Surat ken Tito 2:1-15
2 Nupay kasta, itultuloymo nga ibaga ti maitunos iti nasayaat* a sursuro.+
2 Natimbeng koma ti ugali dagiti lallakay, serioso, nasimbeng ti panunotda, natibker ti pammatida, napnuan iti ayat, ken addaanda iti panagibtur.
3 Kasta met, pakaidayawan koma ti Dios ti kababalin dagiti babbaket, saanda a manangpadakes, saanda a mangnginum iti arak, mannursuroda iti naimbag,
4 tapno mabalakadanda* dagiti ub-ubing a babbai nga ayatenda dagiti assawa ken annakda,
5 nasimbeng ti panunotda, nadalus, nagaget iti pagtaengan,* naimbag, agpaspasakupda iti assawada,+ tapno saan a malalais ti sao ti Dios.
6 Itultuloymo met a paregtaen dagiti ub-ubing a lallaki a maaddaanda iti nasimbeng a panunot,+
7 nga ipakitam a mapagulidananka iti nasayaat nga aramid iti amin a pamay-an. Sipipinget nga isurom ti umiso,*+
8 a nasayaat* ti panagsaom tapno saanka a makritikar,+ iti kasta, maibabain dagiti bumusbusor, ta awan ti aniaman a negatibo* a maibagada maipapan kadatayo.+
9 Agpasakup koma dagiti adipen kadagiti amoda iti amin a banag,+ nga ikagumaanda a paragsaken ida, saanda a sungbasungbatan ida,
10 saanda a taktakawan ida,+ no di ket naan-anay koma a mapagtalkanda, tapno iti amin a pamay-an, maarkosanda ti pannursuro ti Dios, a Manangisalakan kadatayo.+
11 Ta impakita ti Dios ti nagpaiduma a kinaimbagna, nga agturong iti pannakaisalakan ti amin a kita ti tattao.+
12 Dayta ti mangsanay kadatayo a mangtallikud kadagiti dakes nga aramid+ ken nailubongan a tarigagay ken agbiagtayo nga addaan iti nasimbeng a panunot ken kinalinteg ken debosion iti Dios iti daytoy agdama a sistema ti bambanag,*+
13 bayat nga ur-urayentayo a matungpal ti naragsak a namnama+ ken maipakita ti dayag ti naindaklan a Dios ken ti Manangisalakan kadatayo, ni Jesu-Kristo,
14 a nangted iti bagina para kadatayo+ tapno mawayawayaantayo*+ iti tunggal kita ti kinakillo ken tapno madalusan ti maysa nga ili nga agbalin nga espesial a sanikuana, a naregta kadagiti nasayaat nga aramid.+
15 Itultuloymo nga ibaga dagitoy ket mangparegta ken mangtubngarka maitunos iti autoridad a naited kenka.+ Dimo ipalubos nga adda asinoman a manglais kenka.
Footnotes
^ Wenno “makapasalun-at; makagunggona.”
^ Wenno “maisuroda; masanayda.”
^ Wenno “as-asikasuenda ti pagtaenganda.”
^ Wenno mabalin nga, “isurom ti kinadalus.”
^ Wenno “makapasalun-at; makagunggona.”
^ Wenno “dakes.”
^ Lit., “masubbottayo; maisalakantayo.”
