Daniel 10:1-21
10 Modula onhinhatu yohamba Kores+ yaPersia, Daniel, oo ha ifanwa yo Beltesasar,+ okwa li a pewa ehololo, netumwalaka ola li loshili, nola li li na sha noupyakadi wa kwata moiti. Nokwa li a uda ko etumwalaka, nokwa li a pewa eudeko li na sha naasho a mona.
2 Momafiku oo, ame, Daniel, onda kala nda nyika oluhodi+ oivike itatu i yadi.
3 Inandi lya oikulya iwa, nomokanya kange inamu enda ombelela, ile omaviinyu, noinandi vava omaadi oule woivike itatu i yadi.
4 Mefiku eti-24 lomwedi wotete, ofimbo nda li komunghulo womulonga munene, Tigris,*+
5 onda tala pombada nonda mona omulumenhu a djala oshikutu sholiina,+ nomoshiya shaye omwa li ekwamo loshingoli sha dja kuUfas.
6 Olutu laye ola li ngaashi okrisolit,+ oshipala shaye osha li shi na eholokepo la fa lokashelu, omesho aye okwa li ngaashi eenyika da tema, omaoko aye neemhadi daye oda li tadi monika ngaashi ongopolo tai vadima,+ newi leendjovo daye ola li la fa euyaano leemhunga dovanhu.
7 Ame Daniel, aame ashike nda li nda mona emoniko olo; ovalumenhu, ovo nda li navo, kava li va mona emoniko.+ Onghee ova kwatwa koumbada munene, nova faduka po, ndele tava ka hondama.
8 Opo nee aame andike nda li nda fyaala po, naashi nda mona emoniko eli linene, onda mongoshoka neenghono, neholokepo lange ola li la lunduluka, nonda kanifa eenghono adishe.+
9 Opo nee onda uda ewi laye, eshi ta popi; ashike eshi nde mu uda ta popi onda kofa eemhofi didjuu oshipala shange sha twa medu.+
10 Opo nee eke ola kuma nge,+ nola ndjungandjunga nge, ndi penduke, omake ange a kwatelela pedu, nonda twa eengolo.
11 Opo nee okwa tya kwaame
“Akutu Daniel, ove omulumenhu e na ondilo unene,*+ yandja elitulemo keendjovo, odo ndi li poku ku lombwela. Paife kala ofika ponhele yoye, osheshi onda tumwa kwoove.”
Eshi a lombwela nge ngaho, onda fikama handi kakama.
12 Opo nee okwa tya kwaame: “Akutu Daniel. Ino kala wa tila.+ Eendjovo doye oda udika okudja kefiku lotete, olo wa yandja omutima woye u ude ko, nowe lininipika koshipala shaKalunga koye, nonde uya omolweendjovo doye.+
13 Ashike ohamba+ youhamba waPersia oya fikama i kondjife nge oule womafiku 21. Ndele Mikael,*+ umwe womeehamba dopombada elela,* okwe uya a kwafele nge; nonda kala opo popepi neehamba daPersia.
14 Onde uya ndi ku kwafele u ude ko osho tashi ka hanga oshiwana sheni pexulilo lomafiku,+ osheshi emoniko oli na sha nomafiku tae ke uya.”+
15 Eshi a lombwela nge eendjovo odo, onda fidimika oshipala shange pedu nonda kala nda mwena.
16 Opo nee umwe, oo a li ta monika a fa omunhu, okwa kuma omilungu dange,+ nonda makula okanya kange, ndele handi ti kwaao a fikama komesho yange: “Omwene wange, ohandi kakama omolwemoniko nokandi na eenghono.+
17 Onghee ongahelipi omupiya womwene wange ta dulu okupopya nomwene wange?+ Osheshi paife kandi na eenghono noinamu fyaala omufudo mwaame.”+
18 Oo a li ta monika a fa omunhu okwa kuma nge vali nokwa pameka nge.+
19 Opo nee okwa tya: “Ino kala wa tila,+ ove omulumenhu e na ondilo unene.*+ Ombili nai kale naave,+ kala wa pama, heeno, kala wa pama.” Ofimbo a li ta popi naame, onda li nda pamekwa, ndele handi ti: “Omwene wange popya, osheshi owa pameka nge.”
20 Opo nee okwa tya: “Mbela ou shii kutya omolwashike nde uyila kwoove? Paife ohandi shuna ndi ka lwife ohamba yaPersia.+ Shimha nda i, ohamba yaGreka otai uya.
21 Ashike ohandi ku lombwele oinima oyo ya shangwa momashangelo oshili. Kape na ou ta yambidida nge unene moinima ei, kakele kuMikael,+ ohamba yeni.+
