Oilonga yOvayapostoli 7:1-60
7 Omupristeri munene okwa ti: “Oinima oyo tai popiwa oyoshili tuu?”
2 Stefanus okwa ti: “Ovalumenhu, ovamwatate nootate, pwilikineni. Kalunga koshinge okwe lihololela tatekulululwa Abraham, eshi a li muMesopotamia, fimbo ina ya a ka kale kuHaran,+
3 ndele ta ti kuye: ‘Dja mo medu leni, nokufiya po ovapambele voye nokuuya koshilongo osho handi ke ku ulikila.’+
4 Opo nee okwa dja mo medu lOvakaldea nokwa ya a ka kale kuHaran. Konima eshi xe a fya,+ Kalunga okwe mu lombwela a tembukile moshilongo omo mu li paife.+
5 Ndele Kalunga ine mu pa nande okatukulwa kanini kedu, ashike okwe mu udanekela kutya otali ningi laye, nokonima, ololudalo laye,*+ nonande pomhito opo ka li e na oludalo.
6 Kakele kaasho, Kalunga okwe mu lombwela kutya oludalo laye* otali ka ninga ovanailongo medu lihe fi lalo, novanhu otave ke li ninga ovapika notave ke li hepeka* oule womido 400.+
7 Kalunga okwa ti: ‘Ohandi ka tokola oshiwana osho tashi ke va ninga ovapika.+ Opo nee otava ka dja mo notava ka longela nge oilonga iyapuki monhele ei.’+
8 “Kalunga okwa ninga yo ehangano lepitotanda naAbraham,+ nokwa ninga xe yaIsak,+ nokwe mu pitifa etanda mefiku etihetatu,+ na Isak okwa dala* Jakob, nomuJakob omwa dja omitwe* 12 domaukwaneumbo.
9 Nomitwe domaukwaneumbo oda li da twila Josef ondubo,+ ndele tadi mu landifa po kuEgipiti.+ Ashike Kalunga okwa kala pamwe naye,+
10 ndele okwe mu xupifa momaudjuu aye aeshe nokwe mu pa ounongo, opo a kale a hokiwa kuFarao, ohamba yaEgipiti. Opo nee Farao okwe mu nangeka po a pashukile Egipiti neumbo laye alishe.+
11 Ndele muEgipiti nomuKaanan ashishe omwa li mwa holoka ondjala inene, nootatekulululwa kava li ve na eshi tava li.+
12 Eshi Jakob a uda kutya kuEgipiti oku na oikulya,* okwa tuma ko ootatekulululwa oshikando shotete.+
13 Oshikando oshitivali, Josef okwe lihololela ovamwaxe, opo nee Farao okwa shiiva ovapambele vaJosef.+
14 Josef okwa tumina xe, Jakob, etumwalaka, opo e uye kuEgipiti novapambele vaye aveshe;+ kumwe aveshe ova li 75.*+
15 Opo nee Jakob okwa ya kuEgipiti,+ ndele oko a fila,+ nootatekulululwa oko yo va fila.+
16 Ndele ove va twala kuSekem noku va paka mombila oyo Abraham a li a landa kovanamati vaHamor, muSekem.+
17 “Eshi efimbo laKalunga lokuwanifa po eudaneko olo a li a udanekela Abraham la li pokufika, Ovaisrael, ovo va li muEgipiti, ova li va hapupala neenghono,
18 fiyo osheshi muEgipiti mwa holoka ohamba imwe i lili, oyo ihe shii Josef.+
19 Ohamba oyo oya li ya kengelela ovanhu vetu, noye va lombwela va ekeleshi ounona vavo, opo vaha kale nomwenyo.+
20 Pefimbo opo opo pa dalwa Moses nokwa li muwa koshipala shaKalunga. Okwa kala* meumbo laxe oule weemwedi nhatu.+
21 Ndele eshi ve mu fiya po,*+ omonakadona waFarao okwe mu kufa po, ndele te mu tekula e li onga omonamati waye.+
22 Onghee Moses okwa li a hongwa ounongo aushe wOvaegipiti. Okwa li ha popi nouladi nokwa longa oilonga inene.+
23 “Eshi Moses a wanifa omido 40, okwa li a diladila momutima waye* a ka talele po* ovamwaxe, ovanamati vaIsrael.+
24 Eshi a mona Omuegipiti umwe ta ungaunga naumwe womovamwaxe shihe li pauyuki, okwa popila omumwaxe mokudipaa Omuegipiti.
25 Moses okwa li ta diladila kutya ovamwaxe otave shi didilike mo kutya oye ta longifwa kuKalunga, opo va xupifwe, ashike kava li ve shi didilika mo.
26 Efiku la landula ko, okwe uya kovamwaxe nokwa hanga vavali vomuvo tava lwifafana, opo nee okwe va anuna va pange ombili ta ti: ‘Ovalumenhu nye, nye ovamwainafana. Omolwashike tamu ningafana nai?’
27 Ndele ou a li ta ningi nai mukwao okwa undula Moses ta ti: ‘Olyelye e ku hoolola u ninge omupangeli nomutokoli wetu?
28 Hano owa hala okudipaa nge, ngaashi wa dipaele Omuegipiti onghela?’
29 Eshi Moses a uda ngaho, okwa faduka po, ndele ta i a ka kale omunailongo kuMidian, oko a dalela ovanamati vavali.+
30 “Eshi pa pita omido 40, omweengeli okwe mu lihololela mombuwa yokOmhunda yaSinai momundilo wa tema moshixwa sheno.+
31 Eshi Moses e shi mona, okwa li e shi kuminwa. Ndele ofimbo a li ta ehene popepi nasho e shi tale nawa, okwa uda ondaka yaJehova* tai ti:
32 ‘Aame Kalunga kooxokulululwa, Kalunga kaAbraham nokaIsak nokaJakob.’+ Moses okwa li a hovela okukakama noka li vali a hala oku shi tala nawa.
33 Jehova* okwa tya kuye: ‘Dula ko eenghaku keemhadi doye, molwaashi onhele apa wa fikama oiyapuki.
34 Onda mona shili okuhepekwa kwoshiwana shange osho shi li muEgipiti, nonda uda ekemo lasho,+ nonde uya ndi shi xupife. Paife ila, ohandi ku tumu kuEgipiti.’
35 Moses oo va li va dina, eshi va tile: ‘Olyelye e ku hoolola u ninge omupangeli nomutokoli?’+ oye a li omupangeli nomumangululi wavo a tumwa kuKalunga+ okupitila momweengeli, oo a li e mu holokela poshixwa sheno.
36 Omulumenhu oo okwe va pitifa mo,+ nokwa longa oinenelonga* muEgipiti+ nopEfuta Litilyana+ nosho yo mombuwa oule womido 40.+
37 “Moses ou oye a lombwelele Ovaisrael ta ti: ‘Kalunga ote ke mu pa omuprofeti ngaashi ame, ta di mokati kovamwaxo.’+
38 Oye tuu ou a li pamwe noshiwana shaIsrael mombuwa, a li nomweengeli,+ oo a popya naye+ kOmhunda yaSinai nosho yo nootatekulululwa. Okwa li a pewa etumwalaka kuKalunga e li tu shiivifile.+
39 Ootatekulululwa ova li va anya okudulika kuye, ndele kava li ve mu tambula ko,+ nomomitima davo ova li va shuna kuEgipiti,+
40 eshi va ti kuAron: ‘Tu ningila ookalunga ve tu kwatele komesho. Osheshi katu shi shii kutya oshike sha ningilwa Moses, oo e tu kufa medu laEgipiti.’+
41 Opo nee pefimbo olo, ova li va ninga oshikalunga sha fa onhana, ndele tave shi yambele omayambo nova li va hovela okuhafela oilonga yomake avo.+
42 Onghee Kalunga okwe va pilamena nokwe va efa va longele etangakwaita lokeulu,+ ngaashi sha shangwa kovaprofeti va ti: ‘Mbela aame ngoo mwa kala tamu yambele omayambo oule womido 40 mombuwa, nye eumbo laIsrael?
43 Ndele ohamu longele oihongwafano oyo mwe lihongela ngaashi etwali loshikalunga Molok+ noshikalunga shonyofi Refan oyo hamu humbata. Onghee ohandi ke mu twala kokule nokuli naBabilon.’+
44 “Eshi ootatekulululwa va li mombuwa, ova li ve na etwali olo tali ulike kutya Kalunga oku li pamwe navo, na Moses okwa li e li tunga ngaashi naanaa Kalunga a li e mu lombwela nokwe mu ulikila.+
45 Opo nee ootatekulululwa ove li pewa li li efyuululo nove li twala pamwe naJosua kedu, omo mwa li oiwana+ oyo Kalunga a ta mo moipafi yootatekulululwa.+ Ndele ova kala nalo fiyo opefimbo laDavid.
46 David okwa li a hokiwa kuKalunga nokwa li a pula a pewe oufembanghenda wokutungila Kalunga kaJakob onhele.+
47 Ndele Salomo oye a li a tungila Kalunga onhele.+
48 Ashike Omukombadambada iha kala meenhele da tungwa nomake,+ ngaashi ashike omuprofeti umwe a ti:
49 ‘Eulu olo olukalwapangelo lange,+ nedu olo oshilyatelo sheemhadi dange.+ Otamu ka tungila nge eumbo la tya ngahelipi? Jehova* osho ta ti. Ile onhele yange yokutulumukila oi li peni?
50 Mbela eke lange halo la shita oinima aishe ei?’+
51 “Oohamitwe dikukutu nye, ovo mwa fitika omatwi eni noinamu pita etanda momitima deni, alushe otamu kondjifa omhepo iyapuki, ngaashi ooxokulululwa va li hava ningi.+
52 Omuprofeti elipi po ina hepekwa kooxokulululwa?+ Ova dipaa ovaprofeti ovo va shiivifa komesho yefimbo okuuya kwomuyuki+ oo mwa kengelela nomwa dipaa.+
53 Omwa pewa Omhango okupitila movaengeli,+ ndele inamu i diinina.”
54 Eshi va uda eendjovo odo, ova li va handuka unene* nova li va hovela okulikwesha komayoo.
55 Ndele Stefanus, oo a li e yadi omhepo iyapuki, okwa tala keulu nokwa mona oshinge shaKalunga noshaJesus e li ofika kolulyo laKalunga,+
56 ndele ta ti: “Taleni! Ondi wete eulu la yeuluka nOmona womunhu+ e li ofika kolulyo laKalunga.”+
57 Opo nee ova ingida pombada nove likwata komatwi, ndele tave mu totele aveshe.
58 Ove mu umbila kondje yoshilando nova hovela oku mu denga nomamanya.+ Eendombwedi+ odo da li tadi mu pataneke oda li da tula oikutu yado yokombada peemhadi domulumenhu omunyasha wedina Saul.+
59 Fimbo va li tava denge Stefanus nomamanya, okwa indila ta ti: “Omwene Jesus, tambula omwenyo wange.”*
60 Opo nee okwa twa eengolo, ndele ta ingida pombada ta ti: “Jehova,* ino va valulila etimba olo.”+ Konima eshi a popya ngaho, okwa kofa po mefyo.
Omashangelo opedu
^ Eln., “olombuto yaye.”
^ Eln., “ombuto yaye.”
^ Ile “nokuungaunga nalo nai.”
^ Ile “ootatekulululwa.”
^ Ile tashi dulika, “okwa ninga sha faafana.”
^ Ile “oku na oilya.”
^ Ile “eemwenyo 75.”
^ Ile “Okwa kulila.”
^ Ile “fiya poluhaela.”
^ Ile “okwa li a tokola.”
^ Ile “a ka konakone onghalo.”
^ Ile “oikumwifilonga.”
^ Ile “ova li va tuwa pomitima.”
^ Eln., “omhepo yange.”
