Numeros 35:1-34
35 Ket ni Jehova nagsao ken Moises iti desierto a tantanap ti Moab iti igid ti Jordan+ idiay Jerico, a kunkunana:
2 “Itedmo ti bilin iti annak ti Israel a masapul nga ipaayanda dagiti Levita kadagiti siudad+ a pagnaedan manipud iti tawid a sanikuada, ket rebbeng nga itedda kadagiti Levita ti pagpaaraban dagiti siudad iti intero nga aglawlawda.+
3 Ket dagiti siudad agserbinto a pagnaedanda, bayat a dagiti pagpaarabanda agserbinto iti naamo nga an-animalda ken sansanikuada ken iti amin nga atap nga an-animalda.
4 Ket dagiti pagpaaraban dagiti siudad, nga itedyonto kadagiti Levita, manipudto iti pader ti siudad ket rummuar agingga iti sangaribu a kasiko iti intero nga aglikmut.
5 Ket masapul a mangrukodkayo iti ruar ti siudad iti sikigan iti daya iti dua ribu a kasiko ket iti sikigan iti abagatan dua ribu a kasiko ket iti sikigan iti laud dua ribu a kasiko ket iti sikigan iti amianan dua ribu a kasiko, a ti siudad adda iti tengnga. Agserbinto kadakuada daytoy kas pagpaaraban dagiti siudad.
6 “Dagitoy ti siudad nga itedyonto kadagiti Levita: innem a siudad a pagkamangan,+ nga itedyonto a maipaay iti nakapapatay tapno agkamang sadiay,+ ket malaksid kadagita mangtedkayto iti uppat a pulo ket dua a sabali pay a siudad.
7 Amin dagiti siudad nga itedyonto kadagiti Levita uppat a pulo ket walonto a siudad, dagita agraman kadagiti pagpaarabanda.+
8 Dagiti siudad nga itedyo aggapunto iti sanikua ti annak ti Israel.+ Manipud iti adu mangalakayto iti adu, ket manipud iti bassit mangalakayto iti bassit.+ Tunggal maysa, kas mairukod iti tawidna nga alaennanto kas sanikua, mangtedto kadagiti Levita iti sumagmamano kadagiti siudadna.”
9 Ket nagtultuloy ni Jehova a nagsao ken Moises, a kunkunana:
10 “Agsaoka iti annak ti Israel, ket masapul a kunaem kadakuada, ‘Ballasiwenyo ti Jordan a mapan iti daga ti Canaan.+
11 Ket masapul a mangpilikayo kadagiti siudad a mainugot kadakayo. Agserbidanto kadakayo a kas siudad a pagkamangan, ket masapul nga agkamang sadiay ti nakapapatay a di inggagara a makabilna a mapapatay ti maysa a kararua.+
12 Ket masapul nga agserbi kadakayo dagiti siudad kas pagkamangan manipud manangibales iti dara,+ tapno saan a matay ti nakapapatay agingga nga agtakder iti sanguanan ti gimong maipaay iti pannakaukom.+
13 Ket dagiti siudad nga itedyonto, ti innem a siudad a pagkamangan, sidadaanto nga agserbi kadakayo.
14 Tallo a siudad ti itedyonto itoy a deppaar ti Jordan,+ ket tallo a siudad ti itedyonto iti daga ti Canaan.+ Agserbidanto kas siudad a pagkamangan.
15 Maipaay iti annak ti Israel ken maipaay iti ganggannaet nga agnanaed+ ken maipaay iti makipaggigian iti tengngada agserbinto dagitoy innem a siudad kas pagkamangan, tapno agkamang sadiay ti asinoman a di inggagara a makabilna a mapapatay ti maysa a kararua.+
16 “‘Ita no isu nakabilna babaen ti gamigam a landok iti kasta matay, isu manangpapatay.+ Di bumurong a mapapatay ti manangpapatay.+
17 Ket no nakabilna iti bassit a bato a mabalinna a pakatayan iti kasta matay, isu manangpapatay. Di bumurong a mapapatay ti manangpapatay.
18 Ket no nakabilna iti bassit a gamigam a kayo a mabalinna a pakatayan iti kasta matay, isu manangpapatay. Di bumurong a mapapatay ti manangpapatay.
19 “‘Ti manangibales+ iti dara isu ti mangpapatayto iti manangpapatay. No maranaanna isunto ti mangpapatay kenkuana.
20 Ket no induronna gapu iti gura+ wenno binarsakna bayat ti panagpadpadaanna+ iti kasta matay,
21 wenno nakabilna babaen ti imana gapu iti panagginnura iti kasta matay, di bumurong a mapapatay ti nangkabil. Isu manangpapatay. Ti manangibales iti dara papatayennanto ti manangpapatay no maranaanna.+
22 “‘Ngem no di ninamnama a naiduronna nga awanan panagginnura wenno nabarsakanna iti aniaman a banag nga awanan panagpadpadaan,+
23 wenno aniaman a bato a mabalin a pakatayanna a saanna a nakita isuna wenno maitinnagna kenkuana, iti kasta natay, idinto ta saanna a kaginnura ken saanna a tinarigagayan ti pannakadangranna,
24 masapul ngarud a mangukom ti gimong iti nagbaetan ti nangkabil ken ti manangibales iti dara maitunos kadagitoy a panangukom.+
25 Ket ti nakapapatay masapul nga ispalen ti gimong+ iti ima ti manangibales iti dara, ket isu masapul nga isubli ti gimong iti siudad a pagkamanganna a nagkamanganna, ket masapul nga agnaed iti dayta agingga iti ipapatay ti nangato a padi a napulotan iti nasantuan a lana.+
26 “‘Ngem no ti nakapapatay di bumurong a rummuar iti beddeng ti siudad a pagkamanganna a sadiay nga agkamang,
27 ket masarakan ti manangibales+ iti dara iti ruar ti beddeng ti siudad a pagkamanganna, ket ti manangibales iti dara papatayenna ti nakapapatay, isu saan a nagbasol iti dara.
28 Ta rebbeng koma nga agnaed iti siudad a pagkamanganna agingga iti ipapatay ti nangato a padi,+ ket kalpasan ti ipapatay ti nangato a padi mabalin nga agsubli ti nakapapatay iti daga a sanikuana.
29 Ket masapul nga agserbi dagitoy kas paglintegan ti panangukom maipaay kadakayo iti intero a kapkaputotanyo iti amin a disso a pagnaedanyo.
30 “‘Tunggal mangkabil a mangpapatay iti kararua rebbeng a mapapatay kas maysa a manangpapatay+ iti ngiwat dagiti saksi,+ ket ti maymaysa a saksi saan a mabalin a mangpaneknek maibusor iti maysa a kararua tapno isu matay.
31 Ket dikay mangala iti subbot maipaay iti kararua ti maysa a manangpapatay a maikari a matay,+ ta rebbeng a mapapatay a di bumurong.+
32 Ket dikay mangala iti subbot maipaay iti daydiay nagkamang iti siudad a pagkamanganna, tapno agsubli nga agnaed iti daga sakbay ti ipapatay ti nangato a padi.
33 “‘Ket dikay rugitan ti daga nga ayanyo; agsipud ta dara ti mangrugit iti daga,+ ket awan ti panangabbong iti daga no maipapan iti dara a naibuyat iti rabawna malaksid ti dara daydiay nangibuyat iti dayta.+
34 Ket dikay tulawan ti daga a pagnanaedanyo, nga iti tengngana agtataengak; ta siak ni Jehova agtataengak iti tengnga ti annak ti Israel.’”+
