Onhumwafo onhivali yaPetrus 2:1-22
2 Ndele ngaashi pa holokele ovaprofeti ovanaipupulu mokati kovanhu, otapa ka holoka yo ovahongi ovanaipupulu mokati keni.+ Ovanhu va tya ngaho otava ka eta etukauko,* tave ke lidimbika ou e va kulila,*+ notava ka hanaunwa po diva omolweenghatu davo da tya ngaho.
2 Kakele kaasho, vahapu otava ka shikula oikala yavo yokunyona nopehe na ouxwenge,*+ noshili otai ka shekwa omolwavo.+
3 Shimwe vali, otave ke mu kengelela neendjovo doipupulu omolwolwisho. Ndele ehandukilo lavo, olo va tokolelwa nale+ itali kala ko, nehanauno lavo otali uya shili.+
4 Kalunga ina efa nandenande ovaengeli ovo va nyona,+ ndele okwe va handukila nokwe va ekela mo-Tartarus,*+ e va manga nomalyenge* va kale momilaulu, opo va teelele etokolo lavo.+
5 Okwa li yo a handukila ounyuni wonale,+ eshi a li a eta eyelu mounyuni wovahenakalunga,+ ndele okwa xupifa Noa, omuudifi wouyuki,+ pamwe navakwao vaheyali.+
6 Okwa li a tokola Sodom naGomorra, eshi e i xwika po filufilu,+ naasho oshi li elondwelo kovahenakalunga li na sha naasho tashi ka ningwa po.+
7 Nokwa xupifa omuyuki Lot,+ oo a li ha nyematekwa neenghono koikala yovakolokoshi yokunyona nopehe na ouxwenge* —
8 osheshi efiku nefiku omulumenhu oo okwa hepeka omwenyo* waye wouyuki omolwoilonga ihe nomhango oyo a mona nokwa uda, ofimbo a li mokati kavo.
9 Onghee Jehova* oku shii okuxupifa ovo hava longele Kalunga netilofimaneko momayeleko,+ ndele ota ka hanauna* po ovahenouyuki mefiku letokolo,+
10 unene tuu ovo hava lalakanene okushundula* omalutu avamwe+ nova dina eenghonopangelo.*+
Ovahongi ovanaipupulu ihava yavala okulonga owii nove na omitwe dikukutu, noihava tila okupopila mowii ovatumbalekwa,
11 ofimbo ovaengeli, nonande ove na eenghono dinene ve va dule, ihave va ula omalaka mai, molwaashi ova fimaneka Jehova.*+
12 Ashike ovalumenhu ovo, ngaashi ashike oinamwenyo ihe na eendunge oyo hai dalwa,* opo i kwatwe nokudipawa, ohava popile mowii oinima vehe i shii.+ Otava ka hanaunwa po omolwoilonga yavo youkolokoshi.
13 Otava ka handukilwa shi li ondjabi omolwoilonga yavo youkolokoshi.
Ohava hafele okuwanifa po omahalo avo opambelela+ nokuli nomutenya. Ova fifa ohoni va fa onhongo i li koikutu noipute moshipala, eshi hava xumifa komesho omahongo oipupulu nohava hafele okupukifa vamwe.+
14 Omesho avo oku yadi enyonohombo,+ ihava efa po okulonga owii nohava pukifa ovo inava pama.* Omitima davo oda deulilwa olwisho. Vo ovana vefingo.
15 Ova efa po ondjila ya yuka nova twalwatwalwa. Ova shikula ondjila yaBileam+ omona waBeor, oo a li e hole ondjabi yokulonga owii,+
16 ndele okwa li a hanyenwa, molwaashi okwa li a nyona omhango.+ Oshinamwenyo osho hashi humbata omitengi tashi popi ngaashi omunhu osha kelela omuprofeti oo aha shikule ondjila ya puka.+
17 Ova fa eefifiya dihe na omeva nosho yo oilemo tai twalwatwalwa koshikungulu shomhepo, nova tuvikililwa omilaulu fokofoko.+
18 Ohava popi oinima ya fa ya fimana, ndele oyongaho elela. Ohava pukifa ovanhu ovo tava kendabala okweefa po okulonga owii+ mokuxwaxwameka omahalo avo opambelela+ nokunyona nopehe na ouxwenge.*
19 Ohava udanekele ovanhu emanguluko, ofimbo vo ve li ovapika voulunde,+ osheshi keshe oo a findwa kuumwe oha ningi omupika waye.*+
20 Ova li va efa po okulonga oilonga ii younyuni+ omolweshiivo lokushiiva Omwene nOmuxupifi Jesus Kristus, ndele ova shuna vali mokulonga owii, nowii ohau va findi; onghee onghalo yavo yaxuuninwa oya naipala i dule ei yotete.+
21 Oshixwepo ngeno va li inava shiiva ondjila youyuki shi dulife eshi ve i shiiva, ndele tava efa po oipango iyapuki oyo va pewa.+
22 Ova wanifilwa eyeletumbulo eli tali ti: “Ombwa oya alukila onghungo yayo, noshingulu sha koshwa otashi alangata monhata.”+
Omashangelo opedu
^ Ile “oimhanga.”
^ Eln., “mwene wavo,” sha hala okutya, Jesus.
^ Ile “nopehe na okufya ohoni.” Oshitya shOshigreka aselgeia shi li pauhapu. Tala Omafatululo oitya.
^ Tala Omafatululo oitya.
^ Ile tashi dulika, “e va tula momambulukwena.”
^ Ile “nopehe na okufya ohoni.” MOshigreka, aselgeia. Tala Omafatululo oitya.
^ Tala Omafatululo oitya.
^ Eln., “xulifa.”
^ Ile “okunyateka.”
^ Ile “noinava fimaneka oovene.”
^ Ile “ya shitwa.”
^ Ile “eemwenyo odo inadi pama.”
^ Ile “nokukatuka onghatu nopehe na okufya ohoni.” Oshitya shOshigreka aselgeia shi li pauhapu. Tala Omafatululo oitya.
^ Ile “a findwa koshinima shonhumba oha ningi omupika washo.”
