Maikadua Kadagiti Taga-Corinto 1:1-24
1 Siak ni Pablo, apostol ni Kristo Jesus babaen ti pagayatan ti Dios, ken ni Timoteo+ a kabsattayo, nagsuratak iti kongregasion ti Dios dita Corinto, agraman ti amin a nasantuan iti intero nga Acaya:+
2 Adda koma kadakayo ti nagpaiduma a kinaimbag ken talna manipud iti Dios nga Amatayo ken ni Apo Jesu-Kristo.
3 Maidaydayaw koma ti Dios ken Ama ti Apotayo a ni Jesu-Kristo,+ ti Ama a napnuan iti asi+ ken Dios ti amin a liwliwa,+
4 a mangliwliwa* kadatayo iti amin a pakasuotantayo*+ tapno maliwliwatayo ti sabsabali+ iti aniaman a pakasuotanda* babaen ti liwliwa nga inawattayo iti Dios.+
5 Ta no kasano nga adu ti sagsagabaentayo gapu iti Kristo,+ adu met ti aw-awatentayo a liwliwa gapu iti Kristo.
6 Ita, no masusuotkami,* agpaay dayta a pakaliwliwaan ken pakaisalakananyo; ken no maliwliwakami, agpaay dayta a pakaliwliwaanyo, a tumulong kadakayo a mangibtur kadagiti pakarigatan a sagsagabaenmi met.
7 Ken nabileg ti namnamami para kadakayo, ta ammomi a no agsagsagabakayo a kas kadakami, maliwliwakayto met a kas kadakami.+
8 Ta kayatmi a maammuanyo, kakabsat, ti rigat a napasaranmi iti probinsia ti Asia.+ Nakarigrigat ti sinagabami, a dimi naibturan no bukbukodmi, ken dimi idi masigurado no malasatanmi wenno saan.+
9 Kinapudnona, kasla nasentensiaankami iti ipapatay. Napasamak daytoy tapno agtalekkami, saan nga iti bagimi, no di ket iti Dios+ a mangpagungar kadagiti natay.
10 Insalakannakami ken isalakannakaminto iti peggad nga ipapatay, ket mangnamnamakami nga itultuloynakaminto pay nga isalakan.+
11 Matulongandakami met babaen ti panagpakpakaasiyo para kadakami,+ tapno adu ti makapagyaman para kadakami gapu iti tulong nga inawatmi kas sungbat ti kararag ti adu.+
12 Ta daytoy ti pagpannakkelmi: Paneknekan ti konsiensiami a ditoy lubong, ken nangnangruna iti pannakilangenmi kadakayo, nagbiagkami a nasantuan ken nabuyogan iti kinapasnek a naggapu iti Dios. Saankami a nagpannuray iti sirib ti tao,+ no di ket iti nagpaiduma a kinaimbag ti Dios.
13 Ta isursuratmi kadakayo ti bambanag a nalakayo a basaen* ken matarusanyo, ket mangnamnamaak nga itultuloyyo a tarusan a naimbag dagitoy a banag,*
14 no kasano a natarusan ti dadduma kadakayo a mabalindakami nga ipagpannakkel, ket ipagpannakkeldakayto met iti aldaw ni Apotayo a Jesus.
15 Gapu ta agtalekak iti daytoy, panggepko ti umay nga umuna kadakayo, tapno adda maikadua a gundawayyo nga agrag-o;*
16 ta planok ti dumagas kadakayo inton mapanak idiay Macedonia, ken inton aggapuak sadiay, ket ituloddak iti dalanko nga agpa-Judea.+
17 Idi implanok ti umay, saanko a tinagtagilag-an dayta, saan kadi? Wenno pinanggepko kadi ti bambanag sigun iti pagayatak, nga ibagak ti “Wen, wen” sa kalpasanna “Saan, saan”?
18 Makapagtalekkayo iti Dios a pudno ti ibagbagami kadakayo. Saanmi nga ibaga ti “wen” ngem kalpasanna “saan.”
19 Ta ti Anak ti Dios, a ni Jesu-Kristo, nga inkasabami kadakayo a kaduak da Silvano* ken Timoteo,+ dina imbaga ti “wen” sa kalpasanna “saan,” no di ket kanayon a “wen” ti ibagana a “wen.”
20 Ta uray kasano kaadu ti kari ti Dios, nagbalinda a “wen” babaen kenkuana.+ Gapuna, babaen met kenkuana nga ibagatayo ti “Amen” iti Dios,+ tapno maipadayagtayo ti Dios.
21 Ngem daydiay mangpatalged nga agpapadatayo a kukua ti Kristo ken daydiay nangdutok* kadatayo ket ti Dios.+
22 Inkabilna met ti seliona kadatayo+ ken ti espirituna iti pusotayo kas pammatalged iti banag nga umay.*+
23 Saanak pay nga immay dita Corinto ta diak kayat a nakarkaro ti ladingityo, ket saksik ti Dios iti dayta.
24 Diak ibagbaga a dakami ti mangituray iti pammatiyo,+ no di ket katrabahuandakami tapno agragsakkayo, ta natibkerkayo gapu iti pammatiyo.
Footnotes
^ Wenno “pakarigatantayo.”
^ Wenno “pakarigatanda.”
^ Wenno “mangparparegta.”
^ Wenno “marigrigatankami.”
^ Wenno mabalin a, “ti pagaammoyon.”
^ Lit., “agingga iti panungpalan.”
^ Wenno mabalin a, “tapno mamindua a magunggonaankayo.”
^ Naawagan met iti Silas.
^ Wenno “nangpulot.”
^ Wenno “pauna a bayad (deposito); garantia iti banag nga umay.”
