Numeros 13:1-33
13 Ni Jehova nagsao ita ken Moises, a kunkunana:
2 “Mangibaonka maipaay kenka kadagiti lallaki tapno simisimenda ti daga ti Canaan, nga itedko iti annak ti Israel.+ Mangibaonkayto iti maysa a lalaki maipaay iti tunggal tribu dagiti ammana, tunggal maysa ket panguluen+ kadakuada.”
3 Gapuna imbaon ida ni Moises manipud let-ang ti Paran+ iti panagbilin ni Jehova. Amin dagiti lallaki ket pannakaulo ti annak ti Israel.
4 Ket dagitoy ti nagnaganda: Iti tribu ni Ruben, ni Sammua nga anak ni Zacur;
5 iti tribu ni Simeon, ni Safat nga anak ni Hori;
6 iti tribu ni Juda, ni Caleb+ nga anak ni Jefune;
7 iti tribu ni Isacar, ni Igal nga anak ni Jose;
8 iti tribu ni Efraim, ni Hosea+ nga anak ni Nun;
9 iti tribu ni Benjamin, ni Palti nga anak ni Rafu;
10 iti tribu ni Zabulon, ni Gaddiel nga anak ni Sodi;
11 iti tribu ni Jose,+ maipaay iti tribu ni Manases,+ ni Gaddi nga anak ni Susi;
12 iti tribu ni Dan, ni Amiel nga anak ni Gemalli;
13 iti tribu ni Aser, ni Setur nga anak ni Miguel;
14 iti tribu ni Neftali, ni Nabi nga anak ni Vofsi;
15 iti tribu ni Gad, ni Geuel nga anak ni Maqui.
16 Dagitoy ti nagnagan dagiti lallaki nga imbaon ni Moises a mangsimisim iti daga. Ket intultuloy ni Moises a naganen ni Hosea nga anak ni Nun iti Jehosua.+
17 Idi ibabaon ida ni Moises tapno simisimenda ti daga ti Canaan, kinunana kadakuada: “Sumang-atkayo ditoy a mapan iti Negeb,+ ket masapul a sumang-atkayo iti nakabambantay a rehion.+
18 Ket masapul a kitaenyo no ania ti daga+ ken dagiti tattao nga agnanaed iti dayta, no napigsada wenno nakapuyda, no bassitda wenno aduda;
19 ken no ania ti daga a pagnanaedanda, no nasayaat wenno dakes, ken no ania dagiti siudad a pagnanaedanda, no adda kadagiti pakarso wenno kadagiti sarikedked;
20 ken no ania ti daga, no nataba wenno nalagpit,+ no adda kaykayo iti dayta wenno awan. Ket masapul nga ipakitayo a naturedkayo+ ket mangalakayo iti sumagmamano kadagiti bunga ti daga.” Ita ti al-aldaw isu idi ti al-aldaw ti umuna a naluom a bungbunga dagiti ubas.+
21 Gapuna simmang-atda ket sinimisimda ti daga manipud let-ang ti Zin+ agingga iti Rehob+ agingga iti seserkan ti Hamat.+
22 Idi simmang-atda idiay Negeb,+ dimtengda kalpasanna iti Hebron.+ Ita da Ahiman, Sesai ken Talmai,+ dagidiay nayanak ken Anak,+ addada idi sadiay. Kabayatanna, naibangonen ti Hebron+ pito a tawen sakbay ti Zoan+ ti Egipto.
23 Idi dimtengda iti naapres a ginget ti Escol,+ ngarud nangpukanda manipud sadiay iti maysa a saringit nga addaan sangaraay nga ubas.+ Ket inawitda dayta iti dua kadagiti lallaki babaen ti arimata, ken kasta met ti sumagmamano kadagiti granada+ ken sumagmamano kadagiti higos.
24 Pinanagananda dayta a disso iti naapres a ginget ti Escol,+ maigapu iti raay a pinukan ti annak ti Israel manipud sadiay.
25 Kamaudiananna iti ngudo ti uppat a pulo nga aldaw+ nagsublida manipud panangsimisim iti daga.
26 Gapuna nagnada ket dimtengda kada Moises ken Aaron ken iti intero a gimong ti annak ti Israel iti let-ang ti Paran, idiay Cades.+ Ket dimtengda a nangyeg iti sao kadakuada ken iti intero a gimong ket impakitada kadakuada ti bunga ti daga.
27 Ket impadamagda kenkuana ket kinunada: “Simrekkami iti daga a nangibaonam kadakami, ket pudno a pagay-ayusan ti gatas ken diro,+ ket daytoy ti bungana.+
28 Nupay kasta, ti kinapudnona ket napipigsa dagiti tattao nga agnanaed iti daga, ket dadakkel unay dagiti nasarikedkedan a siudad;+ ken, kasta met, nakitami sadiay dagidiay nayanak ken Anak.+
29 Dagiti Amalekita+ agnanaedda iti daga ti Negeb,+ ket dagiti Heteo ken dagiti Jebuseo+ ken dagiti Amoreo+ agnanaedda iti nakabambantay a rehion, ket dagiti Canaanita+ agnanaedda iti igid ti baybay ken iti igid ti Jordan.”
30 Idin pinadas ni Caleb+ a pagtalnaen dagiti umili iti sanguanan ni Moises ket kinunana: “Sumang-attayo a madagdagus, ket naikeddeng a tagikuaentayo dayta, agsipud ta sigurado nga abakentayo.”+
31 Ngem kinuna dagiti lallaki a nakipagsang-at kenkuana: “Saantayo a kabaelan ti sumang-at a bumusor kadagiti umili, agsipud ta napigpigsada ngem datayo.”+
32 Ket intultuloyda ti nangyeg iti annak ti Israel iti dakes a damag+ maipapan ti daga a sinimisimda, a kunkunada: “Ti daga, a linasatmi a simisimen, ket maysa a daga a manglamut kadagiti agnanaed kenkuana; ket amin dagiti tattao a nakitami iti tengngana lallakida a nalablabes ti kadakkelda.+
33 Ket nakitami sadiay dagiti Nefilim, ti annak ni Anak,+ a nagtaud kadagiti Nefilim; isu a kadagiti bukodmi a mata nagbalinkami a kasla kadagiti rumsa, ket kasta met laeng ti nagbalinanmi kadagiti matada.”+
