e na okamwenyo kanini.
31 Ndele omupristeri umwe okwa li ta kuluka mondjila oyo, ashike eshi e mu mona, okwe mu kunduluka.
32 Sha faafana, Omulevi umwe naye eshi e uya ponhele oyo, okwe mu mona nokwe mu kunduluka.
33 Ndele Omusamaria umwe+ oo a li naye ta ende mondjila oyo, eshi e uya ponhele oyo, okwe mu mona nokwe mu kenukila.
34 Onghee okwa ya puye, te mu tile omaadi nomaviinyu poipute yaye, ndele te i mange. Opo nee okwe mu londeka koshinamwenyo shaye, ndele te mu twala meumbo lovaenda e ke mu file oshisho.
35 Mefiku la landula ko, okwa kufa eedenari* mbali, ndele te di pe mwene weumbo olo, nokwa tya kuye: ‘Mu fila oshisho, nongeenge owa longifa shihapu shi dulife pwaasho, ohandi uya ndi shi fute, eshi handi aluka.’
36 Oolyelye womwaava vatatu to diladila kutya oye omukwao+ womulumenhu oo a li a hangika kovanyeki?”
37 Okwa ti: “Oyou e mu fila onghenda.”+ Opo nee Jesus okwa tya kuye: “Inda u ka ninge yo sha faafana.”+
38 Ndele fimbo ve li mondjila, Jesus okwa ya momukunda wonhumba. Opo nee omukainhu umwe wedina Marta+ okwe mu tambula meumbo lavo.
39 Marta okwa li e na omumwainakadona wedina Maria, oo a li omutumba peemhadi dOmwene nokwa kala ta pwilikine kwaasho a li ta popi.*
40 Mepingafano naasho, Marta okwa li e lipyakidila noinima ihapu. Onghee okwe uya kuJesus, ndele ta ti: “Omwene, ku wete nande kutya mumwameme okwa efela nge po ashike? Mu lombwela e uye a kwafele nge.”
41 Omwene okwa tya kuye: “Marta, Marta, ou na oshisho nowe lipyakidila noinima ihapu.
42 Fye inatu pumbwa oinima ihapu, nande oinini oya wana ashike. Maria okwe lihoololela ombinga iwa,*+ nokape na ou te i mu kufa.”
Omashangelo opedu
^ Omambungu oludi eli okwa fa kavandje.
^ Ile “papatela nande omunhu, eshi tamu lipopifa.”
^ Ile “mo-Hades,” sha hala okutya, koufi. Tala Omafatululo oitya.
^ Tala Omafatululo oitya.
^ Tala Oshiw. B14.
^ Eln., “keendjovo daye.”
^ Ile “oshinima sha denga mbada.”
