Numeros 31:1-54
31 Kalpasanna ni Jehova nagsao ken Moises, a kunkunana:
2 “Ibalesam+ kadagiti Midianita+ ti annak ti Israel. Kalpasanna maitiponkanto kadagiti kailiam.”+
3 Gapuna nagsao ni Moises kadagiti umili, a kunkunana: “Mangkabalkayo kadagiti lallaki manipud kadakayo maipaay iti buyot, iti kasta makapagserbida a bumusor iti Midian tapno ipakatda ti pammales ni Jehova iti Midian.+
4 Sangaribu iti tunggal tribu ti amin a tribu ti Israel ti ibaonyonto iti buyot.”
5 Iti kasta manipud rinibu+ ti Israel sangaribu ti naituding kada tribu, sangapulo ket dua a ribu a nakabalan maipaay iti buyot.+
6 Kalpasanna imbaon ida ni Moises, sangaribu iti tunggal tribu, a mapan iti buyot, isuda ken ni Finehas+ nga anak ni Eleazar a padi a mapan iti buyot, ket adda idi iti imana dagiti nasantuan nga aruaten ken dagiti trumpeta+ a pangpaguni kadagiti awag.
7 Ket nakigubatda iti Midian, kas iti imbilin ni Jehova ken Moises, ket pinatayda ti tunggal lalaki.+
8 Ket pinatayda ti ar-ari ti Midian agraman dagiti sabali pay a napapatay, awan sabali, da Evi ken Rekem ken Zur ken Hur ken Reba, ti lima nga ari ti Midian;+ ket pinatayda ni Balaam+ nga anak ni Beor babaen ti kampilan.
9 Ngem ti annak ti Israel impanawda a kautibo dagiti babbai ti Midian ken dagidiay ubbingda;+ ket sinamsamda dagiti amin a naamo nga animalda ken amin a dinguenda ken amin a sanikuada a pagbiag.
10 Ket amin dagiti siudadda a nagyananda ken amin dagiti napaderan a pakarsoda pinuoranda iti apuy.+
11 Ket innalada ti isuamin a samsam+ ken isuamin a nakamkam a tattao ken naamo nga an-animal.
12 Ket inyegda kada Moises ken Eleazar a padi ken iti gimong ti annak ti Israel dagiti kautibo ken ti nakamkam ken ti samsam, iti pakarso, iti desierto a tantanap ti Moab,+ nga adda iti igid ti Jordan idiay Jerico.
13 Idin da Moises ken Eleazar a padi ken amin dagiti panguluen ti gimong rimmuarda a sumabet kadakuada iti ruar ti pakarso.
14 Ket nagrurod ni Moises kadagiti nadutokan a lallaki kadagiti puersa a pakiranget,+ kadagiti panguluen ti rinibu ken kadagiti panguluen ti ginasut nga um-umay idi manipud namilitariaan a panagdaliasat.
15 Gapuna kinuna kadakuada ni Moises: “Tinaginayonyo kadi a sibibiag ti tunggal babai?+
16 Adtoy! Isuda dagidiay, babaen ti sao ni Balaam, nagserbi a manguyot iti annak ti Israel tapno agaramidda iti di kinamatalek+ ken Jehova iti pasamak ti Peor,+ iti kasta dimteng ti pannaplit iti gimong ni Jehova.+
17 Ket ita patayenyo ti tunggal lalaki kadagiti ubbing, ket patayenyo ti tunggal babai a nakidenna iti lalaki babaen ti pannakikaidda iti lalaki.+
18 Ket taginayonenyo a sibibiag maipaay iti bagbagiyo ti amin nga ubbing kadagiti babbai a saan a nakaammo iti aramid a pannakikaidda iti lalaki.+
19 No maipapan kadakayo, agpakarsokayo iti ruar ti pakarso iti pito nga aldaw. Tunggal maysa a nangpapatay iti kararua+ ken tunggal maysa a nangsagid iti asinoman a napapatay,+ rebbeng a gugoranyo+ ti bagbagiyo iti maikatlo nga aldaw ken iti maikapito nga aldaw, dakayo ken dagiti kautiboyo.
20 Ket tunggal kawes ken tunggal aruaten a lalat ken isuamin a naaramid iti dutdot ti kalding ken tunggal aruaten a kayo rebbeng a gugoranyo maipaay iti bagbagiyo manipud basol.”+
21 Ni Eleazar a padi kinunana kalpasanna kadagiti lallaki ti buyot a napan iti bakal: “Daytoy ti pagalagadan ti linteg nga imbilin ni Jehova ken Moises,
22 ‘Ti laeng balitok ken ti pirak, ti gambang, ti landok, ti lata ken ti buli,
23 isuamin a naaramid babaen iti apuy,+ rebbeng nga ipalasatyo iti apuy, ket nadalusto. Isuna laeng ta rebbeng a magugoran iti danum a pangdalus.+ Ket isuamin a saan a naaramid babaen iti apuy rebbeng nga ipalasatyo iti danum.+
24 Ket masapul a labaanyo dagiti kawesyo iti maikapito nga aldaw ket madalusankayo, ket kalpasanna mabalinyo ti sumrek iti pakarso.’”+
25 Ket kinuna ni Jehova daytoy ken Moises:
26 “Alaenyo ti pakagupgopan ti nakamkam, dagiti kautibo agpadpada ti tao ken dagiti naamo nga animal, sika ken ni Eleazar a padi ken dagiti pannakaulo ti amma ti gimong.
27 Ket ti nakamkam masapul a bingayem iti dua iti nagbaetan dagidiay makiramraman iti bakal a napan iti panagdaliasat ken amin a nabatbati iti gimong.+
28 Ket kas buis+ maipaay ken Jehova masapul a mangalaka manipud kadagiti lallaki ti gubat a napan iti panagdaliasat iti maysa a kararua manipud lima gasut, iti tao ken iti pangen ken kadagiti asno ken iti arban.
29 Rebbeng nga alaem dayta iti kaguduada ket masapul nga itedmo ken Eleazar a padi kas kontribusion ni Jehova.+
30 Ket manipud iti kagudua ti annak ti Israel rebbeng a mangalaka iti maysa manipud limapulo, iti tao, iti pangen, kadagiti asno ken iti arban, iti tunggal kita ti naamo nga animal, ket masapul nga itedmo ida kadagiti Levita,+ dagiti agay-aywan iti pagrebbengan ti tabernakulo ni Jehova.”+
31 Ket inaramid da Moises ken Eleazar a padi kas iti imbilin ni Jehova ken Moises.
32 Ket ti nakamkam, ti natedda iti samsam nga innala dagiti tattao ti panagdaliasat kas samsam, nagdagup iti innem a gasut pitopulo ket lima a ribu iti arban,
33 ken pitopulo ket dua a ribu iti pangen,
34 ken innem a pulo ket maysa a ribu nga asno.
35 No maipapan kadagiti natauan a kararua+ manipud kadagiti babbai a saan a nakaammo iti aramid a pannakikaidda iti lalaki,+ amin dagiti kararua tallopulo ket dua a ribuda.
36 Ket ti kagudua nga isu idi ti binglay dagidiay napan iti panagdaliasat nagdagup ti bilangda iti tallo gasut tallopulo ket pito a ribu lima gasut iti arban.
37 Ket ti buis+ a maipaay ken Jehova manipud arban nagdagup iti innem a gasut pitopulo ket lima.
38 Ket iti pangen adda tallopulo ket innem a ribu, ket ti buis kadakuada maipaay ken Jehova pitopulo ket dua.
39 Ket dagiti asno tallopulo a ribu lima gasut, ket ti buis kadakuada maipaay ken Jehova innem a pulo ket maysa.
40 Ket dagiti natauan a kararua sangapulo ket innem a ribu, ket ti buis kadakuada maipaay ken Jehova tallopulo ket dua a kararua.
41 Idin ni Moises intedna ken Eleazar a padi ti buis kas kontribusion ni Jehova,+ kas iti imbilin ni Jehova ken Moises.+
42 Ket manipud iti kagudua a kukua ti annak ti Israel, a biningay ni Moises manipud iti kukua dagiti lallaki a nakigubat:
43 Ita ti kagudua ti gimong manipud iti arban nagdagup iti tallo gasut tallopulo ket pito a ribu lima gasut,
44 ket iti pangen, tallopulo ket innem a ribu,
45 ket dagiti asno, tallopulo a ribu lima gasut,
46 ket dagiti natauan a kararua, sangapulo ket innem a ribu.
47 Kalpasanna innala ni Moises manipud iti kagudua a kukua ti annak ti Israel daydiay maala manipud limapulo, iti tao ken iti naamo nga an-animal, ket intedna ida kadagiti Levita,+ dagiti agay-aywan iti pagrebbengan+ ti tabernakulo ni Jehova, kas iti imbilin ni Jehova ken Moises.
48 Ket dagiti nadutokan a lallaki iti rinibu ti buyot,+ dagiti panguluen ti rinibu ken dagiti panguluen ti ginasut,+ immasidegda ken Moises,
49 ket kinunada ken Moises: “Innala dagiti adipenmo ti pakagupgopan dagiti lallaki ti gubat nga adda iti aywanmi ket awan maysa a naipadamag a mapukpukaw kadakami.+
50 Gapuna bay-am nga idatagmi tunggal maysa no ania ti nasarakanna kas daton ni Jehova,+ dagiti aruaten a balitok, dagiti babassit a tanikala ti palaypalay, ken dagiti pulseras, dagiti pangtanda a singsing,+ dagiti aritos, ken dagiti pagarkos ti babbai,+ tapno aramiden ti panangabbong maipaay kadagiti kararuami iti sanguanan ni Jehova.”
51 Iti kasta inawat da Moises ken Eleazar a padi ti balitok manipud kadakuada,+ isuamin nga alahas.
52 Ket ti isuamin a balitok ti kontribusion nga inkontribusionda ken Jehova nagdagup iti sangapulo ket innem a ribu pito gasut ket limapulo a siklo, manipud kadagiti panguluen ti rinibu ken kadagiti panguluen ti ginasut.
53 Dagiti lallaki ti buyot nangalada iti samsam tunggal maysa maipaay iti bagina.+
54 Gapuna inawat da Moises ken Eleazar a padi ti balitok manipud kadagiti panguluen ti rinibu ken ti ginasut ket inyegda iti tolda ti gimong kas pakalaglagipan+ maipaay iti annak ti Israel iti sanguanan ni Jehova.
