Agimtuod Dagiti Agtutubo . . .

Kasano ti Rumbeng a Panangmatmatko Kadagiti Nightclub Dagiti Agtutubo?

“Kayatko ti mapan​—tapno agragragsakak.”​—Shawn.

“Patiendak, makaparagsak dayta​—makaparagsak unay! Agpatpatnag a panagsasala dayta.”​—Ernest.

KADAGITI kallabes a tawen, nakalatlatak dagiti nightclub dagiti agtutubo. Dagita a club ti pagayuyangan ti adu nga agtutubo a mayat nga agragragsak.

Siempre, kayattayo amin ti agragragsak. Ket kuna ti Biblia nga adda “tiempo ti panagrag-o” ken uray pay ti “tiempo ti panagsala.” (Eclesiastes 3:4, Today’s English Version) Nupay kasta, nasayaat aya ti agpalpaliwa kadagiti nightclub dagiti agtutubo? Wenno nasayaat no agpanunotka a naimbag sakbay a mapanka sadiay?

“Nalaaw a Padaya”

Nupay saan a kondenaren ti Biblia dagiti kalkalainganna a sosial a taripnong, mamakdaar dayta maibusor iti “naariwawa a panagragragsak,” wenno kadagiti “nalaaw a padaya.” (Galacia 5:19-21; Byington) Idi panawen ti Biblia, dagiti naariwawa a panagragragsak ti masansan a nagbanag iti di makontrol a kababalin. Kastoy ti insurat ni mammadto Isaias: “Asi pay dagidiay bumangbangon a nasapa iti bigat tapno makasapulda laeng iti makabartek nga inumen, isuda nga agmenmenmen agingga iti adalemen a kinasipnget ti rabii tapno paggil-ayaben ida ti mismo nga arak! Ket addanto arpa ken pagtokar nga adda kuerdasna, pandereta ken plauta, ken arak kadagiti padayada; ngem ti aramid ni Jehova saanda nga imatangan.”​—Isaias 5:11, 12.

Intampok dagitoy a taripnong ti panagusar iti “makabartek nga inumen” ken nalaaw a musika. Masapada a mangrugi sada aglaylayon agingga iti rabii. Paliiwem met ti kababalin dagiti nakidaya​—​nagtignayda a kas man la awan ti Dios! Di ngarud pakasdaawan, a kinondenar ti Dios dagita a taripnong. Ngem kasano ti panagrikna ti Dios iti mapaspasamak iti adu a nightclub dagiti agtutubo ita?

Usigem dagitoy a pasamak. Ti maysa ket  itampok ti dadduma a nightclub ti kasla agmauyong ken naranggas a panagsala. Sigun iti maysa a libro, dayta a kita ti panagsala ket “nangrugi idi ngalay ti dekada otsenta kadagiti club idiay Estados Unidos. Timmanor dayta . . . manipud iti kita ti sala, a sadiay agdidinnungpar dagiti agsasala.” Masansan nga iraman daytoy a kita ti sala ti panaglaglagto, panangiwagnes iti ulo, a kas man la agsisinnangdoda, agraman ti panagdidinnungpar dagiti agsasala. Masansan nga adda dagiti mapilayan ken masugatan, ken adda met dagiti nadangran ti duri ken uloda. Adda pay ketdi dagiti natay. Kanayonanna, iti dadduma a nightclub, adda tao a pagtitinnapayaan ti maysa a bunggoy sadanto ibbatan isu a madangran. Gagangay a maarikap wenno masagid dagiti babbai iti wagas a di mayanatup.

Di pagduaduaan a di anamongan ti Dios ti kasta a kababalin. Ngamin, ibilin ti Saona kadagiti Kristiano a ‘tallikudanda ti di kinanadiosan ken nailubongan a tartarigagay ken agbiagda a buyogen ti kinasimbeng ti panunot.’​—Tito 2:12.

Musika ken Droga

Panunotem met ti kita ti musika a maitampok iti kaaduan a nightclub. Dadduma ti nangnangruna a mangitampok iti musika a hard rock wenno heavy metal a malasin babaen iti agbabansag a kompas ken naalas a liriko. Ngem iti adu a nightclub, rap, wenno hip-hop ti kangrunaan nga itampokda. Dayta ti musika a mangabbukay met ti sekso, kinaranggas, ken iyaalsa. Maapektaranka ngata no dumngegka iti kasta a musika ken no addaka iti kasta a napeggad a lugar? Kastoy ti kinuna ni David Hollingworth a maysa a konsultant iti nightclub: “Nagdakkel ti sikolohikal nga epekto ti musika kadagiti tattao. No agtitiponda kas dakkel a bunggoy, ad-adda nga agbalinda nga agresibo.” Di pakasdaawan nga adda dagiti masansan nga agririnnanggas kadagiti nightclub iti adu a siudad iti Estados Unidos. Patien ti adu a tattao a dayta ti direkta a resulta ti lugar a pakausaran ti musika a mangitandudo iti naalas nga aramid ken brutal a kababalin. *

Kadagiti kallabes a tawen, maus-usar metten dagiti droga kadagiti nightclub. Imbaga ti maysa a managsirarak a “ti kaadda, kinanadumaduma, ken pannakausar ti maiparit a droga . . . ket nainaig iti kinalatak dagiti night club.” Kinapudnona, adda dagiti droga a silalatak a maawagan iti dance drug. Nadumaduma pay ketdi a droga ti us-usaren dagiti agayuyang kadagiti nightclub. Karaman ti ketamine (a maawagan met iti espesial K) kadagiti droga a masansan a mapaggigiddan a mausar. Agbanag dayta iti apagapaman a di kinasimbeng, panagdelirio, rigat iti panaganges, ken pannakadadael ti panunot. Ti methamphetamine ti pakaigapuan ti pannakapukaw ti lagip, kinaagresibo, kinaranggas, ken posible a pannakadangran ti puso ken isip. Ti kalatakan ket ti droga nga ecstasy a ti droga nga amphetamine ti kangrunaan a ramenna. Agresulta dayta iti pannakariribuk ti panunot, panagdanag, napartak a panagpitik ti pulso, alta presion, ken nangato a gurigor. Natay pay ketdin ti dadduma nga agus-usar iti ecstasy.

Ti panangusar kadagiti maiparit nga agas ket maisalungasing iti bilin ti Biblia a “dalusantayo koma ti bagbagitayo iti tunggal pakatulawan iti lasag ken iti espiritu.” (2 Corinto 7:1) Nainsiriban aya ngarud a mapanka iti kasta a lugar a nasaknap ti panagdroga?

Dakes a Pannakitimpuyog

Laglagipem ti masansan a maipakdaar: “Dagiti dakes a pannakitimpuyog dadaelenda dagiti  makagunggona nga ugali.” (1 Corinto 15:33) Kas kadagiti managragragsak idi panawen ti Biblia, kaaduan nga agtutubo nga agayuyang kadagiti nightclub ti kasla di maseknan no maay-ayoda met laeng ti Dios. Kinapudnona, kaaduan ti mabalin a madeskribir a “managayat iti ragragsak imbes a managayat iti Dios.” (2 Timoteo 3:4) Talaga aya a kayatmo ti makisinninged iti kasta a bunggoy?

Mabalin nga irason ti dadduma a saan unay a napeggad ti mapan kadagiti nightclub no kaduam ti dadduma a Kristiano nga agtutubo. Ngem dagiti Kristiano nga agtutubo a sipapasnek nga ‘agbalin a mapagulidanan iti kababalin kadagidiay matalek,’ dida kayat ti mapan kadagita a lugar. (1 Timoteo 4:12) Uray no mapan iti nightclub ti maysa a grupo dagiti Kristiano ken agtalinaedda kas maysa a grupo, napeggad latta ti musika ken ti aglawlaw sadiay. Mabalin a mabainan wenno maibabainda no adda dadduma a mangawis kadakuada nga agsala. Dadduma nga agtutubo ti naisarsarak pay ketdin iti panaglalaban! Agpayso ngarud ti kuna ti Biblia: “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.”​—Proverbio 13:20.

Makagargari a Panagsala

Ti sala a mismo ti maysa pay a nasken nga usigem. Nakalatlatak ti “freak dancing,” nangruna kadagiti tin-edyer idiay Estados Unidos. Gagangay a ti sala ket maibansag iti hip-hop wenno musika a rap ken ti panagdenna ti nabatad nga itandudo dagiti lirikona. Kanayonanna, ti sala a mismo tuladenna ti panagdenna. Nadeskribir ngarud dagiti mostra iti daytoy a kita ti sala a ‘pannakidenna a sikakawes.’

Kayat aya ti maysa a Kristiano nga agtutubo ti makipaset iti daytoy a kita ti sala? Saan no kayatna nga ay-aywen ti Dios, a nangibilin kadatayo nga ‘adaywantayo ti pannakiabig.’ (1 Corinto 6:18) Mabalin nga irason ti dadduma, ‘No ar-aramiden ti amin ti kasta, saan ngarud a dakes dayta.’ Ngem mabalin a di maitutop ti panagtigtignay ti kaaduan a tattao. (Exodo 23:2) Iturturedmo a pagkedkedan ti kakaduam ken taginayonem a nadalus ti konsiensiam iti Dios!​—1 Pedro 4:3, 4.

Panagdesision

Di kayat a sawen daytoy nga interamente a dakes ti panagsala. Saritaen ti Biblia kadatayo a kasta unay idi ti ragsak ni Ari David kalpasan a naisubli ti sagrado a lakasa ti tulag idiay Jerusalem ta uray la a “nagsalsala . . . buyogen ti isuamin a bilegna.” (2 Samuel 6:14) Iti pangngarig ni Jesus maipapan iti barayuboy nga anak, ti panagrag-o gapu iti panagsublina ket napakuyogan iti “konsierto ti musika ken panagsasala.”​—Lucas 15:25.

Mabalin a makaay-ayo kadagiti kalugaram a Kristiano ti dadduma a kita ti panagsala. Nupay kasta, napateg ti kinatimbeng ken nasayaat a panagdesision. Nataltalged nga amang no tagiragsakem ti musika ken panagsala kadagiti taripnong dagiti Kristiano a makontrol ken matarawidwidan a naimbag ngem kadagiti nightclub dagiti agtutubo. Kadagiti taripnong dagiti Kristiano a nasayaat ti pannakatarawidwidda, saan nga isinsina dagiti agtutubo ti bagida no di ket tagiragsakenda ti nasayaat a pannakitimpuyog kadagiti Kristiano aniaman ti edad dagitoy.

Ipapantayon a mabalin nga adda dadduma a restawran iti lugarmo a mangipatokar iti musika ken mangitampok iti makaay-ayo a sala. Ngem sakbay a patgam ti awis iti aniaman nga establisimiento, pagimbagam no imtuodem dagitoy a saludsod: Ania ti reputasion dayta a lugar? Dagiti laeng aya agtutubo ti awatenna a kostumer? No kasta, masigurado aya a natalged sadiay? Ania a kita ti musika ti mapatokar? Ania a kita ti sala ti maaramid sadiay? Kasano ti panagrikna ti dadakkelko no mapanak? Mayadayoka iti aniaman a pannakadangran no imtuodem nga umuna dagiti saludsod a kas kadagitoy.

Ti nadakamat itay a ni Shawn, nagsayaat ti pananggupgopna kadagiti bambanag. Sakbay a nagbalin a Kristiano, ayuyangna idi dagiti nightclub. Kastoy ti malagipna: “Masansan a nalulok ti kababalin dagiti adda kadagiti nightclub. Naalas ti musika, ket masansan nga imoral unay ti sala, ket maymaysa ti motibo ti kaaduan a mapan​—tapno makasarakda iti dayta a nightclub iti kayatda a makadenna.” Insardeng ni Shawn ti mapan kadagiti nightclub kalpasan a nakipagadal iti Biblia kadagiti Saksi ni Jehova. Kastoy ti maibagana a naibasar iti nasaem a kapadasanna: “Dagita a club ket saan a maitutop a lugar kadagiti Kristiano.”

[Footnote]

[Ladawan iti panid 26]

Nakababain ti kasasaad ti dadduma nga agtutubo kadagiti nightclub