Numeros 19:1-22
19 Ket nagsao ni Jehova kada Moises ken Aaron, a kunkunana:
2 “Maysa daytoy a pagalagadan ti linteg nga imbilin ni Jehova, a kunkunana, ‘Sawem iti annak ti Israel nga iyalaandaka iti nasalun-at a baka a nalabaga nga awanan pilaw+ ken saan a naparabawan iti sangol.+
3 Ket masapul nga itedyo ken Eleazar a padi, ket masapul nga iturongna dayta iti ruar ti pakarso, ket masapul a maparti iti sanguananna.
4 Kalpasanna masapul nga alaen ni Eleazar a padi ti dadduma a dara dayta babaen ti ramayna ket iparsiakna a mamimpito ti dadduma a dara dayta iti mismo a turong ti sango ti tolda ti gimong.+
5 Ket masapul a mapuoran ti baka iti imatangna. Mapuoranto ti kudilna ken ti lasagna ken ti darana agraman ti iblengna.+
6 Ket ti padi masapul a mangala iti sedro a kayo+ ken hisopo+ ken cocus nga eskarlata+ a material ket ipalladawna iti tengnga ti pakapuoran ti baka.
7 Ket masapul a labaan ti padi dagiti kawesna ken digusenna ti lasagna iti danum, ket kalpasanna mabalinna ti sumrek iti pakarso; ngem narugitto ti padi agingga iti rabii.
8 “‘Ket daydiay nangpuor iti dayta labaannanto dagiti kawesna iti danum ken masapul a digusenna ti lasagna iti danum,+ ket isu narugitto agingga iti rabii.
9 “‘Ket ti maysa a nadalus a tao masapul nga urnongenna dagiti dapo+ ti baka ket idulinna ida iti ruar ti pakarso iti nadalus a disso; ket masapul nga agserbida iti gimong ti annak ti Israel kas banag a masalimetmetan a maipaay iti danum a pangdalus.+ Maysa dayta a daton gapu iti basol.
10 Ket daydiay mangur-urnong kadagiti dapo ti baka masapul a labaanna dagiti kawesna ket isu narugit agingga iti rabii.+
“‘Ket masapul nga agserbi dayta kas paglintegan agingga iti tiempo a di nakedngan iti annak ti Israel ken iti ganggannaet nga agnanaed nga agtataeng kas ganggannaet iti tengngada.+
11 Asinoman a mangsagid iti bangkay ti aniaman a natauan a kararua+ narugitto met iti pito nga aldaw.+
12 Dayta a tao rebbeng a gugoranna ti bagina babaen iti dayta iti maikatlo nga aldaw,+ ket iti maikapito nga aldaw isu nadalusto. Ngem no saanna a gugoran ti bagina iti maikatlo nga aldaw, ngarud iti maikapito nga aldaw saanto a nadalus.
13 Tunggal maysa a mangsagid iti bangkay, ti kararua ti uray asinoman a matay a tao, ket saanto a manggugor iti bagina, tinulawanna ti tabernakulo ni Jehova,+ ket dayta a kararua masapul a magessat iti Israel.+ Agsipud ta saan a naiwarsi kenkuana ti danum a pangdalus,+ isu agtultuloy a narugit. Ti kinarugitna adda pay laeng kenkuana.+
14 “‘Daytoy ti linteg no kas pagarigan matay ti maysa a tao iti tolda: Tunggal maysa a sumrek iti tolda, ken tunggal maysa nga adda iti tolda, narugitto iti pito nga aldaw.
15 Ket narugit ti tunggal naluktan a basehas+ nga awanan iti naigalut a kalub.
16 Ket pito nga aldaw a narugitto ti tunggal maysa nga adda iti nawayang a tay-ak a makasagid iti maysa a napapatay iti kampilan+ wenno maysa a bangkay wenno maysa a tulang+ ti tao wenno maysa a lugar a pagitabonan.
17 Ket maipaay iti daydiay narugit masapul a mangalada iti tapok ti nagpuoran iti daton gapu iti basol ket ikkanda dayta iti agay-ayus a danum iti maysa a pagkargaan.
18 Kalpasanna ti maysa a nadalus a tao+ masapul a mangala iti hisopo+ ket isawsawna iti danum ket iparsiakna iti tolda ken iti amin a basehas ken kadagiti kararua nga adda sadiay ken iti daydiay nakasagid iti tulang wenno iti napapatay wenno iti bangkay wenno iti lugar a pagitabonan.
19 Ket ti nadalus a tao masapul nga iparsiakna dayta iti daydiay narugit iti maikatlo nga aldaw ken iti maikapito nga aldaw ket masapul a gugoranna manipud basol iti maikapito nga aldaw;+ ket masapul a labaanna dagiti kawesna ken agdigus iti danum, ket isu nadalusto iti rabii.
20 “‘Ngem ti tao a narugit ken saan a manggugor iti bagina, ala ket, dayta a kararua masapul a magessat+ iti tengnga ti kongregasion, agsipud ta santuario ni Jehova ti tinulawanna. Saan a naiwarsi kenkuana ti danum a pangdalus. Isu narugit.
21 “‘Ket masapul nga agserbi kas paglintegan agingga iti tiempo a di nakedngan maipaay kadakuada, a daydiay mangiparsiak iti danum a pangdalus rebbeng a labaanna dagiti kawesna,+ kasta met daydiay mangsagid iti danum a pangdalus. Isu narugitto agingga iti rabii.
22 Ket narugitto ti aniaman a banag a masagid daydiay narugit,+ ket ti kararua a mangsagid iti dayta narugitto agingga iti rabii.’”+
