Oseas 6:1-11

  • Awis nga agsubli ken Jehova (1-3)

  • Agkupkupasen ti napudno nga ayat dagiti tattao (4-6)

    • Nasaysayaat ti napudno nga ayat ngem ti daton (6)

  • Dagiti nakababain nga aramid dagiti tattao (7-11)

6  “Umaykayo, ket agsublitayo ken Jehova,Ta pinirsapirsaynatayo+ ngem paimbagennatayto. Kinabkabilnatayo, ngem bedbedannanto dagiti sugattayo.   Biagennatayto kalpasan ti dua nga aldaw. Iti maikatlo nga aldaw, bangonennatayto,Ket agbiagtayto iti sanguananna.   Maam-ammotayto ni Jehova, ikagumaantayto nga am-ammuen. Kas iti isisingising ti init, sigurado ti iruruarna;Umayto kadatayo a kas iti tudo nga agbuyat,Kas iti naladaw a tudo nga umagsep iti daga.”   “Ania ti rumbeng nga aramidek kenka, Efraim? Ania ti rumbeng nga aramidek kenka, Juda,Ta ti napudno nga ayatmo ket nagbalinen a kas kadagiti ulep iti agsapa,Kas iti linnaaw nga alisto nga agpukaw.   Isu a dadaelekto* ida babaen kadagiti propeta;+Patayekto ida babaen kadagiti sasao ti ngiwatko.+ Ket agraniag a kas iti lawag dagiti panangukomko kadakayo.+   Ti pakaragsakak ket ti napudno nga ayat,* saan a ti daton,Ti pannakaammoyo kaniak, saan a dagiti sibubukel a daton a mapuoran.+   Ngem kas tattao, saanda a tinungpal ti tulag.+ Sadiay a saanda a nagbalin a matalek kaniak.   Ti Gilead ket ili dagiti managdakdakes,+Napno dayta iti tugot dagiti daradara a saka.+   Dagiti papadi ket kas kadagiti agtatakaw a mangtambang iti tao. Mangpapatayda iti kalsada idiay Sikem,+Ta nakababain ti ar-aramidenda. 10  Nakakitaak iti nakadakdakes a banag iti balay ti Israel. Sadiay nga agbalbalangkantis ti Efraim;+ Rinugitan ti Israel ti bagina.+ 11  Ngem naikeddengen ti panagani para kenka, O Juda,Inton ummongek manen dagiti naipanaw a tattaok.”+

Footnotes

Lit., “putdekto.”
Wenno “asi.”