Numeros 28:1-31
28 Ket ni Jehova nagsao pay ken Moises, a kunkunana:
2 “Bilinem ti annak ti Israel, ket masapul a kunaem kadakuada, ‘Rebbeng nga annadanyo nga idatag kaniak ti datonko, ti tinapayko,+ a maipaay kadagiti naipuor a datonko kas makabang-ar a sayamusom kaniak,+ kadagiti naituding a tiempoda.’+
3 “Ket masapul a kunaem kadakuada, ‘Daytoy ti naipuor a daton nga idatagyonto ken Jehova: dua a nasalun-at a kalakian a kordero a maysa ti tawenda kada aldaw kas patinayon a daton a mapuoran.+
4 Ti maysa a kalakian a kordero idatagmonto iti bigat, ket ti sabali a kalakian a kordero idatagmonto iti nagbaetan ti dua a rabii,+
5 agraman ti apagkapullo ti maysa nga efa+ ti nasayaat nga arina kas daton a bukbukel+ a nababasa iti nadingpil a lana a kakapat ti maysa a hin;+
6 ti kankanayon a daton a mapuoran,+ a naidatag idiay Bantay Sinai kas makabang-ar a sayamusom, maysa a naipuor a daton ken Jehova,+
7 agraman ti datonna nga inumen,+ ti kakapat ti maysa a hin iti tunggal kalakian a kordero.+ Iti nasantuan a disso iparukpokmo ti daton nga inumen a makabartek nga inumen+ ken Jehova.
8 Ket idatagmonto ti sabali a kalakian a kordero iti nagbaetan ti dua a rabii. Agraman ti isu met laeng a daton a bukbukel a kas iti bigat ken agraman ti isu met laeng a datonna nga inumen idatagmonto dayta kas naipuor a daton, ti makabang-ar a sayamusom ken Jehova.+
9 “‘Nupay kasta, iti aldaw ti sabbath+ addanto dua a nasalun-at a maysa ti tawenda a kalakian a kordero ken dua nga apagkapullo a sukat ti nasayaat nga arina kas daton a bukbukel a nababasa iti lana, agraman ti datonna nga inumen,
10 kas daton a mapuoran iti sabbath iti sabbathna, agraman ti kankanayon a daton a mapuoran+ ken ti datonna nga inumen.+
11 “‘Ket kadagiti panangrugi dagiti bulanyo mangidatagkayto kas mapuoran a daton ken Jehova iti dua nga urbon a toro ken maysa a kalakian a karnero, pito a nasalun-at a kalakian a kordero a saggaysa ti tawenda,+
12 ken tallo nga apagkapullo a sukat ti nasayaat nga arina kas daton a bukbukel+ a nababasa iti lana maipaay iti tunggal toro ken dua nga apagkapullo a sukat ti nasayaat nga arina kas daton a bukbukel a nababasa iti lana maipaay iti maysa a kalakian a karnero,+
13 ken apagkapullo a sukat ti nasayaat nga arina nga agsasaganad kas daton a bukbukel a nababasa iti lana maipaay iti tunggal kalakian a kordero, kas mapuoran a daton, maysa a makabang-ar a sayamusom,+ maysa a naipuor a daton ken Jehova.
14 Ket kas datonda nga inumen rebbeng nga adda maibuyog a kagudua+ ti hin nga arak maipaay iti maysa a toro ken kakatlo+ ti hin maipaay iti kalakian a karnero ken kakapat+ ti hin maipaay iti maysa a kalakian a kordero. Daytoy ti binulan a mapuoran a daton iti bulanna a maipaay kadagiti bulan ti tawen.+
15 Kasta met, rebbeng a maidatag ti maysa nga urbon+ dagiti kalding kas daton gapu iti basol ken Jehova a mainayon iti kankanayon a daton a mapuoran agraman ti datonna nga inumen.+
16 “‘Ket iti umuna a bulan, iti maikasangapulo ket uppat nga aldaw ti bulan, isunto ti paskua ni Jehova.+
17 Ket iti maikasangapulo ket lima nga aldaw daytoy a bulan maysanto a piesta. Pito nga aldaw a makanto dagiti di pinaalsa a tinapay.+
18 Iti umuna nga aldaw addanto nasantuan a kombension.+ Dikay agaramid iti aniaman a kita ti napagel a trabaho.+
19 Ket masapul a mangidatagkayo kas naipuor a daton, maysa a mapuoran a daton+ ken Jehova, iti dua nga urbon a toro ken maysa a kalakian a karnero ken pito a kalakian a kordero a saggaysa ti tawenda.+ Rebbeng a nasalun-atda maipaay kadakayo.+
20 Ket kas datdatonda a bukbukel+ a nasayaat nga arina a nababasa iti lana mangidatagkayto iti tallo nga apagkapullo a sukat maipaay iti maysa a toro ken dua nga apagkapullo a sukat+ maipaay iti kalakian a karnero.
21 Mangidatagkanto iti apagkapullo a sukat+ maipaay iti kada maysa a kalakian a kordero iti pito a kalakian a kordero;
22 ken maysa a kalding a daton gapu iti basol tapno mangaramid iti panangabbong maipaay kadakayo.+
23 Malaksid iti mapuoran a daton iti bigat, a maipaay iti kankanayon+ a daton a mapuoran,+ idatagyonto dagitoy.
24 Idatagyonto nga inaldaw ti kas met laeng kadagitoy iti pito nga aldaw kas tinapay,+ maysa a naipuor a daton, ti makabang-ar a sayamusom ken Jehova.+ Rebbeng a maidatag agraman ti kankanayon a daton a mapuoran, ken ti datonna nga inumen.
25 Ket iti maikapito nga aldaw rebbeng a mangangaykayo iti nasantuan a kombension.+ Dikay agaramid iti aniaman a kita ti napagel a trabaho.+
26 “‘Ket iti aldaw ti umuna a naluom a bungbunga,+ inton mangidatagkayo iti baro a bukbukel a daton ken Jehova, iti piesta dagiti lawasyo+ rebbeng a mangangaykayo iti nasantuan a kombension. Dikay agaramid iti aniaman a kita ti napagel a trabaho.+
27 Ket masapul a mangidatagkayo kas daton a mapuoran a maipaay a makabang-ar a sayamusom ken Jehova iti dua nga urbon a toro, maysa a kalakian a karnero, pito a kalakian a kordero a saggaysa ti tawenda;+
28 ket kas datonda a bukbukel a nasayaat nga arina a nababasa iti lana tallo nga apagkapullo a sukat maipaay iti tunggal toro, dua nga apagkapullo a sukat+ maipaay iti maysa a kalakian a karnero,
29 apagkapullo a sukat+ maipaay iti tumunggal maysa a kalakian a kordero iti pito a kalakian a kordero;
30 maysa nga urbon dagiti kalding tapno mangaramid iti panangabbong maipaay kadakayo.+
31 Malaksid iti kankanayon a daton a mapuoran ken ti datonna a bukbukel idatagyonto ida.+ Rebbeng a nasalun-atda maipaay kadakayo,+ agraman dagiti datonda nga inumen.+
