Oilonga yOvayapostoli 2:1-47
2 Ndele ofimbo efiku lOshivilo shOpentekoste+ la li metifa, aveshe ova li va ongala monhele imwe.
2 Ohaluka opa li pa holoka eweelelo tali di meulu, ngaashi omhepo tai pepe unene, ya kula, noya yadifa eumbo alishe omo va li ve li omutumba.+
3 Ndele ova mona omalaka a fa omundilo nokwa li a wila kombada yavo, keshe umwe elaka limwe.
4 Opo nee aveshe ova tililwa omhepo iyapuki+ noye va ningifa va dule okupopya omalaka a yoolokafana.+
5 Pefimbo opo muJerusalem omwa li Ovajuda ovatilikalunga ovo va li ve lihanena moiwana aishe kombada yedu.+
6 Konima yepopomo olo, ongudu yovanhu oya li ya ongala noya li ya kumwa, molwaashi keshe umwe okwa uda eshi ovahongwa tava popi melaka laye loshidalelwamo.
7 Ovanhu ovo ova li va kumwa neenghono, ndele tava ti: “Taleni, aveshe ovo tava popi kave fi hamba Ovagalilea?+
8 Osha enda ngahelipi, opo atushe tu kale tu va udite, eshi tava popi momalaka etu oshidalelwamo?*
9 Vamwe vomufye Ovaparti, Ovamedia,+ Ovaelami,+ ovakalimo vomuMesopotamia, Ovajudea, Ovakappadokia, Ovapontus novanhu vomoshitukulwa shaAsia,+
10 Ovafrigia, Ovapamfilia, Ovaegipiti novanhu vomoitukulwa yaLibia popepi naKireni, ovatalelipo va dja kuRoma, Ovajuda naavo va ninga veitavelo lOshijuda,+
11 Ovakreta nOvaarabia. Otwa uda tava popi momalaka etu oshidalelwamo kombinga yoinenelonga yaKalunga.”
12 Oshinima osho osha li she va kumwifa neenghono aveshe, ndele tava pulafana tava ti: “Eshi osha hala okutya ngahelipi?”
13 Ndele vamwe ova li tave va sheke tava ti: “Ova kolwa komaviinyu manyenye.”*
14 Petrus okwa fikama pamwe novayapostoli omulongo naumwe,+ ndele ta popi novanhu ovo mokule ta ti: “Ovajuda nye novakalimo amushe vomuJerusalem, shiiveni oshinima eshi nokupwilikina nelitulemo kwaashi handi mu lombwele.
15 Ovanhu ava inava kolwa ngaashi tamu ti, osheshi paife otundi onhinhatu.*
16 Kakele kaasho, osho osha xunganekwa okupitila momuprofeti Joel a ti:
17 ‘“Nomomafiku axuuninwa,” Kalunga osho ta ti, “Ohandi ka tilila omhepo yange kombelela aishe, novanamati veni novanakadona veni otava ka xunganeka, ovalumenhu veni ovanyasha otava ka mona omamoniko, novalumenhu veni ovanamido otava ka twa eendjodi,+
18 nokuli novapiya vange ovalumenhu novapiya vange ovakainhu ohandi ke va tilila omhepo yange imwe pomafiku oo, notava ka xunganeka.+
19 Nohandi ka holola oinenelonga* meulu, olo li li pombada, nomadidiliko kombada yedu, ohonde nomundilo noilemo yomwifi.
20 Etango otali ka laula, nomwedi otau ka shituka ohonde, ofimbo efiku laJehova* linene nolididilikwedi inali uya.
21 Nakeshe ou ta ifana edina Jehova* ota ka xupifwa.”’+
22 “Ovaisrael nye, pwilikineni eendjovo edi: Omulumenhu Jesus Omunasaret omwe mu ulikilwa kuKalunga moipafi okupitila moilonganghono, moinenelonga* nomomadidiliko oo Kalunga a longa mokati keni okupitila muye+ ngaashi ashike mu shi shii.
23 Omulumenhu oo omwe mu kwata po nomwe mu yandja momake ovakolokoshi ovo ve mu valela komuti nove mu dipaa.+ Kalunga okwa efa osho shi ningwe,+ molwaashi okwa li e shii osho tashi ka ningilwa Jesus.
24 Ndele Kalunga okwe mu nyumuna+ moku mu mangulula mouyehame* wefyo, molwaashi efyo kali na eenghono doku mu kwatela mo.+
25 David okwa popya kombinga yaJesus ta ti: ‘Ohandi kaleke alushe Jehova* komesho yange,* osheshi oku li kolulyo lange, opo ndiha tengauke nandenande.
26 Osho osha hafifa omutima wange nohandi popi nehafo linene. Nohandi* kala ndi na eteelelo,
27 molwaashi ito ka efa nge* ndi kale mOmbila* noito ka efa omudiinini woye a olele mo.+
28 Owa shiivifila nge eendjila domwenyo, noto ka hafifa nge moipafi yoye.’*+
29 “Ovamwatate, pitikeni nge ndi popye nda manguluka kombinga yatatekulululwa David kutya okwa fya nokwa pakwa,+ nombila yaye oko i li fiyo okunena.
30 Ndele molwaashi okwa li omuprofeti nokwa li e shii kutya Kalunga okwe mu anena kutya umwe womoludalo laye* ota ka kala omutumba kolukalwapangelo laye,+
31 okwa mona nokwa popya kombinga yenyumuko laKristus fimbo inali ningwa, kutya ina efiwa a kale mOmbila,* nombelela yaye inai olela mo.+
32 Jesus okwa nyumunwa kuKalunga, nafye atusheni eendombwedi dasho.+
33 Onghee hano molwaashi okwa tumbalekwa a kale kolulyo laKalunga,+ nokwa pewa omhepo iyapuki kuXe+ oyo ya udanekwa, okwe tu tilila osho mu wete nomu udite.
34 David ina londa a ya keulu, ndele okwa popya ta ti: ‘Jehova* okwa lombwela Omwene wange a ti: “Kala omutumba kolulyo lange,
35 fiyo ohandi ningi ovatondi voye onga oshilyatelo sheemhadi doye.”’+
36 Hano eumbo alishe laIsrael nali shiive kutya Jesus ou mwa valela komuti,+ Kalunga okwe mu ninga Omwene+ naKristus.”
37 Eshi va uda eendjovo odo, ode va kuma komitima, ndele tava ti kuPetrus nokovayapostoli vakwao: “Ovamwatate, oshike tu na okuninga po?”
38 Petrus okwa tya kuvo: “Lidilululeni,+ ndele keshe umwe womunye na ninginifwe+ medina laJesus Kristus, opo mu diminwe po omatimba eni+ notamu ka pewa oshali yomhepo iyapuki.
39 Jehova* Kalunga ote ke mu pa omhepo iyapuki+ amushe novana veni, naaveshe ovo ve li kokule nosho yo aveshe ovo ta ka ifana kuye.”+
40 Ndele okwa popya navo, e va udifila nawanawa nokwe va kumaida ta ti: “Liyoololeni ko kepupi eli lovakolokoshi, opo mu xupifwe.”+
41 Ovo va li va tambula ko nehafo eendjovo daye ova li va ninginifwa,+ nomefiku olo momuvalu wovaitaveli omwa li mwa wedwa ovanhu* 3 000.+
42 Ndele ova kala va diinina ehongo lovayapostoli, okukala pamwe,* okulya+ nokwiilikana.+
43 Ovayapostoli ova longa oinenelonga* ihapu nomadidiliko, novanhu aveshe* ova li va kwatwa koumbada.+
44 Aveshe ovo va ninga ovaitaveli ova kala pamwe nova li va tukulilafana oinima oyo va li ve na.
45 Ova li va landifa po oinima yavo+ nokutukulilafana oimaliwa she likolelela keemhumbwe dakeshe umwe.+
46 Ndele efiku keshe ova li hava ongala kotembeli ve na elalakano limwe, nohava i noikulya komaumbo e lili noku lili, ndele tave i tukulilafana nehafo linene nonehalo liwa.
47 Ova kala yo hava tange Kalunga nova li va hokiwa kovanhu aveshe. Pefimbo opo tuu opo, efiku keshe Jehova* okwa kala nokuhapupalifa omuvalu waavo tava ka xupifwa.+
Omashangelo opedu
^ Ile “momalaka oo twa nyama?”
^ Ile “komaviinyu mape.”
^ Sha hala okutya, 9:00 wongula lwaapo.
^ Ile “oikumwifilonga.”
^ Ile “moikumwifilonga.”
^ Ile tashi dulika, “meemhango.”
^ Ile “moipafi yange.”
^ Eln., “Nombelela yange.”
^ Ile “omwenyo wange.”
^ Ile “mo-Hades,” sha hala okutya koufi. Tala omafatululo oitya.
^ Ile “koshipala shoye.”
^ Eln., “womoshinena shaye.”
^ Ile “mo-Hades,” sha hala okutya, koufi. Tala Omafatululo oitya.
^ Ile “eemwenyo.”
^ Ile “okutukulilafana.”
^ Ile “oikumwifilonga.”
^ Ile “neemwenyo adishe.”
