Daniel 12:1-13
12 “Pefimbo olo, Mikael*+ ota ka kala ofika,* ohamba inene+ oyo ya fikama i lile po oshiwana sheni,* notape ke uya efimbo loudjuu oo inau kala ko nande onale, okudja eshi pe uya oshiwana fiyo opefimbo olo. Nopefimbo olo, oshiwana sheni otashi ka ya onhapo,+ keshe oo a hangwa a shangwa membo.+
2 Navahapu, ovo va nangala mondwi yedu, otava ka penduka, vamwe otava ka nyumukila omwenyo waalushe, navamwe okufifwa ohoni nelengwa laalushe.
3 “Naavo ve na eendunge otava ka vilima ngaashi ouyelele wa twa, ngaashi evalelwa leulu, naavo tava eta vahapu mouyuki ongaashi eenyofi alushe fiyo alushe.
4 “Ndele ove, Daniel, kaleka eendjovo edi oshiholekwa, nokupata embo fiyo opefimbo lexulilo.+ Vahapu otave ke li konga,* neshiivo lashili otali ka hapupala.”+
5 Opo nee ame, Daniel, onda tala nonda mona vamwe vavali va fikama penya, umwe okomunghulo ou womakungulukilo omeva, naumwe okomunghulo mukwao womakungulukilo omeva.+
6 Opo nee umwe okwa tya komulumenhu, oo a djala oshikutu sholiina,+ oo a li pombada yomeva omomakungulukilo: “Ope na efimbo li fike peni, opo exulilo loinima ei ikumwifi li uye?”
7 Opo nee onda uda omulumenhu oo a djala oshikutu sholiina, oo a li pombada yomeva omomakungulukilo, eshi a yelula eke laye lokolulyo neke laye lokolumosho keulu, nokwaana Kwaao ta kala nomwenyo fiyo alushe+ ta ti: “Otashi ka kala opefimbo la tulwa po, pomafimbo a tulwa po, netatafimbo.* Diva ashike shimha okunyanyaulwa moinhimbu kweenghono dovayapuki kwe uya pexulilo,+ oinima aishe ei otai uya pexulilo layo.”
8 Ashike paife, ame onda uda, ndele kanda li ndi udite ko;+ onghee onda ti: “Akutu, omwene wange, exulilo loinima ei otali ka kala la tya ngahelipi?”
9 Opo nee okwa ti: “Daniel, inda, molwaashi eendjovo edi odi na okukalekwa oshiholekwa, noda patwa fiyo opefimbo lexulilo.+
10 Vahapu otave ke likoshola vo vene nokulitokeka vo vene, notava ka yelifwa.+ Novakolokoshi otava ka katuka shihe li pandunge, nokape na omukolokoshi ta ka uda ko, ashike ovo ve na eendunge otava ka uda ko.+
11 “Nokudja pefimbo olo, eshi eyambo laalushe*+ la kufwa po nosho yo eshi oshinima, osho hashi etifa ehanauno, ya tulwa ponhele,+ otapa ka kala pe na omafiku 1 290.
12 “Ou ta kala a hafa oye ou ta kala a teelela nelididimiko,* nota fiki komafiku 1 335!
13 “Ndele shi na sha naave, inda fiyo okexulilo. Oto ka fuda po, ashike oto ka penduka, u pewe efyuululo loye* pexulilo lomafiku.”+
