Oilonga yOvayapostoli 13:1-52
13 Meongalo lomuAntiokia omwa li ovaprofeti novahongi ava:+ Barnabas, Simeon oo a li ha ifanwa Nigeri, Lukius Omukireni, Manahen oo a fikola pamwe naHerodes omupangeli woshitukulwalongo nosho yo Saul.
2 Jehova* okwa li a popya navo okupitila momhepo iyapuki fimbo va li tave mu longele* nokulidilika oikulya ta ti: “Hoololeni Barnabas naSaul,+ opo va ka longe oshilonga osho handi va pe.”+
3 Eshi ve lidilika nokwiilikana, ove va tenheka omake nove va lekela.
4 Ovalumenhu ovo va tumwa kuKalunga okupitila momhepo iyapuki ova ya kuSeleukia, naashi va dja oko ova ya noskepa kuKipro.
5 Eshi va fika muSalamis, ova li va hovela okuudifa eendjovo daKalunga moinagoga yOvajuda. Ova li yo va ya naJohannes oo a li te va yakula.*+
6 Eshi va dja muSalamis ova ya kuPafo nova shakena nomulumenhu Omujuda wedina Barjesus, oo a li omhule nomuprofeti omunaipupulu.
7 Omulumenhu oo okwa li ha kala pomupangeli* Sirgius Paulus, oo a li omulumenhu omunaendunge. Molwaashi Sirgius Paulus okwa li a halelela okuuda eendjovo daKalunga, okwa li a ifana Barnabas naSaul.
8 Ndele omhule oyo hai ifanwa Elimas (osheshi edina layo osho tali ti) oya li tai kendabala okukelela omupangeli aha itavele Omwene.
9 Opo nee Saul, oo a li yo ha ifanwa Paulus, okwa li a tililwa omhepo iyapuki, ndele te mu tale noku mu konenena
10 ta ti: “Omulumenhu ove u yadi oihelele nowii aushe, omona wOndiaboli+ nou tonde ouyuki, omolwashike to pengifa omahongo aJehova?*
11 Tala! Jehova* ote ku handukile, ndele to ningi omupofi noito ka mona ouyelele wetango oule wefimbo.” Diva okwa mona oshinima sha fa omwifi nokwa hangwa komilaulu, nokwa li ta pungauka ta kongo ou te mu kwata mokwooko.
12 Eshi omupangeli a mona osho sha ningwa po, okwa ninga omwiitaveli, molwaashi okwa li a kuminwa ehongo laJehova.*
13 Paulus novaendi pamwe naye ova dja muPafo noskepa va ya kuPerge muPamfilia. Ndele Johannes+ okwe va fiya ko nokwa shuna kuJerusalem.+
14 Eshi va dja kuPerge ova ya kuAntiokia muPisidia. Opo nee ova ya, ndele tava kala omutumba moshinagoga+ mefiku lEshabata.
15 Konima eshi Omhango nomambo ovaprofeti a leshwa,+ ovakulunhu voshinagoga ova lombwela Paulus naBarnabas tava ti: “Ovamwatate, ngeenge omu na ondjovo yetwomukumo i lombweleni ovanhu.”
16 Paulus okwa fikama nokwe va udikila neke va mwene, ndele ta ti:
“Ovaisrael nye, nanye yo ovo hamu tila Kalunga, pwilikineni.
17 Kalunga kOvaisrael okwa hoolola ootatekulululwa fimbo va li ovanailongo muEgipiti, nokwa longifa eenghono daye dinene e va mangulule mo.+
18 Okwa kala te ve lididimikile mombuwa oule womido 40 lwaapo.+
19 Konima eshi a hanauna po oiwana iheyali, oyo ya li medu laKaanan, edu olo okwe li pa ootatekulululwa li li efyuululo.+
20 Oinima aishe oyo oya ningwa moule womido 450 lwaapo.
“Konima yaasho, okwa nangeka po ovatokolipangeli ve va wilike fiyo opefimbo lomuprofeti Samuel.+
21 Ndele lwanima, ova ka pula va pewe ohamba,+ na Kalunga okwe va pa Saul, omona waKis, omulumenhu womepata laBenjamin,+ oo e va pangela oule womido 40.
22 Konima eshi Kalunga a kufa Saul koshipundi, okwa nangeka po David a ninge ohamba,+ nokwa li a popya kombinga yaye ta ti: ‘Onda hoolola David, omona waIsai,+ omulumenhu oo ha hafifa omutima wange;+ ota ka longa ashishe osho nda hala.’
23 Kalunga okwa li a udaneka kutya moludalo* lomulumenhu oo omo mwa li tamu ka dja Jesus, oo a li ta ka xupifa Ovaisrael.+
24 Ndele fimbo oo i ne uya, Johannes okwa kala ta udifile Ovaisrael aveshe va ninginifwe, opo va ulike kutya ove lidilulula.+
25 Eshi Johannes a li ta wanifa po oshilonga shaye, okwa li ha ti: ‘Ame haame ou tamu diladila. Ndele taleni! Ou te uya konima yange inandi wana nokuli okumangulula eemwiya deenghaku daye.’+
26 “Ovamwatate nye, oludalo laAbraham nosho yo amushe ovo hamu tila Kalunga, otwa tuminweni ondjovo ei yexupifo.+
27 Ovajerusalem novapangeli vavo inava didilika mo omuxupifi oo, ndele eshi ve mu tokola ova wanifa po osho sha popiwa kovaprofeti,+ osho sha li hashi leshwa moipafi alushe meshabata.
28 Nonande kava li va mona sha shoku mu dipaifa,+ ova li va pula Pilatus e mu valelife komuti.+
29 Eshi va wanifa po oinima aishe oyo ya shangwa i na sha naye, ove mu kufa ko komuti noku mu paka mombila.*+
30 Ndele Kalunga okwe mu nyumuna koufi,+
31 nokwa monika omafiku mahapu kwaavo a li a ya pamwe navo kuGalilea nofiyo okuJerusalem. Naavo otava yandje oumbangi kovanhu u na sha naye.+
32 “Onghee ohatu mu udifile onghundana iwa i na sha neudaneko olo la udanekelwa ootatekulululwa.
33 Kalunga okwe li tu wanifila filufilu tu li oludalo lavo, eshi a nyumuna Jesus,+ ngaashi sha popiwa mepsalme etivali la ti: ‘Ove omona wange; nena onda ninga xo.’+
34 Ndele molwaashi okwe mu nyumuna koufi noita ka ola vali, okwa ti: ‘Ohandi ke mu ulikila eendjovo dohole i na oudiinini, odo nda udanekela David, odo di shii okulineekelwa.’+
35 Epsalme limwe vali ola ti: ‘Ito ka efa omudiinini a ole.’+
36 Kakele kaasho, David okwa longela Kalunga* pefimbo laye, okwa fya, ndele ta pakwa pooxekulululwa nokwa ola.+
37 Ashike ou a nyumunwa kuKalunga ina ola.+
38 “Ovamwatate, ohandi mu udifile, opo mu shiive kutya Kalunga ote ke mu dimina po omatimba omolwefyo lomulumenhu ou.+
39 Omhango yaMoses+ kaya li ye mu ningifa mu kale ovayuki, ndele omolwefyo lomulumenhu ou, Kalunga ota ka tala ko aveshe ovo tava itavele ve li ovayuki.+
40 Onghee kaleni mwa lungama, opo muha ningilwe osho sha popiwa momambo ovaprofeti kwa tiwa:
41 ‘I taleni, nye ovasheki, nokukala mwa kumwa, nokuxula po, osheshi ohandi longo oilonga pefimbo leni, oilonga oyo itamu ka itavela nandenande nokuli nonande umwe oku i mu yelifile.’”+
42 Eshi Paulus naBarnabas va li tava di moshinagoga, ovanhu ove va indila, opo va popye vali kombinga yoinima oyo mEshabata tali landula.
43 Konima eshi va dimbuka moshinagoga, Ovajuda vahapu nosho yo ovo va ninga veitavelo lOshijuda, ovo va li hava longele Kalunga, ova shikula Paulus naBarnabas ovo ve va ladipika va diinine efilonghenda laKalunga.+
44 MEshabata la landula ko, ovanhu aveshe moshilando ova li va ongala, opo va pwilikine eendjovo daJehova.*
45 Eshi Ovajuda va mona eengudu dovanhu, ova li va handuka unene nova li va hovela okusheka nokupataneka osho Paulus a li ta popi.+
46 Paulus naBarnabas ove va lombwela nouladi tava ti: “Onye mwa li mu na okulombwelwa tete eendjovo daKalunga.+ Ndele molwaashi inamu hala oku di tambula ko notamu ulike kutya inamu wana oku ka mona omwenyo waalushe, taleni! paife ohatu ka udifila oiwana imwe.+
47 Osheshi Jehova* okwe tu lombwela ta ti: ‘Onde ku nangeka po u li ouyelele koiwana, opo u kale exupifo fiyo okominghulo dedu.’”+
48 Eshi ovanhu vomoiwana imwe va uda ngaho, ova li va hafa nova hovela okutanga Jehova* omolweendjovo daye, naaveshe ovo va li va halelela shili omwenyo waalushe ova ninga ovaitaveli.
49 Ndele eendjovo daJehova* oda li da tandavela moshilongo ashishe.
50 Opo nee Ovajuda ova xwaxwameka ovakainhu ovanamadina ovo va li hava tila Kalunga, novalumenhu ovanenenhu vomoshilando, opo va hepeke+ Paulus naBarnabas noku va taataa mo moshilando shavo.
51 Paulus naBarnabas ove lipupula ondwi keemhadi nova ya kuIkonium.+
52 Ndele ovahongwa ova li va twikila okutililwa omhepo iyapuki nova li va hafa unene.+
