Maikadua Kadagiti Taga-Corinto 7:1-16
7 Gapu ta naited kadatayo dagitoy a kari,+ ipatpateg a kakabsat, dalusantayo ngarud ti bagitayo iti amin a mangrugit iti lasag ken espiritu,+ tapno ad-adda a nasantuantayo bayat nga agbutengtayo iti Dios.
2 Ikkandakami iti lugar iti pusoyo.+ Awan ti dakes nga inaramidmi iti asinoman, awan ti dinadaelmi, awan ti ginundawayanmi.+
3 Diak ibaga daytoy tapno ukomenkayo. Ta naibagak idin nga addakayo iti pusomi tapno matay ken agbiagkayo a kaduami.
4 Nawayaak unay a makapagsao kadakayo. Ipagpannakkelkayo unay. Naliwliwaak unay; napalalo ti rag-ok iti amin a pannakaparigatmi.+
5 Kinapudnona, idi nakadanonkami idiay Macedonia,+ saan a nagin-awaan ti bagimi,* no di ket nagtultuloy a naparigatkami iti amin a pamay-an—nabusbusorkami iti ruar ken nagdanagkami iti uneg.
6 Ngem ti Dios, a mangliwliwa kadagidiay maup-upay,+ liniwliwanakami babaen ti kaadda ni Tito;
7 ken saan laeng a babaen ti kaaddana, no di ket babaen ti liwliwa nga inawatna gapu kadakayo, idi impadamagna kadakami ti iliwyo kaniak, ti kasta unay a ladingityo, ti napasnek a pannakaseknanyo* kaniak; isu nga ad-adda a nagrag-oak.
8 Ta uray pinagladingitkayo gapu iti suratko,+ saanko a pagbabawyan dayta. Uray pay no nagbabawyak idi damo (idi nakitak a nagladingitkayo gapu iti dayta a surat, nupay apagbiit),
9 agragsakak itan, saan a gapu ta napagladingitkayo, no di ket gapu ta nagladingitkayo tapno agbabawikayo. Ta nagladingitkayo iti pamay-an a makaay-ayo iti Dios, tapno dikay agsagaba gapu kadakami.
10 Ta ti panagladingit iti pamay-an a makaay-ayo iti Dios mangpataud iti panagbabawi a mangiturong iti pannakaisalakan, a saan a pagbabawyan;+ ngem ti panagladingit ti lubong mangpataud iti ipapatay.
11 Ta kitaenyo ti epekto ti panagladingityo iti pamay-an a makaay-ayo iti Dios. Dinalusanyo ti naganyo, nakapungtotkayo iti dakes a napasamak, nagbutengkayo iti Dios, nagreggetkayo, nagbalinkayo a nagagar, ken inlintegyo ti dakes!+ Iti amin nga inaramidyo, impakitayo a nadaluskayo* iti daytoy a banag.
12 Nagsuratak kadakayo saan a gapu iti daydiay nangaramid iti dakes+ wenno daydiay nagsagaba gapu iti dayta, no di ket tapno maipakita iti imatang ti Dios ti kinapasnekyo para kadakami.
13 Dayta ti makagapu a naliwliwakami.
Ngem malaksid a naliwliwakami, ad-adda pay a naragsakankami gapu iti rag-o ni Tito, ta binang-aranyo amin ti espirituna.
14 Ta no impannakkelkayo kenkuana, saanak a naibabain; ta no kasano a pudno ti amin nga imbagami kadakayo, pudno met ti impannakkelmi ken Tito.
15 Kasta met, dumakdakkel ti nadungngo a panagayatna kadakayo bayat a malaglagipna ti kinatulnogyo amin,+ no kasano nga inawatyo buyogen ti nauneg a panagraem.
16 Agragsakak ta makapagtalekak* kadakayo iti amin a pamay-an.
Footnotes
^ Lit., “lasagmi.”
^ Lit., “ti regtayo.”
^ Wenno “nga awan pakapilawanyo; nga inosentekayo.”
^ Wenno mabalin a, “naturedak gapu.”
