Inda koshikalimo

Enyumuko oshike?

Enyumuko oshike?

Enyamukulo lopaMbiibeli

MOmbiibeli, oshitya osho sha tolokwa “enyumuko,” osha dja koshitya shOshigreka anastasis, osho tashi ti, “okupenduka,” ile “okuyambuka po natango.” Omunhu ngeenge a nyumunwa otashi ti okwa penduka mefyo nokukala vali nomwenyo, e li omunhu ngaashi ashike a li ofimbo ina fya. — 1 Ovakorinto 15:12, 13.

Nonande oshitya “enyumuko” kashi mo mOmishangwa dOshiheberi, olo luhapu hali ifanwa Etestamenti Likulu, otamu hangwa ouyelele u na sha naasho. Pashihopaenenwa, Kalunga okwa udaneka okupitila momuprofeti Hosea a ti: “Ohandi ke va mangulula meenghono dokoufi, ohandi ke va kulila mefyo.” — Hosea 13:14; Job 14:13-15; Jesaja 26:19; Daniel 12:2, 13.

Ovanhu otava ka nyumuninwa peni? Ovanhu vamwe otava ka nyumuninwa meulu, opo va ka pangele ve li eehamba pamwe naKristus. (2 Ovakorinto 5:1; Ehololo 5:9, 10) Ombiibeli oya popya kombinga yaavo tava ka “nyumunwa tete” nosho yo ‘enyumuko lotete,’ omautumbulilo aeshe oo otaa ulike kutya ope na vali enyumuko limwe tali ka shikula olo. (Ehololo 20:6; Ovafilippi 3:11) Ovanhu ovo tava ka nyumunwa menyumuko olo la xuuninwa otava ka kala vahapu neenghono, notava ka hafela onghalamwenyo kombada yedu. — Epsalme 37:29.

Ovanhu otava ka nyumunwa ngahelipi? Kalunga okwa pa Jesus eenghono, opo a nyumune ovafi. (Johannes 11:25) Jesus ota ka nyumuna “aveshe ovo ve li meembiladimbuluko,” nakeshe umwe ota ka kala e na olupe laye, omaukwatya nota dimbuluka nawa oinima. (Johannes 5:28, 29) Ovo tava nyumuninwa meulu otava ka kala ve na omalutu opamhepo. Ofimbo ovo tava ka nyumuninwa kombada yedu otava ka kala ve na omalutu opambelela e na oukolele we lixwa po. — Jesaja 33:24; 35:5, 6; 1 Ovakorinto 15:42-44, 50.

Oolyelye tava ka nyumunwa? Ombiibeli oya popya kutya “Kalunga ota ka nyumuna ovayuki novalunde.” (Oilonga 24:15) Ovayuki ova kwatela mo ovanhu ovadiinini, ngaashi Noa, Sara nosho yo Abraham. (Genesis 6:9; Ovaheberi 11:11; Jakob 2:21) Ovalunde ova kwatela mo ovanhu ovo va dopa okukala metwokumwe nomifikamhango daKalunga, ashike inava mona omhito yoku di lihonga noku di tula moilonga.

Ongee hano, ovakolokoshi ovo hava nyonene owina inava kwatelwa mo menyumuko. Ovanhu va tya ngaho, ngeenge ova fi ihava kala vali ve na eteelelo lenyumuko, onghalamwenyo yavo opo ashike ya xulila opo. — Mateus 23:33; Ovaheberi 10:26, 27.

Enyumuko otali ka ningwa naini? Ombiibeli oya popya kutya enyumuko laavo tava ka nyuminwa meulu otali hovele pefimbo lokukala po kwaKristus, olo la hovela mo 1914. (1 Ovakorinto 15:21-23) Ofimbo enyumuko laavo tava ka nyumuninwa kombada yedu tali ka hovela pefimbo lEpangelo lOmido Eyovi laJesus Kristus, eshi edu tali ka ninga oparadisa. — Lukas 23:43; Ehololo 20:6, 12, 13.

Omolwashike eitavelo li na sha nenyumuko tali ti sha? Ombiibeli oya popya kombinga yomanyumuko omuwoi, keshe limwe opa li ovanhu ovo ve shi mona nomesho avo okomutwe. (1 Eehamba 17:17-24; 2 Eehamba 4:32-37; 13:20, 21; Lukas 7:11-17; 8:40-56; Johannes 11:38-44; Oilonga 9:36-42; 20:7-12; 1 Ovakorinto 15:3-6) Eshi Jesus a nyumuna Lasarus osha li shididilikwedi, molwaashi Lasarus okwa hangwa a fya pa pita omafiku ane. Jesus okwa li e mu nyumuna moipaifi yongudu yovanhu. (Johannes 11:39, 42) Nokuli novapataneki vaJesus navo ova li ve shi shii, nomolwaashi va li va pangele omhangela, opo va dipae Jesus naLasarus. — Johannes 11:47, 53; 12:9-11.

Ombiibeli otai ulike kutya Kalunga oku na eenghono dokunyumuna ovafi nokwa halelela oku shi ninga. Oku na momadiladilo ouyelele womunhu keshe, oo ta ka nyumuna ta longifa eenghono daye dinenenene. (Job 37:23; Mateus 10:30; Lukas 20:37, 38) Kalunga ota dulu okunyumuna oonakufya nokwa halelela oku shi ninga. Ombiibeli oya popya Kalunga shi na sha nenyumuko ta li uya, ya ti: “Ove ho djuulukwa oshilonga shomake oye.” — Job 14:15.

Omitotolombo kombinga yemumuko

Omutotolombo: Enyumuko ongeenge omwenyo tau hangana nolutu.

Oshili: Ombiibeli otai hongo kutya omwenyo omunhu, ndele kau fi oshinima osho hashi xupu po pefyo. (Genesis 2:7; Hesekiel 18:4) Omunhu eshi ta nyumunwa ita hangana nomwenyo, ndele ota ningi omwenyo u na omwenyo.

Omutotolombo: Ovanhu vamwe otava ka nyumunwa, ndele tava ka hanaunwa po meendelelo.

Oshili: Ombiibeli oya popya kutya ava “va longa owii otava ka nyumukila etokolo.” (Johannes 5:29) Onghee hano, etokolo la tya ngaho otali ke likolelela kwaasho tava longo konima eshi va nyumunwa, ndele inali likolelela koilonga oyo va longa ofimbo inava fya. Jesus okwa ti: ‘Oonakufya otava ka uda ondaka yOmona waKalunga, ndele ovo va pwilikina nokudulika kuye otava ka kala nomwenyo.’ (Johannes 5:25) Ovo tava ka “pwilikina” nokudulika kwaasho tava hongwa konima yenyumuko, omadina avo otaa ka shangwa ‘momushangwatonywa womwenyo.’ — Ehololo 20:12, 13.

Omutotolombo: Ovanhu otava ka nyumunwa nomalutu a faafana naao va li ve na ofimbo inava fya.

Oshili: Osha fa shi li ngaha kutya konima yefyo, olutu lomunhu oha li olo nokunyanyauka po. — Omuudifi 3:19, 20