Numeros 2:1-34
2 Nagsao ita ni Jehova kada Moises ken Aaron, a kunkunana:
2 “Rebbeng nga agpakarso ti annak ti Israel, tunggal lalaki sigun iti tallo a tribu a bennegna,+ iti denna dagiti pagilasinan maipaay iti balay dagiti ammada. Rebbeng nga agpakarsoda iti aglikmut ti sanguanan ti tolda ti gimong.
3 “Ket dagidiay agpakarso nga agpadaya nga agturong iti leleggakan ti init isunto ti tallo a tribu a benneg ti pakarso ti Juda kadagiti buyotda, ket ti panguluen maipaay iti annak ni Juda isu ni Naason+ nga anak ni Aminadab.
4 Ket ti buyotna ken dagidiay naipasalista kadakuada pitopulo ket uppat a ribu innem a gasut.+
5 Ket dagidiay agpakarso iti abayna isunto ti tribu ni Isacar,+ ket ti panguluen maipaay iti annak ni Isacar isu ni Netanel+ nga anak ni Zuar.
6 Ket ti buyotna ken dagidiay naipasalista kenkuana limapulo ket uppat a ribu uppat a gasut.+
7 Ket ti tribu ni Zabulon; ken ti panguluen maipaay iti annak ni Zabulon isu ni Eliab+ nga anak ni Helon.
8 Ket ti buyotna ken dagidiay naipasalista kenkuana limapulo ket pito a ribu uppat a gasut.+
9 “Amin dagidiay naipasalista iti pakarso ni Juda sangagasut walopulo ket innem a ribu uppat a gasut kadagiti buyotda. Rebbeng nga umunada nga agluas.+
10 “Ti tallo a tribu a benneg ti pakarso ni Ruben+ agpaabagatanto kadagiti buyotda, ket ti panguluen maipaay iti annak ni Ruben isu ni Elizur+ nga anak ni Sedeur.
11 Ket ti buyotna ken dagidiay naipasalista kenkuana uppat a pulo ket innem a ribu lima gasut.+
12 Ket dagidiay agpakarso iti abayna isunto ti tribu ni Simeon, ket ti panguluen maipaay iti annak ni Simeon isu ni Selumiel+ nga anak ni Zurisadai.
13 Ket ti buyotna ken dagidiay naipasalista kadakuada limapulo ket siam a ribu tallo gasut.+
14 Ket ti tribu ni Gad; ken ti panguluen maipaay iti annak ni Gad isu ni Eliasaf+ nga anak ni Reuel.
15 Ket ti buyotna ken dagidiay naipasalista kadakuada uppat a pulo ket lima a ribu innem a gasut ket limapulo.+
16 “Amin dagidiay naipasalista iti pakarso ni Ruben sangagasut limapulo ket maysa a ribu uppat a gasut ket limapulo kadagiti buyotda, ket rebbeng a maikaduada nga agluas.+
17 “Inton agluas ti tolda ti gimong,+ ti pakarso dagiti Levita+ addanto iti tengnga dagiti pakarso.
“No kasano ti rebbeng a panagpakarsoda, kasta ti rebbeng a panagluasda,+ tunggal maysa iti lugarna, mayannurot iti tallo a tribu a bennegda.
18 “Ti tallo a tribu a benneg ti pakarso ni Efraim+ kadagiti buyotda agpalaudto, ket ti panguluen maipaay iti annak ni Efraim isu ni Elisama+ nga anak ni Amihud.
19 Ket ti buyotna ken dagidiay naipasalista kadakuada uppat a pulo a ribu lima gasut.+
20 Ket iti abayna isunto ti tribu ni Manases,+ ket ti panguluen maipaay iti annak ni Manases isu ni Gamaliel+ nga anak ni Pedazur.
21 Ket ti buyotna ken dagidiay naipasalista kadakuada tallopulo ket dua a ribu dua gasut.+
22 Ket ti tribu ni Benjamin;+ ken ti panguluen maipaay iti annak ni Benjamin isu ni Abidan+ nga anak ni Gideoni.
23 Ket ti buyotna ken dagidiay naipasalista kadakuada tallopulo ket lima a ribu uppat a gasut.+
24 “Amin dagidiay naipasalista iti pakarso ni Efraim sangagasut ket walo a ribu sangagasut kadagiti buyotda, ket rebbeng a maikatloda nga agluas.+
25 “Ti tallo a tribu a benneg ti pakarso ni Dan agpaamiananto kadagiti buyotda, ket ti panguluen maipaay iti annak ni Dan isu ni Ahiezer+ nga anak ni Amisadai.
26 Ket ti buyotna ken dagidiay naipasalista kadakuada innem a pulo ket dua a ribu pito gasut.+
27 Ket dagidiay agpakarso iti abayna isunto ti tribu ni Aser, ket ti panguluen maipaay iti annak ni Aser isu ni Pagiel+ nga anak ni Ocran.
28 Ket ti buyotna ken dagidiay naipasalista kadakuada uppat a pulo ket maysa a ribu lima gasut.+
29 Ket ti tribu ni Neftali;+ ken ti panguluen maipaay iti annak ni Neftali isu ni Ahira+ nga anak ni Enan.
30 Ket ti buyotna ken dagidiay naipasalista kadakuada limapulo ket tallo a ribu uppat a gasut.+
31 “Amin dagidiay naipasalista iti pakarso ni Dan sangagasut limapulo ket pito a ribu innem a gasut. Rebbeng a maudida nga agluas+—mayannurot iti tallo a tribu a bennegda.”
32 Dagitoy ti naipasalista iti annak ti Israel mayannurot iti balay dagiti ammada; amin dagidiay naipasalista kadagiti pakarso iti buybuyotda innem a gasut ket tallo a ribu lima gasut ket limapulo.+
33 Ngem dagiti Levita saanda a naipasalista+ a nairaman iti annak ti Israel, kas iti imbilin ni Jehova ken Moises.
34 Ket ti annak ti Israel inaramidda ti maitunos iti isuamin nga imbilin ni Jehova ken Moises.+ Kasta ti panagpakarsoda iti tallo a tribu a bennegda,+ ken kasta ti panagluasda,+ tunggal maysa kadagiti pamiliana maipapan iti balay dagiti ammana.
