Action Wit Da Aposals 2:1-47
2 Wen da day of da Festival Of Pentecost* wuz goin on, dey wuz all togedda in da same house.
2 All of a sudden, had one noise from heaven dat soun like one strong wind blowing. Could hea um in da whole house wea dey wuz sitting.
3 An dey seen flames dat look like tongues dat wen spread out an sit on top each one of dem.
4 Den all dem wen get God’s powa an started fo talk in diffren kine languages,* jus like how God’s powa wanted dem fo talk.
5 Dat time, had Jews from evry country on earth staying in Jerusalem. Dey had choke respeck fo God.
6 Wen dey hea dat soun, choke peopo wen gadda togedda an dey neva know wat wuz goin on, cuz evry one of dem heard dea own language wen da followas had talk.
7 Dis wen blow dea mind big time, an dey tell: “Aiyah, all dese guys talking iz Gal·i·leʹans ah?
8 So den how come we stay hearing oua own language?*
9 Parʹthi·ans, Medes, an Eʹlam·ites, da peopo dat live in Mes·o·po·taʹmi·a, Ju·deʹa an Cap·pa·doʹci·a, Ponʹtus an da districk of Asia,
10 Phrygʹi·a an Pam·phylʹi·a, Egypt an da lands of Libʹy·a by Cy·reʹne, visitas from Rome, both Jews an guys dat wen come believas,*
11 Creʹtans, an Arabians—we hea dem talking in oua languages about da awesome tings of God.”
12 Dey wuz all shock an confused, an dey tell each odda: “Eh, wass goin on hea?”
13 But had odda guys dea dat make fun of dem an sed: “Dey stay drunk.”*
14 But Peter stan up wit da Eleven, an in one loud voice he tell dem: “You guys from Ju·deʹa an all you odda guys from Jerusalem, I goin make dis clear so lissen up.
15 Dese guys no stay drunk, cuz iz ony 9 in da morning.*
16 Radda, dis iz wat da prophet Joel wen say would happen:
17 ‘“An in da las days,” God sed, “I goin give my powa to all kine peopo. Den yoa boys an yoa girls goin prophesy, an yoa young guys goin see visions, an yoa old guys goin get spesho dreams.
18 In dose days, I goin even give my powa to my girl an guy workas, an dey goin prophesy.
19 An I goin show signs in da sky an signs on da earth—blood an fiyah an thick smoke.
20 Da sun goin come dark an da moon goin come red like blood befoa da awesome an spesho day of Jehovah* come.
21 An evrybody dat call on da name of Jehovah goin get saved.”’
22 “You guys from Israel, lissen up: Jesus da Naz·a·reneʹ wuz one guy God wen sen. Dis wuz made clear thru da unreal miracles an signs God did thru him in front you guys, an dis you awready know.
23 God wen know ahead of time dat Jesus wuz goin be arrested an He decided fo let um happen. You wen let criminals nail dis guy to one pos, an you killed him.
24 But God wen bring him back to life an wen free him from da grip* of death, cuz death neva have nuff powa fo hold um.
25 An David sed about him: ‘I keep Jehovah in front me all da time. Cuz he stay by my right hand, I no need worry.
26 Dass why my heart feel all happy an I talk wit plenny joy. I* goin always have hope
27 cuz you not goin leave me* in da Grave,* an you not goin let yoa loyal one rot.
28 You wen show me da way to life an you goin make me supa happy wen I stay wit you.’
29 “You guys, let me tell you someting about yoa ancesta David, an I not goin hold back. He wen die an wuz buried, an his tomb stay hea til dis day.
30 He wuz one prophet an knew dat God wen promise him dat somebody from his bloodline wuz goin sit on his throne.
31 He knew about Christ’s resurrection befoa had happen an he wen talk about um, dat God wouldn’t leave da Christ in da Grave an let his body wase away.
32 God resurrected Jesus, an all us wen see dat.
33 An cuz he wuz lifted up fo sit at God’s right hand, he got da powa his Faddah wen promise him, an he wen give dat powa to us. Dass wat you seeing an hearing.
34 David neva go heaven, but sed um himself, ‘Jehovah wen tell my Lord: “Sit ova hea on my right side
35 til I put yoa enemies unda yoa feet.”’
36 So den all you guys from Israel gotta know fo shua dat God wen make Jesus oua Lord an Christ. He da one you wen kill on da pos.”
37 Wen dey hea dis, had stab dem in da heart, an dey sed to Peter an da odda aposals: “You guys, wat we gotta do?”
38 Peter sed: “You gotta come sorry an change wat you doin. An evry one of you gotta get baptized fo show you respeck* Jesus so God can fogive yoa sins. Den you goin get God’s powa az one free gif.
39 Dis promise iz fo you an yoa kids an fo all da guys dat live far away, whoeva Jehovah oua God like bring to him.”
40 An he tell dem plenny moa tings fo explain evryting real good, an he keep telling dem: “Get away from dese wicked peopo cuz dea tinking stay all messed up, an no get wipe out wit dem.”
41 An all da guys dat believe in wat Peter tell got baptized. Had aroun 3,000 peopo dat wen come believas dat day.
42 An dey wen keep learning from da aposals, sharing evryting wit each odda, eating togedda, an praying togedda.
43 Da aposals did choke miracles an wen evrybody seen um, had make dem respeck God plenny.
44 All da guys dat wen come believas wuz all togedda an wen share evryting dey had wit each odda.
45 Dey wuz selling dea land an all dea stuff an giving da money to whoeva need um.
46 An evry day, dey wuz togedda at da tempo. Dey would share dea food an go each oddas house fo eat, an dey wuz happy fo do um.
47 Dey wuz praising God an evrybody wen keep tinking good about dem. Same time, evry day Jehovah wen bring moa peopo fo join dem an get saved.
Footnotes
^ Or, “tongues”.
^ Or, “maddah tongue”.
^ Or, “proselyte”. Guys dat wen change fo come Jews.
^ Or, “drunk on sweet wine; new wine”.
^ In da original Greek dis wen mean “iz da third hour of da day”.
^ Or might be, “ropes”.
^ In da original Greek dis wen mean “my flesh”.
^ In da original Greek dis wen mean “in da name of”. Dis mean fo recognize Jesus authority.
