Action Wit Da Aposals 15:1-41
15 Some guys wen come down from Ju·deʹa an start fo teach da braddahs: “If you no get circumcised like how da Law of Moses tell, you no can get saved.”
2 But afta Paul an Barʹna·bas wen go at it wit dose guys fo long time cuz dey no could agree, dey pick Paul, Barʹna·bas, an some oddas fo go up Jerusalem fo see da aposals an eldas about dis matta.
3 So afta da hui wen walk wit dem part of da way, dey wen go thru Phoe·niʹcia an Sa·marʹi·a an tell evryting about how peopo dat no wuz Jews start fo worship God. An dat wen make da braddahs supa happy.
4 Wen dey get to Jerusalem, da hui, da aposals, an da eldas wen show dem plenny aloha. An dey tell dem all da good tings God wen help dem do.
5 But some believas dat used to be Pharisees* stan up an tell: “Dey gotta get circumcise an we gotta tell dem fo follow da Law of Moses.”
6 So da aposals an eldas wen get togedda fo figga dis ting out.
7 Afta talking plenny about um, wuz clear dey no wuz goin agree. So Peter get up an sed: “Braddahs, all you guys know dat from long time ago God wen choose me fo tell odda peopo* da good news* so dat dey could come believas.
8 An God, who know wass in da heart, show he wuz happy wit dem by giving dem his powa jus like he had give us.
9 An he show dat he look at us an dem in da same way. He wen make dea hearts clean cuz of dea faith.
10 So why you stay tes God by trying fo make dem carry dis heavy load dat oua ancestas or even us no could carry?
11 On da odda hand, we get faith dat we stay saved thru da unreal love* oua Lord Jesus wen show, an dey get da same faith too.”
12 Afta dat, all dem come quiet an start fo lissen to Barʹna·bas an Paul. Dey tell dem about all da miracles an unreal tings God wen help dem do wen dey wuz wit da guys dass not Jews.
13 Afta dey pau talk, James tell: “Braddahs, lissen up.
14 Symʹe·on wen tell us evryting about how, fo da firs time, God go look da guys dass not Jews an pick from dem peopo fo rep his name.
15 An wat da Prophets tell match up wit dis. Had say:
16 ‘Afta dese tings I goin come back, an da tent* of David dat wen fall down, I goin lif um up again. I goin rebuild da broken pieces an fix um,
17 so dat da peopo dass lef can really try fo serve me, Jehovah,* togedda wit peopo from odda places, peopo dat rep my name. I, Jehovah, stay saying dis, da one doin dese tings.
18 I wen choose fo do dis from long time ago.’
19 So, I no tink iz good* fo make um hahd fo da odda guys who wen start fo serve God,
20 but iz good fo write to dem fo stay away from anyting connected wit idols, pilau sex,* tings dass strangled,* an from blood.
21 Cuz from ancient times, peopo in one town afta anodda wen talk about wat Moses wen write, an dey read um evrytime in da synagog on da Sabbath.”
22 Den da aposals, da eldas, an da whole hui wen decide fo sen two guys wit Paul an Barʹna·bas to Antioch. Dey wen sen Judas who dey call Barʹsab·bas, an Silas, braddahs who wuz taking da lead in da work.
23 Dey write dis letta an sen um wit dem:
“From yoa braddahs, da aposals an da eldas, to you braddahs dass not Jews in Antioch, Syria, an Ci·liʹcia: Aloha!
24 We wen hea dat some guys from us wen go cause trouble fo you guys by wat dey sed, trying fo mess up wat you* believe, even tho we neva tell dem fo do dat.
25 All us wen agree fo sen two guys wit oua good frenz Paul an Barʹna·bas to you.
26 Both of dem wen risk dea life* fo go all out fo Jesus Christ.
27 So we sending Judas an Silas, so dey can tell you face to face da same tings dass in dis letta.
28 God’s powa wen help us fo make dis decision fo no tell you fo do anyting moa den wat gotta.
29 Gotta stay away from tings sacrificed to idols, from blood, from tings dass strangled, an from pilau sex. If you keep staying away from all dis, tings goin be good fo you. Aloha!”
30 So afta dese guys wen leave, dey go down to Antioch, an dey get evrybody togedda an wen give dem da letta.
31 Afta reading um, dey wuz all happy cuz da letta wen build dem up.
32 An Judas an Silas, who wuz prophets, wen help da braddahs an make dem come strong wit dea talks.
33 Afta dey wuz dea long time, da braddahs tell dem bye an sen dem back to Jerusalem.
34 * ——
35 But Paul an Barʹna·bas wen stay in Antioch. Dem an plenny oddas teach an tell da good news of Jehovah’s message.
36 Some days afta dat, Paul wen tell Barʹna·bas: “Come, we go back an visit da braddahs in da towns wea we wen talk about Jehovah fo see how dey doin.”
37 Barʹna·bas wanted fo take John, who dey call Mark, wit dem.
38 But Paul neva like, cuz Mark wen dig out from dem in Pam·phylʹi·a an neva go wit dem fo do da work.
39 Cuz of dat, dey wen blow up at each odda an dey wen go dea separate ways. Barʹna·bas take Mark wit him an jump on one boat fo go Cyʹprus.
40 Afta da braddahs pray fo Jehovah take kea Paul,* he pick Silas an wen hele.
41 He wen go thru Syria an Ci·liʹcia fo build up all da huis.
Footnotes
^ Dass guys dass not Jews.
^ Or, “da message of da good news”.
^ Go check out “Unreal Love” in Da Bible Dictionary.
^ Or, “booth; house”.
^ Or, “my decision iz not”.
^ Or, “animals dey neva bleed”.
^ Or, “souls”.
^ Dis verse iz in some Bible translations but no stay in some of da mos oldes Greek writings.
^ Or, “show his unreal love to Paul”.
