Onhumwafo yotete yaPetrus 2:1-25
2 Onghee liduleni owii aushe,+ oukengeleledi, oihelele, ondubo nosho yo olwaambo keshe.
2 Ndele ngaashi ouhanana+ hava kala va halelela okunyama, nanye kaleni mwa halelela okulihonga oshili yeendjovo daKalunga odo da fa omashinishini, opo mu kule nomu ka xupifwe,+
3 molwaashi omwa mona* kutya Omwene oku na olune.
4 Eshi tamu ehene popepi naye, oo e li emanya li na omwenyo la ekelwashi kovanhu,+ ndele ola hoololwa nola fimana kuKalunga,+
5 nye ovo mwa fa omamanya e na omwenyo otamu tungilwa keumbo lomhepo+ mu kale ovapristeri ovayapuki, opo mu dule okuyamba omayambo opamhepo+ oo a hokiwa kuKalunga tamu shi ningi metwokumwe newiliko lomhepo yaKalunga okupitila muJesus Kristus.+
6 Osheshi Omushangwa owa ti: “Tala! Ohandi diki muSion emanya la hoololwa, emanya la fimanenena li li ekanghameno, nokape na oo e na eitavelo mulo ta ka nyematekwa nande.”*+
7 Okwa fimana kunye ovo mwa itavela, ndele kwaavo inava itavela, “oku li emanya olo ovatungi va ekelashi,+ olo la ninga emanya la fimanenena”*+
8 nosho yo “emanya lepundukifo nosho yo emanya linene lokulipuma.”+ Ohava pundukifwa, molwaashi ihava dulika keendjovo daKalunga. Ovanhu va tya ngaho osho tava ningilwa ngaho.
9 Ndele nye omu li “ovanhu ovahoololwa, ouhamba wovapristeri, oshiwana shiyapuki,+ ovanhu ve li emona le likalekelwa,+ opo mu shiivife keshe pamwe efimano”*+ Laao e mu ifana mo momilaulu, mu ye mouyelele waye mukumwifi.+
10 Osheshi nale kamwa li oshiwana shaKalunga,+ ndele paife omwa ninga oshiwana shaye; nale kamwa li mwa filwa onghenda, ndele paife omwa filwa onghenda.+
11 Ovamwatate ovaholike, ohandi mu kumaida mu li ovanailongo novaenda+ mounyuni ou mu likaleke kokule nomahalo opambelela+ oo hae mu kondjifa.*+
12 Kaleni mu na elihumbato liwa mokati kovanhu vomounyuni,+ opo ngeenge tave mu lundile kutya omu li ovalongi vowii, va mone oilonga yeni iwa+ nova fimaneke Kalunga, eshi te uya okutokola.
13 Dulikeni komapangelo aeshe opanhu omolwOmwene,+ kutya nee okohamba,+ molwaashi oi na ondodo yopombada,
14 ile okoongoloneya ovo va nangekwa po kohamba, opo va handukile ovalongi vowii nokupandula ovo tava longo ouwa.+
15 Osheshi Kalunga okwa hala mu longe ouwa, opo mu mweneke* omalai oo haa popi eendjovo dongaho.+
16 Kaleni ngaashi ovamangululwa;+ inamu longifa emanguluko leni li li elipopilo* lokulonga owii,+ ndele ongaashi ovapiya vaKalunga.+
17 Fimanekeni ovanhu vomaludi aeshe,+ kaleni mu hole ovamwatate aveshe,*+ tileni Kalunga+ nokufimaneka ohamba.+
18 Ovapiya nava dulike nokufimaneka oovene vavo;+ kave na ashike okudulika kwaavo ve li nawa nove na ondjele, ndele nokwaavo yo ve na onyanya.
19 Osha yuka ngeenge umwe te lididimikile omaudjuu* nokuhepekwa shihe li pauyuki, molwaashi a hala okukala e na eliudo liwa koshipala shaKalunga.+
20 Osheshi otashi kwafa shike ngeenge to lididimikile okudengwa, molwaashi wa nyona?+ Ohashi hafifa Kalunga ngeenge to lididimikile okumona oixuna, molwaashi to longo ouwa.+
21 Omwa ifanwa mu hepekwe shihe li pauyuki, molwaashi Kristus naye okwe mu hepekelwa+ nokwe mu tulila po oshihopaenenwa mu shikule filufilu eenghatu daye.+
22 Ka li a nyona sha,+ nomokanya kaye inamu dja oipupulu nandenande.+
23 Eshi a li ta tukwa,*+ ine va shunifila omatukano.*+ Eshi a li ta hepekwa,+ ka li e va ningila omatilifo, ndele okwa li e lineekela filufilu Kalunga oo ha tokola+ pauyuki.
24 Okwa kufa po omatimba etu,+ eshi a valelwa komuti,+ opo tu mangululwe mo moulunde notu kale ovayuki. “Omwa velulwa omolwoipute yaye.”+
25 Osheshi omwa li mwa twalwatwalwa mwa fa eedi,+ ndele paife omwa alukila komufita+ nomupashukili weemwenyo* deni.
Omashangelo opedu
^ Ile “makela.”
^ Eln., “ta ka fifwa ohoni.”
^ Emanya olo ohali tulwa mohuke, opo ekuma li kale la kola.
^ Eln., “eenghedi diwa,” sha hala okutya, omaukwatya noilonga yaye oya wana okutangwa.
^ Ile “haa kondjifa eemwenyo deni.”
^ Eln., “mange komilungu.”
^ Ile “mu liuvike nalo.”
^ Eln., “oumwainafana.”
^ Ile “oluhodi; ouyehame.”
^ Ile “a tondwa.”
^ Ile “ine va tonda.”
^ Ile “weenghalamwenyo.”
