Maikadua Kadagiti Taga-Corinto 10:1-18

  • Idepensa ni Pablo ti ministeriona (1-18)

    • Dagiti armasmi ket saan a kas kadagiti armas iti lubong (4, 5)

10  Siak ni Pablo, mismo nga agpakaasiak kadakayo babaen ti kinaalumamay ken kinaasi ti Kristo,+ nupay maibilangak a nanumo no kasangsangokayo,+ naturedak no awanak kadakayo.+  Ipakaasik nga inton addaak, nagbalbaliw koman dagidiay mangipagarup nga agbibiagkami iti nainlasagan a pamay-an, tapno saankon a tubngaren ida iti nakaro.  Ta nupay agbibiagkami ditoy lubong,* saankami a makigubgubat kas ti pannakigubat dagiti tattao ti lubong.  Ta dagiti armas a pakigubatmi ket saan a kas kadagiti us-usaren dagiti tattao iti lubong,+ no di ket impaay dagitoy ti Dios,+ a mangbalintuag iti natibker ti pannakapaderna a bambanag.  Ta ibalbalintuagmi dagiti panagrasrason ken tunggal natan-ok a banag a maikontra iti pannakaammo iti Dios,+ ken konkontrolenmi ti tunggal panunot a kas balud tapno agtulnog iti Kristo;  ket nakasaganakami a mangipakat iti dusa iti asinoman a nasukir,+ apaman a mapaneknekanyo a naan-anay a natulnogkayo.  Kitkitaenyo ti bambanag sigun iti makinruar a pategda. No adda asinoman nga agtalek iti bagina nga isu ket kukua ni Kristo, panunotenna koma manen daytoy: No isu ket kukua ni Kristo, kastakami met.  Ta inikkannakami ti Apo iti autoridad a mangpabileg kadakayo imbes a mangdadael,+ ket uray no ipagpannakkelko bassit dayta nga autoridad, saanakto a maibabain.  Ta diak kayat ti agparang a kasla butbutngenkayo babaen kadagiti suratko. 10  Ta ibagbagada: “Nadagsen ken napuersa dagiti suratna, ngem nakapuy ti kaaddana ken awan serserbi ti panagsaona.” 11  Bigbigen koma ti kasta a tao a ti ibagbagami* iti suratmi ket aramidenminto* inton addakami.+ 12  Ta saanmi a maitured nga ibilang wenno ikompara ti bagimi iti dadduma a mangirekrekomenda iti bagida.+ Ngem awan pannakaawatda no rukoden ken ikomparada ti bagida maibatay iti ibagada a naimbag.+ 13  Nupay kasta, saankamto nga agpannakkel iti labes ti annongenmi, no di ket iti uneg ti pagpatinggaan ti teritoria nga inted* ti Dios kadakami, nga indanonna met kadakayo.+ 14  Saankami a nagaramid iti aniaman a saan nga impaaramid ti Dios idi immaykami kadakayo, ta dakami ti immuna a nangipakaammo kadakayo iti naimbag a damag maipapan iti Kristo.+ 15  Saan, saankami nga agpampannakkel iti labes ti naited a teritoriami maipapan iti nagbannogan ti sabali, no di ket namnamaenmi a bayat a rumangrang-ay ti pammatiyo, agtultuloy a rumang-ay ti naaramidanmi, iti uneg ti teritoriami. Iti kasta, ad-adu pay ti maaramidanmi, 16  tapno maipakaammomi ti naimbag a damag kadagiti lugar iti labesyo, tapno saankami nga agpannakkel iti naaramiden iti teritoria ti sabali. 17  “Ngem ti agpannakkel, ipannakkelna koma ni Jehova.”*+ 18  Ta saan a daydiay mangirekomenda iti bagina ti maaprobaran,+ no di ket daydiay irekomenda ni Jehova.*+

Footnotes

Lit., “iti lasag.”
Lit., “no aniakami iti sao.”
Lit., “kastakami met iti aramid.”
Wenno “imbingay.”
Kitaem ti App. A5.
Kitaem ti App. A5.