Action Wit Da Aposals 21:1-40
21 Wuz so hahd fo leave dem, but we finally had get on da boat an wen sail strait fo Cos. Da nex day we wen go to Rhodes, den to Patʹa·ra.
2 In dat town, we find one boat dat wuz headed to Phoe·niʹcia, so we get on um an sail away.
3 Afta we wen see da island of Cyʹprus from da lef side of da boat,* we wen pass um an go Syria. We dock at Tyre wea dey had unload all da cargo.
4 Ova dea, we wen look fo da braddahs, an afta we find dem, we stay dea fo seven days. But God’s powa wen help dem fo know stuffs, so dey tell Paul ova an ova fo no go Jerusalem.
5 Wen come time fo leave, we start fo go. But all dem, even da wahines an kids, come wit us to da coast. On da beach we wen get on oua knees fo pray
6 an den sed aloha to each odda. Den afta we got on da boat, evrybody go back home.
7 So we leave Tyre an get to Ptol·e·maʹis. Ova dea we give oua aloha to da braddahs an stay wit dem fo one day.
8 Da nex day, we leave an get to Caes·a·reʹa. We go da house of Philip da preacha,* an wen stay dea wit him. He wuz one of da seven braddahs da aposals wen choose in Jerusalem.
9 Dis guy had four daughtahs dat no wuz married,* an dey wen prophesy.
10 Afta we wuz dea fo some time, one prophet named Agʹa·bus wen come down from Ju·deʹa.
11 An he come by us an take Paul’s belt an tie up his own hands an feet an sed: “God’s powa wen tell, ‘Da guy dis belt belong to, da Jews in Jerusalem goin tie um up jus lidis an goin turn um ova to da guys dass not Jews.’”
12 Wen we hea dis, us an evrybody dea beg Paul fo no go Jerusalem.
13 Den Paul ansa dem: “How come you crying an trying fo stop me from goin?* No worry, I ready fo get tie up an even die in Jerusalem fo da Lord Jesus.”
14 Wen we no could change his mind, we wen stop talking about um awready an sed: “Wateva Jehovah* like, let um happen.”
15 Afta we wuz dea fo litto while, we make ready an start fo head to Jerusalem.
16 Some followas from Caes·a·reʹa went wit us an wen take us to Mnaʹson’s house wea we wen stay. He wuz one long time followa from Cyʹprus.
17 Wen we get to Jerusalem, da braddahs wuz happy fo see us.
18 Da nex day Paul wen go see James wit us, an all da eldas wuz dea.
19 Afta Paul tell dem howzit, he started fo tell um evryting dat God did thru his preaching work fo da peopo dass not Jews.
20 Afta dey hea dis, dey start fo praise God, but tell him: “Look brah, get tens of tousands of Jews dass believas an dey all die hahds wen come to da Law.
21 But dey heard rumors about you dat you stay teaching da guys from da nations dat wen come Jews fo leave da Law from Moses, telling dem dey no need circumcise dea kids or follow odda stuff oua peopo do.
22 So wat we goin do about dat? Garanz dey goin find out you stay hea.
23 So den do dis: Get four guys wit us dat wen make one promise to God.
24 Take dem wit you, an all you guys go do wat da Law tell fo come clean. Pay fo da tings dey need so dey can get dea heads shaved. Den evrybody goin know dat da rumors about you no stay tru, dat you stay doin tings da right way an following da Law.
25 Az fo da guys dass not Jews dat wen come believas, we had write to dem wat we wen decide dat dey gotta stay away from tings sacrificed to idols, from blood, from tings dass strangled,* an from pilau sex.”*
26 So da nex day, Paul take da guys an dey go do wat da Law tell fo come clean. Den he go inside da tempo fo tell wen da seven days fo come clean goin be pau, so dat da pries can make one sacrifice fo each of dem on dat day.
27 Wen da seven days wuz almos pau, da Jews from Asia see Paul at da tempo an wen get da crowd all worked up agains Paul. Dey grab um
28 an yell: “Eh you Israel guys, come help us! Dis da guy who teach evrybody all ova da place fo go agains oua peopo, oua Law, an oua tempo. Moa den dat, he stay bringing Greeks inside da tempo an he make dis holy place pilau.”
29 Cuz earlia dey had see Trophʹi·mus da E·pheʹsian in da town wit Paul, so dey tink he wen bring um inside da tempo.
30 Da whole town come all nutz, an dey come running fo grab Paul an drag um outa da tempo, an right away dey shut da doors.
31 Wen dey wuz trying fo kill um, da commanda of da army hea about da mob action goin on in Jerusalem.
32 So real quick he take soldiers an army officers an run down to dem. Wen da peopo see da army commanda an da soldiers, dey stop bussing up Paul.
33 Den da army commanda come an arrest Paul an tell his guys fo tie um up wit two chains. Den he ask who he wuz an wat he wen do.
34 But some guys in da crowd start fo yell one ting, an odda guys yell someting else. Cuz evrybody wuz yelling so much, he no could find out da trut about wat wen happen. Az why he tell his guys fo bring Paul to da place wea da soldiers live.
35 But wen Paul reach da stairs, da soldiers had fo carry him cuz da peopo wanted fo hurt um.
36 Plenny peopo keep following dem an yelling: “Kill um!”
37 Right wen he wuz about fo go inside wea da soldiers live, Paul ask da army commanda: “I can ask you someting?” He sed: “Ho, you talk Greek?
38 You not da Egyptian, who befoa time wen start one big beef wit da govament an wen take 4,000 assassins* into da boonies?”
39 Den Paul sed: “I one Jew born in Tarsus, one importan town from da Ci·liʹcia area. So please, let me talk to dese peopo.”
40 Afta da commanda give him da okay, Paul stan on da stairs an motion wit his hand to da peopo. Evrybody wen come quiet, an he start fo talk to dem in da Hebrew language, saying:
