Action Wit Da Aposals 6:1-15
6 At dat time wen da numba followas wuz growing, da Jews dat speak Greek wen start fo complain agains da Jews dat speak Hebrew, cuz wen come time fo hand out da food fo da day, da Greek widows no wuz getting wat dey suppose to.
2 So da Twelve call all da followas togedda an sed: “Az not good dat we stop teaching God’s message fo serve food at da tables.
3 So braddahs, pick seven guys wit one good rep* dat stay akamai an full of God’s powa, so dat we can put dem in charge of dis work.
4 We goin give all oua time fo praya an teaching God’s message.”
5 All da followas like dea idea an wen choose Stephen, one guy wit plenny faith an full of God’s powa, also Philip, Prochʹo·rus, Ni·caʹnor, Tiʹmon, Parʹme·nas, an Nic·o·laʹus, one guy from Antioch dat wen come one believa.
6 Dey bring dem to da aposals, an afta dey pray, dey wen put dea hands on dem.*
7 So moa an moa peopo wen hea God’s message, an da numba of followas in Jerusalem keep growing plenny. An plenny pries guys come followas too.
8 Cuz Stephen had God’s backing an powa, he wuz doin unreal tings an miracles in front da peopo.
9 But some guys from da group dass called Synagog Of Da Freedmen* wen come wit guys from Cy·reʹne, Alexandria, an some guys from Ci·liʹcia an Asia, fo argue wit Stephen.
10 But cuz he wuz akamai an had God’s powa, wateva dey sed neva work.
11 Witout letting peopo know, dey get guys fo say: “We wen hea him say bad tings agains Moses an God.”
12 Dey get da peopo all worked up, an da eldas an scribes* too. An dey rush him, arrest um, an drag um to da High Court.*
13 An dey bring guys fo lie, an dose bulaias tell: “Dis guy no stop talking agains dis holy place an agains da Law.
14 Like we wen hea him say dat Jesus da Naz·a·reneʹ goin buss down dis place an change all da rules Moses wen give us.”
15 Evrybody sitting in da High Court wuz staring at him, an dey see dat his face look like one angel’s face.
Footnotes
^ Or, “seven guys dat peopo talk good about”.
^ Dis wuz someting dey did fo show dey wuz picked fo do da work.
^ Seem like dis stay talking about one group of Jews or guys dat wen come Jews dat wen meet togedda fo pray an read scripchas. Dey probly wuz slaves or prisonas dat wuz freed.
^ Go check out “High Court” in Da Bible Dictionary.
