Onhumwafo yotete yaPetrus 3:1-22
3 Sha faafana, nye ovakulukadi, dulikeni kovashamane veni,+ opo ovashamane ovo ihava dulika keendjovo daKalunga, va findwe kelihumbato leni, nonande kape na eendjovo,+
2 molwaashi ove wete elihumbato leni liwa+ naashi hamu va fimaneke neenghono.
3 Inamu kala ashike tamu yandje elitulemo kewapalo lokombada, ngaashi okupandwa, okudjala oulyenge voshingoli,+ ile oikutu yondilo,
4 ndele yandjeni elitulemo kewapalo olo itali xulu po, ounhu womeni womomutima, sha hala okutya okukala nengungumano nosho yo nomwenyo muwa,+ omaukwatya oo Kalunga a tala ko a fimanenena.
5 Osheshi novakainhu ovayapuki vonale, ovo va li ve lineekela Kalunga, navo ova li hava yandje elitulemo kewapalo olo itali xulu po, va li hava dulika kovashamane vavo,
6 ngaashi ashike Sara a li ha dulika kuAbraham nokwe mu ifana omwene.+ Ndele nye otamu ningi ovana vaSara, ngeenge omwa twikile okulonga ouwa muhe na oumbada.+
7 Nye ovashamane, sha faafana, twikileni okuungaunga novakulukadi veni neendunge,* opo omailikano eni a udike kuKalunga. Ungaungeni navo nefimaneko+ ngaashi tamu ungaunga noiyuma inai pama, molwaashi navo otava ka fyuulula omwenyo pamwe nanye+ omolwefilonghenda laKalunga.
8 Shimwe vali, amushe kaleni mu na ediladilo limwe,*+ oukwao wananghali, ohole youmwainafana, olukeno+ nelininipiko.+
9 Inamu lishunifila owii,+ ile omatukano.+ Ndele ponhele yaasho, nangekeni noupuna vakweni,+ molwaashi Kalunga okwe mu hoolola mu ninge ngaho, opo nanye e ke mu nangeke noupuna.
10 Osheshi “keshe oo e hole omwenyo nokwa hala okumona omafiku mawa na lungamene elaka laye liha popye eendjovo dii,+ nomilungu daye diha popye eendjovo doukengeleledi.
11 Na efe po okulonga owii,+ ndele ta longo ouwa;+ na lalakanene ombili noku i kaleka po.+
12 Osheshi omesho aJehova* ohaa tale ovayuki, nomatwi aye ohaa pwilikine komaindilo avo,+ ndele Jehova* oha pungulula ko oshipala shaye kwaavo hava longo oilonga ii.”+
13 Olyelye te ke mu ningila owii, ngeenge omu na ouladi wokulonga ouwa?+
14 Ndele nonande otamu hepekelwa ouyuki, kaleni mwa hafa.+ Onghee hano inamu tila osho ovanhu hava tila,* noinamu piyaanekwa kusha.+
15 Yapuleni Kristus momitima deni e li Omwene, opo mu kale mu shii okunyamukula keshe oo te mu pula ekanghameno leteelelo olo mu na, tamu shi ningi nomwenyo muwa+ nonefimaneko linene.+
16 Kaleni mu na eliudo liwa,+ nonande otamu popilwa mowii, opo ovo tave mu popile mowii va fifwe ohoni,+ molwaashi omu na elihumbato liwa mu li ovashikuli vaKristus.+
17 Osheshi oshiwa okuhepekwa, molwaashi tamu longo ouwa,+ ngeenge Kalunga okwe shi pitika, shi dulife okuhepekwa, molwaashi tamu longo owii.+
18 Osheshi Kristus okwa fya omolwomatimba lumwe aluke,+ omuyuki a fila ovalunde,+ opo e mu twale kuKalunga.+ Okwa dipawa pambelela,+ ndele okwa nyumunwa pamhepo.+
19 E li omunhu wopamhepo, okwa ya a ka udifile ovaengeli ovo va li modolongo,+
20 ovo va li inava dulika pefimbo laNoa, eshi Kalunga a li a teelela nelididimiko,*+ ofimbo onguluwato ya li tai tungwa,+ omo ovanhu vanini, sha hala okutya eemwenyo* hetatu da xupifilwa momeva.+
21 Osho osha faafana neninginifo olo tali mu xupififa kunena okupitila menyumuko laJesus Kristus, (itali kufa po onyata yombelela, ndele oku mu kwafela mu indile kuKalunga eliudo liwa).+
22 Kristus okwa ya meulu, noku li omutumba kolulyo laKalunga,+ onghee ovaengeli, ovapangeli novanaenghono otava dulika kuye.+
