Action Wit Da Aposals 12:1-25
12 Aroun dat time King Herod start fo make some of da guys in da hui suffa.
2 He wen have James, da braddah of John, killed by da sword.
3 Wen he seen da Jews wuz happy about dat, he wen go arrest Peter too. (Dis wuz during da time of da Festival Of Bread Dat No Moa Yeast.)*
4 He arrest him an put um in jail. An he make shua had four shifts, one afta anodda, of four soldiers guarding him. He wuz planning fo bring him out* in front da peopo afta da Passova.*
5 While Peter wuz hold up in jail, da hui keep praying real hahd fo him.
6 Da night befoa Herod wuz goin bring him out, Peter wuz sleeping. He wuz chained to two soldiers, an had two guards in front da door watching da jail.
7 But Jehovah’s* angel wuz standing dea, an one light wen shine in da cell. He hit Peter on da side fo wake him up an tell um: “Hurry up! Get up!” An da chains fall off his hands.
8 Da angel tell him: “Get ready fo go, an put yoa sandals on.” So dass wat he did. Den da angel tell him: “Put yoa robe on an follow me.”
9 So Peter go out an keep following him. But he neva know dat wat da angel wuz doin wuz real. He tink he seeing one vision.
10 Dey wen go pas da firs guard pos an den da secon. Wen dey reach da iron gate dat go outa da jail an into da town, it open by itself. Afta dey pas da gate, dey go down one street, an da angel go away.
11 An wen Peter realize wat happen, he sed: “Now I know fo shua Jehovah wen sen his angel fo save me from Herod an from evryting da Jews wen expeck fo happen.”
12 Now dat he know wat goin on, he go Mary’s house. She wuz da maddah of John who wuz called Mark. An ova dea plenny peopo wuz praying.
13 Wen he knock on da door of da main gate, one worka girl named Rhoda go fo see who wuz dea.
14 She recognize Peter’s voice an come so happy dat she foget fo open da gate. She run back inside an tell evrybody dat Peter stay outside.
15 Dey tell her: “You crazy!” But she keep saying dass him. Dey start fo tell: “Az his angel.”
16 Peter still stay outside, knocking. Wen dey open da door, dey see him an no could believe wuz him.
17 But he make one sign wit his hand fo tell dem fo be quiet. Den he tell dem evryting about how Jehovah had buss him outa jail, an sed: “Go tell James an da odda braddahs all dis.” Afta dat, he go far away to anodda place.
18 Wen wuz day time, da soldiers wuz shock about wat wen happen to Peter.
19 Herod orda some soldiers fo go look all ova fo him. Wen dey neva find him, he question da guards an give da orda fo take dem away an punish um. Den he go down from Ju·deʹa to Caes·a·reʹa an spen some time ova dea.
20 Herod wuz all mad wit da peopo in Tyre an Siʹdon. So dey hui up an go to him cuz dea country wen get dea food from da land wea he rule ova. Dey talk to Blastus, da guy in charge of da king’s house, an get him fo help dem make peace wit da king.
21 On one day da peopo wen get togedda, Herod wen put on his fancy clothes an sit down on da spesho chair, an he start fo give one speech.
22 Den all da peopo yell: “He get one voice like one god, not one man!”
23 Right den an dea, Jehovah’s angel make um sick cuz he take da praise dat ony belong to God. Den worms wen eat him up an he mahke.
24 But Jehovah’s message wen keep spreading an plenny moa peopo wen come believas.
25 Afta Barʹna·bas an Saul pau da relief work in Jerusalem, dey go back Antioch an take John wit dem, da one dey call Mark.
Footnotes
^ Go check out “Festival Of Bread Dat No Moa Yeast” in Da Bible Dictionary.
^ Or, “out to trial”.
