Onhumwafo kOvakolossi 1:1-29
1 Ame Paulus, omuyapostoli waKristus Jesus pahalo laKalunga, pamwe nomumwatate Timoteus,+
2 ohatu shangele ovayapuki novamwatate ovadiinini ovo ve li ovahongwa vaKristus, ovo ve li muKolossi:
Efilonghenda nombili yaKalunga Tate yetu nai kale pamwe nanye.
3 Ohatu pandula alushe Kalunga, Xe yOmwene wetu, Jesus Kristus, ngeenge hatu mu ilikanene,
4 molwaashi otwa uda kutya omu na eitavelo muKristus Jesus nomu hole ovayapuki aveshe,
5 omolweteelelo olo mwa tuvikililwa meulu.+ Eteelelo olo omwa li mwe li uda nale okupitila metumwalaka loshili li na sha nonghundana iwa
6 oyo ye uya kunye. Ngaashi ashike onghundana iwa ya tandavela notai imike oiimati mounyuni aushe,+ oya tandavela yo nomokati keni okudja kefiku olo mwe i uda nomwa shiiva nawa efilonghenda laKalunga moshili.
7 Efilonghenda olo omwe li uda komumwatate omuholike nomudiinini Epafras,+ oo ta yakula ponhele yetu e li omupiya waKristus.
8 Okwe tu shiivifila yo ohole yeni meityo lopamhepo.*
9 Eshi twa uda kombinga yohole neitavelo leni, otwa kala noku mu ilikanena,+ opo mu yadifwe eshiivo lashili,+ mu kale mu na ounongo aushe neudeko loinima yopakalunga,+
10 opo mu wapalele Jehova* nomu mu hafife moinima aishe, eshi tamu imike oiimati moilonga aishe iwa notamu hapupalifa eshiivo leni lokushiiva Kalunga.+
11 Ohatu ilikana yo, opo Kalunga a longife eenghono daye dinenenene e mu pe eenghono doshinge shaye+ mu dule okulididimika filufilu mu na eteelelo nehafo,
12 eshi tamu pandula Tate, oo e mu kwafela mu kale mwa wana oku ka ninga ovafyuululi pamwe novayapuki+ ovo ve li mouyelele.
13 Okwe tu mangulula mepangelo lomilaulu+ nokwe tu twala mouhamba wOmona waye omuholike,
14 oo e tu mangulula okupitila mekuliloyambo laye, opo tu dule okudiminwa po omatimba etu.+
15 Oye olupe laKalunga iha monika,+ oye a shitwa tete koishitwa aishe,+
16 noinima aishe oya shitwa okupitila muye, oinima yomeulu noyokombada yedu, oyo i wetike naayo ihe wetike,+ kutya nee ovapangeli, ile ovovo ve na eenghonopangelo, ile omapangelo. Oinima aishe oya shitwa okupitila muye+ noye mu shitilwa.
17 Okwa kala ko nale fimbo oinima aishe inai shitwa,+ noinima aishe oya shitwa okupitila muye.
18 Oye omutwe wolutu, sha hala okutya weongalo.+ Oye ehovelo, oo a nyumunwa tete koufi,+ opo a kale wotete moinima aishe,
19 molwaashi Kalunga okwa hala Omona a kale a wana moinima aishe.+
20 Kalunga okwa hala yo okuhanganifa nokupanga ombili noinima aishe,+ kutya nee oyokombada yedu, ile oyomeulu, okupitila mohonde+ yaKristus oyo ya tika komuti womahepeko.*
21 Omwa li mwa tukauka ko kuKalunga nomwa li ovatondi vaye, molwaashi omwa li hamu diladila okulonga owii.
22 Ndele paife Kalunga okwe mu hanganifa naye mwene okupitila mefyo lOmona waye oo a yamba po olutu laye lopanhu, opo mu kale ovayapuki, muhe na oshipo, nopehe na ou te mu pe oushima koshipala shaKalunga+ —
23 onghee hano kaleni mu na eitavelo,+ mwa tungila kekanghameno,+ mwa pamenena+ nomu na eteelelo la twa la kanghamena konghundana iwa oyo mwa uda noya udifilwa oishitwa aishe koshi yeulu.+ Ame Paulus, onda nangekwa po ndi udife onghundana oyo iwa.+
24 Paife onda hafa, eshi handi mono oixuna omolweni.+ Ohandi piti momaudjuu ngaashi Kristus, nohandi twikile okumona oixuna omolwolutu laKristus,+ sha hala okutya eongalo.+
25 Kalunga okwa nangeka nge po ndi yakule eongalo eli omolwouwa weni.+ Nomolwaasho handi udifa nomutima aushe eendjovo daye,
26 odo di li oshiholekwa shiyapuki+ osho sha kala sha holekwa okudja nomounyuni wonale*+ nosho yo okudja komapupi onale. Ndele paife osha hololelwa ovayapuki vaye,+
27 ovo a kala a halelela okuhololela emona la denga mbada loshiholekwa osho shiyapuki osho sha kala tashi hololwa mokati koiwana.+ Oshiholekwa osho oKristus oo mu na ekwatafano naye, nomwa teelela oku ka tumbalekwa pamwe naye.+
28 Ohatu udifa kombinga yaye, hatu kumaida nokuhonga ovanhu ounongo aushe, opo tu kwafele ovahongwa aveshe vaKristus va kale va pyokoka pamhepo noku va yandja kuKalunga.+
29 Fiyo opaife ohandi longo noudiinini, handi kendabala nda mana mo omolweenghono daye odo tadi longo mwaame.+
Omashangelo opedu
^ Eln., “momhepo.”
^ Tala Omafatululo oitya.
^ Ile “nomeedula da pita.” Tala Omafatululo oitya.
