Action Wit Da Aposals 14:1-28
14 In I·coʹni·um dey wen go togedda inside one synagog* an dey wen talk so good dat plenny Jews an Greeks* wen come believas.
2 But da Jews who neva believe had work up da peopo of da nations an make dem go agains da braddahs.
3 So dey spen long time talking to da peopo cuz Jehovah* wen give dem da powa fo no be sked talk about his message. An God show he wuz happy wit da message dey wuz spreading about his unreal love* by letting dem do miracles an awesome tings.
4 But evrybody in da town wuz split up. Some wuz fo da Jews an oddas fo da aposals.
5 Wen da Jews wit dea rulas, an da guys dat no wuz Jews wuz planning fo go afta Paul an Barʹna·bas an stone um,
6 Paul dem wen find out an run away to Lyc·a·oʹni·a, Lysʹtra an Derʹbe, an da country aroun dea.
7 Dey no stop telling da good news ova dea.
8 In Lysʹtra had one guy sitting down. He wuz cripple an he neva walk since he wuz born.
9 He wuz lissening to Paul talk. An Paul wen look strait at him an could see he had faith dat he could get healed.
10 So he sed real loud: “Stan up.” So da guy wen jump up an start fo walk.
11 Wen da peopo see wat Paul did, dey yell in da Lyc·a·oʹni·an language: “Da gods wen come humans an come down to us!”
12 So dey start fo call Barʹna·bas Zeus, an Paul Herʹmes, since he wuz da one talking da mos.
13 An one pries fo Zeus, who had one tempo close to da town, wen bring bulls an leis to da gates fo da town an wanted fo make sacrifices wit all da peopo.
14 But wen da aposal Barʹna·bas an da aposal Paul hea dis, dey rip dea clothes* an run in da middo of da crowd an yell:
15 “Eh you guys! Wat you doin? We regula guys jus like you, an we suffa jus like you guys. An we telling you da good news, so dat you can turn away from dese worthless tings an turn to da God dat stay alive, da one who wen make da heaven an da earth an da ocean an all da tings in um.
16 In da pas he wen let peopo living in odda places* do wateva dey like,
17 but he did good tings fo show wat he stay like, giving you rain fo have good harves seasons, giving you plenny food an making yoa heart happy.”
18 An even tho dey wen say all dis, still yet no wuz easy fo stop da peopo from sacrificing to dem.
19 But Jews wen come from Antioch an I·coʹni·um an wen convince da peopo fo go agains dem, so dey stone Paul an drag um outside da town, cuz dey tink he dead.
20 But wen da followas come aroun him, he get up an go in da town. Den da nex day he wen go Derʹbe wit Barʹna·bas.
21 Afta dey tell da good news in dat town an make plenny new followas, dey go back Lysʹtra, I·coʹni·um, an Antioch.
22 Dey make da followas ova dea come moa strong, telling dem fo no give up an have strong faith. Dey sed to dem: “We gotta suffa plenny fo go inside God’s Govament.”
23 On top of dat, dey pick guys fo be eldas* in evry hui. Dey wen pray an fast,* an leave dem in Jehovah’s kea, da one dey wen come fo believe in.
24 Den dey wen go thru Pi·sidʹi·a an get to Pam·phylʹi·a,
25 an afta dey tell God’s message in Perga, dey go down to At·ta·liʹa.
26 From dea dey get on one boat an go back Antioch. Dass wea da braddahs had pray fo God show his unreal love to Paul dem fo help dem do da work, da work dey jus wen pau.
27 Wen dey got dea, dey get da hui togedda an tell um all da tings God wen help dem do, an dat he wen open up da way* fo da guys dass not Jews fo come believas.
28 So dey wen spen plenny time wit da followas ova dea.
