Onhumwafo onhivali yaPetrus 1:1-21
1 Ame Simon Petrus, omupiya nomuyapostoli waJesus Kristus, ohandi mu shangele ovo mu na eitavelo ngaashi fye* li na ondilo olo tu na omolwouyuki waKalunga nowOmuxupifi wetu, Jesus Kristus:
2 Efilonghenda nombili nai mu hapupalifilwe okupitila meshiivo lokushiiva+ Kalunga naJesus Omwene wetu,
3 osheshi eenghono daye ode tu pa* oinima aishe oyo tai tu kwafele tu kale nomwenyo notu longele Kalunga netilofimaneko okupitila meshiivo lashili Laao e tu ifanena+ oshinge shaye nosho yo ouwa waye.
4 Kalunga okwe tu pa* omaudaneko a denga mbada okupitila moinima oyo,+ opo mu ka kale nomaukwatya a fa aye mu li oishitwa yopamhepo,+ nomwa manguluka ko kenyonauko lounyuni olo hali etifwa komahalo mai.*
5 Onghee hano ningeni eenghendabala da mana mo,+ opo keitavelo leni mu wede ko ouwa,+ nokouwa eshiivo,+
6 keshiivo elipangelo, kelipangelo+ elididimiko, kelididimiko okulongela Kalunga netilofimaneko,+
7 kokulongela Kalunga netilofimaneko ohole youmwainafana, nokohole youmwainafana ohole.+
8 Ngeenge omwa kala mu na omaukwatya oo pauyadi, otamu ka longifa eshiivo leni lashili li na sha nOmwene wetu, Jesus Kristus, opo mu kale hamu imike oiimati nomuha sholole.+
9 Ngeenge ope na umwe ehe na omaukwatya oo, okwa twika, ke wete ouyelele*+ nokwa dimbwa kutya okwa diminwa po omanyono aye+ onale.
10 Onghee hano ovamwatate, longeni noudiinini, opo mu kale vamwe vomwaavo va ifanwa+ nova hoololwa kuKalunga, osheshi ngeenge omwa kala tamu kulike omaukwatya oo, otamu kala ovadiinini.+
11 Kungaho otamu ka mona filufilu* omhito yokuya mOuhamba waalushe+ wOmwene nOmuxupifi wetu Jesus Kristus.+
12 Onghee onda kala alushe nda hala oku mu dimbulukifa oinima oyo, nonande omu i shii nale nomwa pamenena moshili oyo mwe lihonga.
13 Ndele ondi wete sha yuka fimbo ndi li metwali* eli,+ ndi mu dimbulukife vali oinima oyo,+
14 eshi ndi shii kutya etwali eli ohandi li fiye po mafiku, ngaashi Omwene wetu, Jesus Kristus, a shiivifila nge.+
15 Ohandi longo alushe noudiinini, opo mu dule okudimbuluka* kunye vene oinima oyo, eshi handi ka ya.
16 Eshi twe mu shiivifila shi na sha neenghono nosho yo okukala po kwOmwene wetu, Jesus Kristus, inashi kanghamena komahokololo oipupulu a totwa kovanhu, ndele otwa mona efimano laye linene.+
17 Osheshi okwa pewa kuKalunga, Xe, efimano noshinge, eshi a lombwelwa eendjovo edi* okupitila moshinge shinene: “Ou Omona wange omuholike, ou nde mu hokwa.”+
18 Eendjovo odo da dja meulu otwe di uda, eshi twa li pamwe naye komhunda iyapuki.
19 Otu na oushili kutya omaxunganeko otaa ka wanifwa po, nomolwaasho sha yuka okuyandja elitulemo komaxunganeko oo e li ngaashi olamba+ tai minikile momilaulu, sha hala okutya momitima deni, fiyo osheshi kwa sha, nonyofi yongula ya pita.+
20 Omu shi shii kutya kape na exunganeko lopaMishangwa la kanghamena komadiladilo opanhu.
21 Osheshi kape na nande exunganeko la etwa po kehalo lomunhu,+ ndele ovanhu ova popya eendjovo daKalunga tava wilikwa* komhepo iyapuki.+
Omashangelo opedu
^ Ile “eitavelo la faafana, osho shi li oufembanghenda kufyeni atusheni okukala tu li na.”
^ Ile “ode tu pa oshali.”
^ Ile “okwe tu pa oshali.”
^ Ile “komahalo opamilele a pitilila.”
^ Ile tashi dulika, “omupofi, iha mono kokule.”
^ Ile “otamu ka pewa pauyadi.”
^ Ile “mofaila,” sha hala okutya, olutu laye lopambelela.
^ Ile “okupopya.”
^ Eln., “kondaka ei.”
^ Eln., “twaalelwa.”
