Onhumwafo kOvakolossi 4:1-18
4 Nye oovene, ungaungeni novapiya veni nawa nosho yo pauyuki, molwaashi omu shii kutya nanye omu na Omwene weni e li meulu.+
2 Diinineni okwiilikana,+ nokukala oupafi mulo pamwe nomapandulo.+
3 Pefimbo opo tuu opo, tu ilikaneneni yo,+ opo Kalunga e tu yeululile omuvelo weendjovo tu dule okuudifa oshiholekwa shiyapuki shi na sha naKristus, osho sha tulifa nge modolongo,+
4 nondi udife nawanawa kombinga yasho ngaashi ndi na okuninga.
5 Kaleni mu na eendunge, eshi tamu ungaunga naavo ve li kondje, mokulongifa nawa efimbo leni.*+
6 Eendjovo deni nadi kale alushe donghenda, da fingala omongwa,+ opo mu kale mu shii nghee mu na okunyamukula keshe umwe.+
7 Tikikus,+ omumwatate wange omuholike nomulongi omudiinini nomupiya mukwetu mOmwene, ote ke mu lombwela ashishe kombinga yange.
8 Ohandi mu tumu kunye, opo mu shiive nghee hatu shi endifa noku hekeleke omitima deni.
9 Ote uya pamwe naOnesimus,+ omumwatate omuholike nomudiinini, oo a li ha kala nanye, notave ke mu lombwela ashishe osho tashi ningwa oku.
10 Aristarkus,+ omukwatwa mukwetu otave mu kundile po vo naMarkus,+ omupambele waBarnabas (Markus oo oye ou mwa li mwa lombwelwa mu mu tambule ko,+ ngeenge okwe uya kunye).
11 Otamu kundilwa po yo kuJesus oo ha ifanwa Justus, umwe womwaavo va pita etanda. Ava ovo aveke ovalongi pamwe naame omolwOuhamba waKalunga, nova kala odjo yehekeleko* linene kwaame.
12 Omupiya waKristus Jesus, Epafras,+ oo a li ha kala nanye, naye ote mu kundile po. Oha kala alushe te mu ilikanene a mana mo, opo mu kale mwa pama nomwa tomhwa filufilu koinima aishe oyo Kalunga ta ka ninga.
13 Ohandi mu lombwele oshili kutya oha ningi eenghendabala da mana mo omolweni nomolwovamwatate ovo ve li muLaodikea nomuHierapolis.
14 Omuhakuli omuholike Lukas+ vo naDemas+ otave mu kundile po.
15 Kundilei po ovamwatate vokuLaodikea nosho yo omumwameme Nimfas neongalo olo hali ongalele meumbo laye.+
16 Ngeenge omwa lesha onhumwafo ei, ningeni yo elongekido, opo i ka leshwe+ meongalo laLaodikea, nanye lesheni yo oyo ya dja kuLaodikea.
17 Lombweleni yo Arkippus+ tamu ti: “Twikila okulonga noudiinini u wanife po oilonga oyo wa pewa kOmwene.”
18 Aa omakundo ange, ame Paulus, oo nda shanga neke lange mwene.+ Dimbulukeni kutya ondi li modolongo.+ Efilonghenda laKalunga nali kale pamwe nanye.
