Evaengeli paLukas 4:1-44
4 Opo nee Jesus, e yadi omhepo iyapuki, okwa dja po pomulonga waJordan, ndele ta twalwa mombuwa komhepo+
2 oule womafiku 40, ndele ta hongaulwa kOndiaboli.+ Noka li a lya sha moule womafiku oo, onghee konima yomafiku oo, okwa li a fya ondjala.
3 Opo nee Ondiaboli oya tya kuye: “Ove ngeenge omona waKalunga, lombwela emanya eli li shituke omungome.”
4 Ashike Jesus okwe i nyamukula ta ti: “Opa shangwa: ‘Omunhu ita kala nomwenyo komungome auke.’”+
5 Opo nee oye mu twala komhunda, ndele tai mu ulikile omauhamba aeshe okombada yedu mepakumo leisho.+
6 Ndele Ondiaboli oya tya kuye: “Ohandi ku pe omauhamba aeshe oo nefimano lao, osheshi onde a pewa,+ nohandi a pe keshe ou nda hala oku a pa.
7 Onghee hano ngeenge owe linyongamene nge, aishe otai ningi yoye.”
8 Jesus okwe i nyamukula a ti: “Opa shangwa: ‘Jehova,* Kalunga koye, oye aeke u na okulinyongamena noye aeke u na okulongela oilonga iyapuki.’”+
9 Opo nee oye mu twala kuJerusalem noku mu londeka pombada yekuma* lotembeli, ndele tai ti kuye: “Ove ngeenge omona waKalunga, nhukila pedu,+
10 molwaashi opa shangwa taku ti: ‘Ota ka pa ovaengeli vaye elombwelo li na sha naave, ve ku xupife,
11 ndele ‘Tave ke ku humbata momake avo, opo uha pume omhadi yoye kemanya.’”+
12 Jesus okwe mu nyamukula a ti: “Okwa tiwa: ‘Ino yeleka Jehova,* Kalunga koye.’”+
13 Eshi Ondiaboli ya mana oku mu hongaula, oya dja po puye, ndele tai teelele i mone omhito imwe vali tai wapalele.+
14 Opo nee Jesus okwa shuna kuGalilea+ a yadifwa omhepo iyapuki. Ndele ehokololo li na sha noilonga yaye iwa ola li la tandavela moitukulwa aishe yopoushiinda.
15 Okwa li yo a hovela okuhonga meeshinagoga davo, novanhu aveshe ova li tave mu tange.
16 Ndele okwa ya kuNasaret,+ oko a kulila, nokwa ya moshinagoga ngaashi ha ningi shito mefiku lEshabata, ndele ta fikama a ka leshe Omishangwa.+
17 Opo nee okwa pewa omushangwatonywa womuprofeti Jesaja, ndele te u tonyununa, nokwa ya opo pa shangwa:
18 “Omhepo yaJehova* oi li kombada yange, osheshi okwa vaeka nge ndi udifile eehepele onghundana iwa. Okwa tuma nge ndi shiivifile eenghwate emanguluko novapofi etwikuluko, okumangulula ovafininikwa,+
19 nokuudifa kutya efimbo laJehova* lokufila ovanhu onghenda ola fika.”+
20 Konima eshi e u lesha, okwe u tonya nokwe u pa omuyakuli, ndele ta kala omutumba; novanhu aveshe moshinagoga ova li va tala kuye.
21 Opo nee okwa tya kuvo: “Paife omushangwa oo opo mwa udu owa wanifwa.”+
22 Ndele ovanhu aveshe ova li va hovela okuyandja oundombwedi muwa kombinga yaye nova li va kuminwa eendjovo daye diwa tadi kumu omutima tadi di mokanya kaye,+ nove lipula tava ti: “Hano ou ke fi omonamati waJosef?”+
23 Opo nee Jesus okwa tya kuvo: “Ondi wete kutya omwa hala okuula nge eendjovo edi, ‘Omuhakuli, lihakula ove mwene. Longa yo moshitukulwa sheni oilonga oyo twa uda wa longa muKapernaum.’”+
24 Okwa tya vali kuvo: “Oshili, ohandi mu lombwele kutya kape na omuprofeti ha tambulwa ko moshitukulwa shavo.+
25 Ndele ohandi mu lombwele oshili, muIsrael omwa li ovafiyekadi vahapu pefimbo laElia, eshi odula ya li inai loka oule womido nhatu neemwedi hamano; nomoshilongo ashishe omwa li ondjala.+
26 Ashike Elia ka li a tumwa nande a ye kuumwe womovakainhu ovo, ndele okwa li a tumwa a ye komufiyekadi wokuSarefat, muSidon.+
27 Natango, muIsrael omwa li ovanashilundu vahapu pefimbo lomuprofeti Elisa; ashike kape na nande oumwe womuvo a li a yelifwa,* ndele oNaeman aeke Omusiria.”+
28 Aveshe ovo va li moshinagoga ova li va handuka unene, eshi va uda oinima oyo,+
29 nova fikama, ndele tave mu taataa mo moshilando shavo. Ova li ve mu twala koxulo yomhunda oko kwa li kwa tungilwa oshilando shavo, opo ngeno ve mu undulile pedu.
30 Ashike Jesus okwa pita mokati kavo, ndele ta twikile nondjila yaye.+
31 Opo nee okwa ya kuKapernaum, oshilando shomuGalilea. Ndele okwa li ta hongo ovanhu mefiku lEshabata,+
32 novanhu ova li va kuminwa onghedi yaye yokuhonga,+ osheshi okwa popya ngaashi ou e na eenghonopangelo.
33 Ndele moshinagoga omwa li mu na omulumenhu e na omhepo ya nyata, noya ingida mokule+ tai ti:
34 “Ai! Otu na sha shike naave, Jesus Omunasaret?+ Owe uya oku tu hanauna po? Ondi shi shii lela kutya oove lyelye, oove Omuyapuki waKalunga.”+
35 Jesus okwe i hanyena ta ti: “Mwena, ndele to di mo muye.” Onghee konima eshi ya pundulila pedu omulumenhu oo mokati kavo, ondemoni oya dja mo muye inai mu ehameka.
36 Ovanhu aveshe ova li va kumwa nova hovela okulombwelafana tava ti: “Eendjovo odo kadi na tuu eenghono, eshi a popya ashike kutya eemhepo da nyata nadi dje mo, ndele tadi di mo!”
37 Onghee ehokololo kombinga yaye ola li la tandavela moshilongo ashishe.
38 Eshi a dja moshinagoga, okwa ya meumbo laSimon, nokwa hanga inamweno yaSimon a etwa mo koshidu, nova pula Jesus a kwafele omukainhu oo.+
39 Opo nee okwa fikama puye, ndele ta hanyene oshidu, nokwa veluka. Diva omukainhu oo okwa fikama, nokwa hovela oku va yakula.
40 Ndele etango eshi la li pokuningina, aveshe ovo va li ve na ovanaudu tava vele omikifi di lili noku lili ove va eta kuye. Opo nee okwa tenheka keshe umwe womuvo omake, ndele tava veluka.+
41 Okwa li yo a ta mo eendemoni movanhu vahapu, noda li tadi ingida tadi ti: “Ove Omona waKalunga!”+ Ndele okwe di hanyena, noina efa nande di popye kombinga yaye,+ osheshi odi mu shii kutya oye Kristus.+
42 Okwa dja po puvo ongula inene nokwa ya konhele ye likalela.+ Ndele eengudu dovanhu oda li tadi mu kongo noda ya konhele oko a li, ndele kada li da hala a dje po pudo.
43 Okwa tya kudo: “Ondi na yo okuudifila oilando imwe onghundana iwa yOuhamba waKalunga, molwaashi eshi osho nda tuminwa.”+
44 Opo nee okwa ya, ndele ta udifa meeshinagoga daJudea.
